Yb 14 - Bible en langue Bulu

Môt a se nguleya Saʼalʼawu

¹ Môt a ne mbialan be minga ényiñe jé é nʼétun, njalan a mam ma fôʼé nye.

² A nga faa ane Sam a a tyiʼibaneya a mate ane nsisiñ teke tebe.

³ Wo kôme kui dise dôé be nye! A wo kôme bo na bia wo bi ke aba mejô!

⁴ Za a ye soo jôm é ne mfuban e jôm é ne mvin été? Teke môt.

⁵ Nge wo wo telé melu mé, tañe bengone bé, nge ô maneya telé nné yʼété, nye a se nguleya dañ,

⁶ vaʼa ñhe nye mise nyô, a tame woʼon. Nalé a ye bi jaʼane ve mevak, e ma me môt a saé moné a bili, éyoñe môs ô maneya.

⁷ Elé é bili ndi na: Nge be baʼé je, ja ye beta faa, ja ye bo te jembane bifaʼalé.

⁸ Nge nkañe wé wo bo nnôm e si été, nge nkuʼu wé wo wu e mbuluʼu été,

⁹ ja ye beta faa nge é wôʼô mendim, ja ye beta kpwaé metak ane élé é ndôme bééban.

¹⁰ Ve môt a wu a dimili ngule jé; môta binam a wu: vʼa ne ñhe vé?

¹¹ Mendime ya mañ me ne nguleya tinekan, beta bʼasôé ba vele a kôt;

¹² Avale te môt a bômbô si, vʼa ye bo te beta kôlô si, a ye bo te vee te na yôp e jañ, a ye bo te kôlô ôyo wé été.

¹³ Ngoʼé nge ô nga ye kômbô solé ma e vôme miñwuan mi né, ô baʼaleʼe me wé asoé, akekui ayaa dôé e jeʼebeya, a telé ngum éyoñ ya beta simesane ma!

¹⁴ Nge môt a too ye beta nyiñ éyoñ a wuya, e mimôs mise ma saé, me nga ye bo ve yange, akekui môt a tyendé ma a soya.

¹⁵ Eyoñe te ñhe ô nga ye loon, a ma me nga ye yalane wo, ô nga ye kômbô yen e ma me nʼésaé ya mo môé.

¹⁶ Vʼéyoñe ji wo lañe medaa mebo mam. Yʼô nji yen abé dam?

¹⁷ Mbia mboone wom a ne ndutan e nkuta été, a wo beta vumelane nkobane wom,

¹⁸ ve nkôl wo ku a suʼulane momo, nalé fe akôm da kôlô vôm e né,

¹⁹ mendim ma bo mekoʼo na me sibi, a ngul ya mendim ma lôt ja mane kee tyia; avale te wo wôé ndi nleme ya be môt.

²⁰ Awolo ese wo kui nye bita, a a lôt. Wo tyendé asu dé a mvus éte, wo bo na a kôlô.

²¹ A nji yem nge bone bé be bili ésemé; nge be ne nsilibane si, a nji yene jame te.

²² Mintaé mi ne e minsône mié été, a nsisime wé ñwô wo wôʼôlun.