Yb 12 - Bible en langue Bulu

Yob a yalane Sôfar

¹ Nde Yob a nga yalane na:

² A nto ô yeʼe jô na mia étam mi ne bôt; a na nge mi wôé ñyemane mame ki ô mané.

³ Ma fe me bili ñyeman ane mia. Me nji bo si a mia: za émiene ki a ne bo te yeme mam me too ane mana?

⁴ Me ntoo jôme mvôé jé ja kpweʼele, éyoñ a yeʼelane Zambe na a yalane nye; zôsôa môt, nyô a ne mvoʼé , nye a ntoo jôm ba kpweʼele!

⁵ E jame môte sôm a vak a bili e ne na: A biasé minjuʼu mi bôte bevok, a na a bôme ba mebo ma yeñelan.

⁶ Besa bôt, nda éndelé jap é ne teke jôme ja tyelé nleme yôp, ba ba bo Zambe abé be ne mvoʼé teke jôme ba ko woñ, avale te fe é ne e be nyô a belane Zambe avalʼEmien a kômbô.

⁷ Ve tame sili betite minsili, ba ye yeʼele wo, anone ya yôp, de ki da ye liti wo jame te;

⁸ tame fas ajô ya si, ja ye yeʼele wo, a kose ya mañ ja ye kañete wo de,

⁹ za a ne te yeme be be na: Wo Zambe ñwô ô nga bo mam mete mese?

¹⁰ A bili ényiñe ya jôm ése é vee e wo wé été, mvebe ya minsône mi môt ase.

¹¹ Ye melo me ne te yeme kandé minkañete, avalʼanʼôyem wo yeme vôʼôlô ane bidi bi nʼanyu?

¹² Minnôm mi bôt mi bili fek a e nyiñan ayabe wob été, be bili ñyeman.

Ngule Zambe ja dañ

¹³ Zambʼa ne fek a ngu mbôndane fek a atyeñ bi nʼémbié.

¹⁴ Nge a mane tyam, teke môt a ne beta lôñ; nge a fete môt nda été, teke môt a ne dii mbé ,

¹⁵ nge a bi mendim, jôm ése é mane kôt; Nge a suu mendim mete, me ve mane bulekane si.

¹⁶ A bili ngu a nya mfasane mam; Nyô a fuʼu fé a nyô a bo bôte befe na be fuʼu fé, bebaane be ne e ngule jé si.

¹⁷ A kee bebôndé befek e minkôm; a juʼulane bebela betyiʼi mejô;

¹⁸ a kôté bôt étibelaʼa bejô bôt, a jalé be kandé angeteñ,

¹⁹ a bo na betuni be ke ba ndeñ; a dume bôt be ne tekʼafôʼé si.

²⁰ Ba be too ndi na be ne keʼete, a tooé be mvuk; a vaa minnôm mi bôt fek.

²¹ A sôé bivet ébiasé nyô; a tii asese mingungule mi bôt;

²² bidoʼo ya dibi a bôé bie kayale. A zuu nsisiñe dibi yʼawu e vôm éfufub é né.

²³ Aval a nene meyoñ me bôt, nde fe a bo na me wulan; aval a kee meyoñ me bôt ôyap, nde fe a soo me.

²⁴ A vaa fek e be bivete meyoñ me bôt. A bo bie na bi ndeñ e nkôte si teke yeme zen .

²⁵ A bo fe bie na bi bôp e dibi été tekʼéfufup; a bo bie na bi ke bia ndeñ ane bôt be biliya bilam.