Yb 11 - Bible en langue Bulu

Sôfar a kobô Yob

¹ Ane Sôfar ya Nama a nga nyoñe nkobô a jô na:

² Ye abui nkobô di da ye bo te yen éyalan, asu ya bi mekabe, ye da sili ve na môt a kobô abui?

³ Ye zôʼé nkobô jôé nje ja ye toé bôte bivô? Ye wo kpweʼele bôt te môt a ve wʼôsone nyô?

⁴ Wo jô na: Ñyemane wom ô ne teke bijô, a me ne mfuban e mise môé.

⁵ Ngoʼo nge Zambe a too ye kômbô kobô, nge a too ye dii anyu asu dôé,

⁶ a nge a too ye kate wo minsolane mi mame ya feʼe jé, nje ja dañe bebela, éyoñe te ñhe ô nga ye yeme na, mfaʼa wôé Zambe a vuane ngab éziñe yʼékobe jôé.

⁷ Ye ô ne kulane yeme bidoʼo bi Zambe, nge kulane yeme jam da nnambe ntute mvoʼé ya nyô a ne ngul ése?

⁸ Ntute mvoʼé te ô ne fʼôyabe yôp, ane yôp: wo ye bo jé? O ne fʼédok ane vôma miñwuan: wo ye yeme jé?

⁹ Oveʼe yʼété ô nʼayab a dañe si, a ndam a dañe mañ.

¹⁰ Nge Zambe a lôt nge futi e mimbôk, nge a loone môt aba mejô dé, za a ne nguleya tebe nye ngame yat?

¹¹ Amu a yeme bôt be ne meduʼan, a yen ékotekote ntyiʼane mejô teke kômbô nyoñe ngab été.

¹² Ve môt a bili feʼe ya nlô ô yoo, môta binam a nga bialé ane mone ngal éjakase ya fé.

Mfefé ényiñ

¹³ Mfaʼa wôé, nge wo tyendé ntaban, a nge wo same mo môé be Zambe,

¹⁴ Ngʼékotekote ntyiʼane mejô ja ke wo wôé ôyap, a bo te jôʼé abé é kôm éto e menda bindelé môé si,

¹⁵ éyoñe te wo ye bete asu dôé yôp tekʼayeñ, wo ye bo ngu, teke woñ éziñ;

¹⁶ amu wo ye vuane njuʼu wôé, wo ye simesane wô ane mendim me maneya lôt.

¹⁷ E nyiñan wo nyiñ wo ye faé a dañe zañe môs , dibi da ye bo ane mametyé,

¹⁸ wo ye bo njalan a ndi nlem , amu jame ya tabe de ndi da ye bo; wo ye fombô mevôm ma bômane wo, a wo ye bômbô si teke jame ya ko woñ;

¹⁹ wo ye same nyôle si, teke môt a ndeñele wo; abui bôt da wone wo,

²⁰ ve mise bebo abé ma ye diʼiban; ba ye bo te vôme ya sobô; Ndi minleme jap ja ye bo ve na be jibi wu.