Yb 1 - Bible en langue Bulu

Satan a veʼele Yob

¹ Môt éziñ a nga too si ya Uts jôé na Yob. Môt ate a mbe nya mvoʼé a zôsôô; a mbe a ko Zambe woñ a saʼale fe abé .

² A nga biaé bobefame zamgbwa a bobebinga belaa.

³ Mbame biyeme wé ô nga bili mintômba toyini zamgbwa, bekamel toyini éla, benyak toyini, beyale bijakas mintete mitan, nalé fe abui bebo bisaé. Môt ate nye a nga dañ éwôlô ézezañe bôte bese ya jôp da tôô.

⁴ Bobefame bé be nga bili fulu ya ke bo ésulane bidi e nda be môt ase yʼété, môt ase éyoñe jé, be mbe be bañeteʼe bekale bab belale na ba be be be di a nyu.

⁵ Eyoñ melu ya ésulan bidi me lôteya, Yob a mbe a loʼone bobefame bé a tune be. Wôna ndibe tyé a nga kôlô si a ve metunaʼa ma diʼibane ngumba asu môt ase yʼété, amu Yob a mbe a simesaʼane na: Ndôʼôtô bobefame bam be maneya bo abé a ndôʼôtô be maneya kobô Zambe ébiasé e minleme miab été.

⁶ Môs éziñ bone be Zambe be nga zu tebe asu Zambe, nde satane fe a nga suan e zañe jap.

⁷ Zambe a nga sili Satane na: Wo so vé? Satane nye Zambe na: A so ma ndeñendeñe si nyô, a wulu li a li été.

⁸ Zambe a nga sili Satane na: Ye ô yeneya foʼo mbo ésaé wom Yob? E si nyô môte mfe a nji bo ane nye; nyô a ne nya mvoʼé a zôsôô , a ko Zambe woñ, a saʼaleʼe abé .

⁹ Satan a nga yalane Zambe na: Ye Yob a ko Zambe woñe zezé?

¹⁰ Ye ô nji lôñe nye nkaʼalé, émien, nda bôte jé, a biôm bise a bili? Ô maneya botan ésaé ya mo mé, a mbame biyeme wé wo fôé a mialane si nyô.

¹¹ Ve tame same wo wôé a nnambe jôm ése a bili, ma bele na a ye kobô wo ébiasé womien ô too.

¹² Ane Zambe a nga jô Satan na: E boʼo nalé! Akume dé ese e ntoo e mo môé. Ve da, te same wo wôé a nambe émien. Nde Satan a nga kôlô e vôme Zambe a né.

¹³ Môs éziñ bobefam a bobebinga be Yob be jaʼak a nyu woon e nda be monyañe mvendé wop,

¹⁴ nde nlôman wo kui be Yob a jô nye na: Benyak ba be be senaʼane si, beyale bijakase ki be jaʼak e fefele jap;

¹⁵ nde Besabééñ ba te kui be bita a nyoñe be a wôé bebo bisaé a nkpwaté mekôn, ma étam ma te tube na me zu kate wo foé.

¹⁶ A ngenan a kobôʼô nde nlôman ôfe wo zu jô na: Nduan Zambe ja te so yôp a diʼi mintômba, bikela a bebo bisaé, a mane mine be, ma étam ma te tube na me zu kate wo foé.

¹⁷ A ngenan a kobôʼô nde ôfe wo so a jô nye na: Bekaldééñ, minsamba milaa, ba te kubu bekamel yôp a nyoñe be a wôé bebo bisaé a nkpwaté mekôn. Ma étam ma te tube na me zu kate wo foé.

¹⁸ A ngenan a kobôʼô nde ôfe wo suan a jô nye na: Bobefame bôé a bobebinga bôé ba too be jaʼak a nyu woon e nda be monyañe wob a ne mvendé;

¹⁹ ateme na beta évuñulu ve ke so mfaʼa ya nkôte si, ve jimbi mekuʼu menyine ya nda; nde nda ja te ku bongô yôp, éyoñe ji be maneya wu. Ma étam ma te tube na me zu kate wo foé.

²⁰ Nde Yob a nga kôlô si, a nyabe mengômesane mé, a sôté nlô, ve ku a kute meboñe si a jô na:

²¹ Soé me nga so je abume nyia wom nje fe ma ye bulane je. Zambe nye a nga ve, Nye fe a vaaya; jôé Zambe nde é boʼo ébotan!

²² E mam mete mese Yob a nji bo abé , nge bo akute ya boʼolô Zambe jam.