Yb 13 - Bible en langue Bulu

Yob a kômbô na ba Zambe be tame fetane bifia

¹ Yaa! Mise mam me yeneya mam mete mese. Alo dam e wôʼôya a yeme fe de,

² ma fe ma yem e jam mia yem, me nji bo si a mia.

³ Ve ma ma zu kobô Nyô a ne Ngul ése, ma zu kaman ajô dam asu Zambe,

⁴ amu mia mia fôlô minsos, mia bese mi ne bedokita ya momo.

⁵ Amu jé mi nji tabe bivô? Nalé a nga ye bo fek be mia.

⁶ Ma yeʼelane mia na mi vôʼôlô nkate wom, keʼane melo a wôk ane biyaé biam bia suñ ajô dam,

⁷ ye mia ye kobô ékotekot mi kele Zambe ngam, ye mia ye laa minsos asu ya kamane nye?

⁸ Ye mia ke nye ngam? Ye mia kômbô kamane Zambe?

⁹ Eyoñ a ye yemelane mia ye a ye koone mvoʼé ? Nge na ye mia duʼu nye ane ba duʼu môta binam?

¹⁰ A ye foʼo ve mia bijô nge mia bo mboone wu asoé vʼamu mia ke nye ngam.

¹¹ Ye nyô a nʼéjijin a ye bo te ve mia woñ? Ye angôndô wé a ye bo te ku mia yôp?

¹² Jam mia baʼalane na me yem e ne ve meduʼan, nkamane wônan ô ne ve wu étek.

Jôkaʼane ma me kobô

¹³ Tabaʼane bivô! Jôkaʼane ma! Ma ma zu kobô! Jam ese da ye kui be ma e kui.

¹⁴ Amu jé ma ye kôʼé minsône miam mesôñ, a futi ényiñe jam e wo wom été?

¹⁵ Toʼo Zambe a kômbô wôé ma, me nji beta bi jôm éziñ ya dimili yaa ma ye kaman ajô ya ntabane wom asu dé.

¹⁶ Nalé émien a ne bo mfi mfaʼa wom; amu mbia môt a se nguleya tebe nkat asu dé.

¹⁷ Vôʼôlaʼan, vôʼôlaʼane jam ma jô; éfufup ma liti é tame njaʼa kui melo menan.

¹⁸ Ma kômesane ke nda mejô, a ma yeme na ma me bili mekabe.

¹⁹ Za a kômbô somane ma? Ataté éyoñe ji ma ye tabʼ évô a wu.

Yob a sili e Zambe a solô jam

²⁰ Ve da kañeseʼe ma mam mebaé a ma ye bo te sobô ôyab a asu dôé:

²¹ e wo wôé ô dañe me yôp, nalé fe na angôndô wôé a boʼo te beta ve me woñ,

²² wôna loʼon a ma ye nyoñe nkobô, nge na ma ye kobô a wo ye yalane ma,

²³ minkobane miam a abé dam bi ne tañ aya? Boʼo na me yem mbia jame wom a abé dam.

²⁴ Amu jé wo solé asu dôé? A nyoñe ma ane nsiñe wôé?

²⁵ Ye wo kômbô bo na ôkaé ô fôʼôban? Ye wo kômbô tôñesan ôsôé ô maneya kôt?

²⁶ Amu wo tili bifia bi nʼayô, bi bia wosane ma, wo bo na me beʼe mbeʼe ya minkobane yʼéyoñ me mbe ésoé.

²⁷ Wo kômbô futi mebo mam ébom été, a fombô mam mese ma bo, a ve medaa mebo mame nné.

²⁸ Eyoñe te nyôle jam ja ku é ntoo ébo, ane ngômesane siʼibem ja di.