Yb 10 - Bible en langue Bulu

Etétéa é ne jôme ya biasé

¹ Enyiñ é vindaneya ma nlem ! Ajô te me tame jôʼé ñyône wom ô kui amu ajô yʼasuʼulane dam, ma ye kobô éyôé ya nleme wom été.

² Ma jô Zambe na: Te ve ma mekua! Boʼo me na me yeme jam wo wôʼô ma de ôlun!

³ Ye wo yene de mvaé na ô bo nyô a kpweʼele, a na ô biasé ésaé ya mo môé a faé éfufube jôé ékôane bebo abé ?

⁴ Ye ô beʼe mise minsôn, a ye wo yen ane môt?

⁵ Ye melu môé me ne ane ma me môt nge mimbu miôé ane mimôs mi môt,

⁶ ane ô ne nguleya jeñ ékobe jam, ane ô ne kômbô yem abé dam,

⁷ ô yeme fe na me nji yiane mekua, a na teke môt a ne nyii môt e mo môé été?

⁸ Mo môé mme me nga mé ma, mme me nga kôme ma ngumba. Ye ô ne kôme bele jiane ma?

⁹ O simesaʼane na ô nga kôme ma a metek; ye wo kômbô bulane ma e mbuluʼu été?

¹⁰ Ye ô nji sôé ma ane menyañ? Ye ô nji bo na me lik anʼavoñ?

¹¹ O nga jalé ma ékôp a minsôn, a late ma a bives a minsis;

¹² ô nga ve ma ényiñ a mvam , njuʼu ô nga nyoñe be ma, ñwô ô nga baʼale ényiñe jam.

¹³ Ve tame yene jam ô mbe ô baʼaleʼe nleme wôé été, ma yeme jam e mbe ôsimesane viôé été;

¹⁴ Nge ma bo abé , ô lôô ma, a ô nji yene ma ane nyô a ne te mekua yʼékobe jé.

¹⁵ Nge ma yiane mekua, ngoʼo ma! Nge me ne zôsôô , me nji bo ayoʼo ya bete nlô, amu ébiasé é kuliya mʼabume nlem , a éngôngol é mineya ma.

¹⁶ A nge ma bo ayoʼo ya beta kôlô si, wo tôñesane ma ane ngbwengbwem, a beta bibi ma a bitua bi mam,

¹⁷ wo telé ma mimfefé bengaa e ngame yat, ôlune wo wôʼô ma ve nenenen, nkane bita wo tebe señe jôé asu ya wosane ma.

Yob a sili Zambe ajô ya Abialé dé

¹⁸ Amu jé ô nga soo ma abume nyia wom? Me nga yiane wu a dis éziñ e nji ye yene ma.

¹⁹ Me nga ye bo ane nge me nji tame nyiñ, akôlô yʼabume nyia wom, me nga ye ke ve soñ.

²⁰ Ye melu mam me nji bo tyôtyoé? A tame jôʼé ma! A kôlôʼô be ma, me beta nyoñ ôbe ngu,

²¹ nté me ngenane te ke mekemeke e si dibi a nsisiñ yʼawu,

²² e si édoʼo dibi ja funane dibi ndim, nsisiñ yʼawu, vôme nzametaʼan a jôô, a e vôm éfufub é ne ane dibi!