YASUA 8 - Bible en langue Bulu

Nyoñan tison Ayi

¹ Ane Nti a nga jô Yasua na: Te ko woñ, nge foʼôban! Nyoñe bôt bese ya mewosan, kôlôʼô si a ke wosane Ayi. O lôô me veya njô bôte ya ayi, bôte bé, tisone jé a si jé e mo môé.

² Wo ye bo tison Ayi a njô bôte wé avale fe ô nga bo Yérikô a njô bôte wé: akum yʼété a biyem bia ye bo mfaʼa wônan ane biôm ya nsa. Ve wo, kele sobô mvuse tison.

³ Ajô te Yasua a nga kôlô si baa be bôte bese ya mewosan a ke mfaʼa ya Ayi. Ane a nga tobe biwôlô bezimbi ya mewosan toyini mewôm mela bi ke a alu,

⁴ a jô bie na: Tabaʼane ntyel! Kela sobane mvuse tison. Ve te dañe kean ôyap a je; mia bese tabaʼane nkôman.

⁵ Ma, a bôte bese bia be be bi né, bia ye subu bebé tison. Eyoñ ba ye zu tôbane bia avalʼane éyoñ ya mvus, éyoñe te bia ye tup ôsu viap.

⁶ Ba ye kui atan a titane bia akekui bi kandéya be a tison, amu ba ye jô na: Ba te tube bia avalʼane éyoñ ya ôsu. Eyoñ bia ye tube be nalé,

⁷ éyoñe te mia ye kôlô asoé denan a nyoñe tison. Nti, e Zambe wônan, a ye ve je e mo menan.

⁸ Eyoñ mi nyoñeya tison, mia ye diʼi je a nduan. Mia ye bo avalʼane njôane Nti ô né. Tabaʼan ntyel, ma ve mia abendé.

⁹ Ane Yasua a nga suu be be ke, nalé be nga ke sobô. Be nga sobô e zañe Bétél a Ayi, be too Ayi mfaʼa jôp da dim. Alu te Yasua a nga bômbô baa be bôte bese vôme wua.

¹⁰ Ndibe tyé, Yasua a nga kôlô si a mane fombô bôte bese. Ane a nga bet a ke Ayi, a telé bôt ôsu baa be bemvendé ya Israél.

¹¹ Bôte mewosan bese baa be nye be nga too, be nga beta subu nye bebé; éyoñ be nga kui zôsôô a tison, be nga vule minkan Ayi mfaʼa ya akôé. Mbiʼili ô mbe zañe jap a Ayi.

¹² Ajô te Yasua a nga nyoñe bôt bebé toyini mewôm metan, a solé be zañe Bétél a Ayi, be too mfaʼa jôp da dim a tison.

¹³ Eyoñe bôt be nga mane vule minkan mise e tison mfaʼa ya akôé a mfaʼa jôp da dim, alu te, Yasua a nga bômbô mbiʼili été.

¹⁴ Eyoñ njô bôte ya Ayi a nga yene nalé, émien a bôte bé bese be nga jiʼa kôlô si, a bôte ya tison be nga kui atan, éyoñ abendé é vebaneya, a ke tôbane Israél, na be wosane nye zôsôô a Araba. Njô bôt a nji ke yeme na bôt ba wosane nye be solô mvuse tison.

¹⁵ Yasua a Israél ase be nga bo ane ba tek ôsu viap; nde be nga tup a ke zene ya nkôte si.

¹⁶ Ane be nga loone bôte bese ya tisone na be tôñe be. Ajô te be nga tôñe Yasua, a nkandan ô nga bo zañe jap a tison.

¹⁷ Teke môt éziñ a nga liʼi Ayi a Bétél. Bese be nga mane kui atan a tôñe Israél be liʼi fe tison é yoo.

¹⁸ Eyoñe te Nti a nga jô Yasua na: Same nsoñ akoñ ô bili mo mfaʼa ya Ayi, amu me veya nye e mo môé. Nde Yasua a nga liti akoñ a nga bili wo mfaʼa ya tison.

¹⁹ Ane bôt be mbe asoé be nga jiʼa kôlô, môt ase vôm a nga solô, a ke, nté a nga same wô, be nga kui tison, a nyoñe je, a bo avôle ya diʼi je a nduan.

²⁰ Eyoñ bôte ya Ayi be nga fombô mvus, be nga yen ôtita ya tison ô betek a kui yôp. Be nji ke fe bi vôme ya tup nge li nge li. Bôte yʼIsraél be nga mate a ke zene ya nkôte si, be nga bulan a wosane bôt be nga tôñe be mvus.

²¹ Eyoñ Yasua a Israél ase be yeneya na bôt be nga solô be nyoñeya tison a ôtita yʼété ô bete fe yôp, be nga bulane mvus a wôé bôte ya Ayi.

²² Bôt be mbe tison été fe be nga kui atan a zu tôbane be: ajô te bôte ya Ayi be nga bili vôm ase ézezañ Israél: nalé Israél a nga wôé be teke môt a liʼi nge tup.

²³ Ve be nga bi njô bôte ya Ayi vevee, a kee nye be Yasua.

²⁴ Eyoñ Israél a sondôya mane wôé bôt bese be nga too ayi, e mefup, e nkôte si mfaʼa be nga tôñesane be, a na, be nga mane wu a meyo me nkpwaté mekôn, jôme teke liʼi, ane Israél ase a nga timan e mfaʼa Ayi a jiane nye a meyo me nkpwaté mekôn.

²⁵ Bôt bese ya ayi be nga wôéban môs ôte, befam a binga, be mbe toyini awôm a ébaé.

²⁶ Yasua a nji bulane wo a akoñ a nga same mvus te na bôte bese ya ayi be mane jañ.

²⁷ Ve da Israél a nga nyoñ mfaʼa wé ane biôme ya nsa: biyem a biôm ya tison éte, avalʼane Nti a nga bendé Yasua.

²⁸ Nalé ate Yasua a nga diʼi Ayi a bo nye beta avise tyia ôlun a zu kui môse wu.

²⁹ Wôna a nga tyelé njô bôte ya ayi élé a kui mamengôʼé; éyoñe jôp e nga lumbu, Yasua a nga jô na be vaa mbim élé. Nde be nga wua wô anyiine mbé ya tison, a bo beta avise mekok été yôp: beta avise mekoʼo ate a ngenan a zu kui môse wu.

Yasua a lôñ ataʼa metunaʼa nkôl Ebale yôp

³⁰ Ane Yasua a nga lôñe Nti ataʼa metunaʼa, Zambe ya Israél, nkôle Ebale yôp.

³¹ Avale Môze, mbo ésaé Nti a nga bendé bone bʼIsraél, ane e ne ntilan kalate metiñe Môze na: Ataʼa mekoʼo me ne teke mbaan a étyé é nji ke tame lôte été yôp. Nde be nga zu mimvean mi ne ngum été yôp a ve fe metunaʼa ya nlatan ngbwa.

³² A valé nye Yasua a nga tili metiñ me Môze e mekoʼo yôp tañ biyoñ bibaé, Israél ase a too.

³³ Israél ase, bemvendé bé, betebʼôsu ya mewosane bé a betyiʼi mejô bé, be mbe be tele mekuʼu mese ya éwolo élat, beyeñ a bebialébialé, asu bone be Lévi be ne betuni, mbe be mbe be beʼe éwolo élate Nti, ngabe jia é tele nkôle Garizim, nyô fok nkôl Ebal, aval abendé Môze, mbo ésaé Nti e mbe na: Be taté botan ayoñ Israél.

³⁴ Eyoñe te Yasua a nga lañ bifia bise ya metiñ: bibotan a biyoʼé, avalʼése e ne ntilane kalate metiñ.

³⁵ Teke jam éziñ ya Môze a nga tiñeti e nga liʼi Yasua te lañe de asu be ngum ékôan Israél ôse binga, bongô a beyeñ baa be be be nga wulu.