YASUA 7 - Bible en langue Bulu

Abé Akan a melep ma tôñe nye

¹ Ve bone bʼIsraél be nga tyam atiñe Nti a nga ve be na, be bo te nnambe jôm é ne ntiñetane na ja yiane jañ e Yérikô été amu Akan, mona Karmi, ndaé Zabdi, ndile Zérak ya ayoñe Yuda, a nga nyoñ biôm biziñ ya bi bi nga yiane jañ: ajô te ayaa Nti e nga yôñ ane nduan e nyôle bone bʼIsraél.

² Nde a zu bo na, Yasua ve lôme bôt Ayi, be kôlôʼô e Yérikô. Ayi a mbe bebé a Bét-Avén, mfaʼa jôp da tôô, e Bétél. Ane a nga jô bôte bete na: Betan a looé si. Nde be nga bet a looé Ayi.

³ Be nga bulan be Yasua a jô nye na: Bôte bese be nji ke yiane bet, be ne ke ve bôte toyini ébaé nge éla a dañe tisone Ayi! Te jalé bôt bese njuʼu nyôl e zesé, amu besiñ bebien be nji ke bo abui.

⁴ Nalé bôte bebé toyini éla be nga ke a mate asu bôte ya Ayi.

⁵ Bôte ya Ayi be nga wôé ba ya Israél bôte bebé mewôm mela a besaman. Be nga titane be mvus ataté anyiine mbé ya tison a kui Sébarim: be nga wôé be asiliki nkô: ajô te bôt be nga bo te fe minlem mebum a bo ane mendim.

⁶ Ajô te Yasua a nga nyab mengômesan mé, a ku asu e butu si ôsu éwolo Nti akekui mamengôʼé, émien a bemvendé yʼIsraél. Be nga kute mbuluk minlô miap.

⁷ Ane Yasua a nga jô na: A Nti, Nyô a too nnôm éto, amu jé ô nga bo bôte bana na be dañe Yordan, yʼamu na ô ve be mo Beamorééñ a bo na be jañ? Ngoʼé nge bi nga jibi ke tabe Yordan yat!

⁸ A Nti, me jô ñhe aya éyoñe ji! Eyoñ Israél a lumeya besiñ bé mvus?

⁹ Amu bôte ya Kanaan a ba bese be too si éte, ba ye kôme wôʼô ajô di, éyoñe te ba ye bômane bia ne kpwok, a bo na jôé dangan e jañ e si nyôna été: nde ñhe wo ye bo jôé dôé é ne anen aya?

¹⁰ Ajô te Nti a nga jô Yasua na: Kôlôʼô si, jé ja lôt! Wo ku asu e butu si amu jé?

¹¹ Israél a semeya, amu na, be tyameya élate jam me nga tiñeti be; be nyoñeya ngab éziñ ya jôm ja yiane jañ, be wubeya je, be soléya je, a kui fe vôme ya futi je mimbeʼe miab été.

¹² Bone bʼIsraél be se ngule ya tebe asu besiñe bap. Ba ye lume besiñe babe mvus, amu bebien be ntoo jôm ya njañ. Ma ye bo te beta wulu a mia nge mi nji tyam jôm ja yiane jañ é ne ézezañe jenan.

¹³ Kôlôʼô si, a tun ayoñ. Wo ye jô bôte na: Tunane miabebien asu ya akiti, amu avale di nde Nti, Nyô a ne Zambe ya Israél a jô na: Jôm ja yiane jañ é ne ézezañ jôé, a Israél! Ajô te ô se ngule ya tebe asu besiñ bôé, nté mi ngenan te vaa jôm ja yiane jañ é ne ézezañ jenan.

¹⁴ Mametyé, meyoñ mese awôm a mebaé ma ye subu bebé; wôna ayoñ Nti a ye liti ônyu da ye subu avalʼane mebume mé me né a abume bôt Nti a ye liti ônyu, da ye subu avalʼane menda me bôte mé me né, a nda bôt Nti a ye liti ônyu ja ye subu avalʼane betebʼôsu yʼété be né.

¹⁵ A ye bo na, nyô a ye beʼe ayeme ya jôm ja yiane jañ a ye diʼiban nduan, émien a jôm ése a bili: amu a tyameya élate Nti, a a boya jam é ne ôson a ôsame Israél été.

¹⁶ Nalé Yasua a nga kôlô si ndibe tyé, a bo na Israél a subu nye bebé avalʼane meyoñ mé me né. Ane ayoñe Yuda e nga litiban ônyu.

¹⁷ Nde a nga loone mebum me bôt ya Yuda, ane di Zéra e nga litiban ônyu. A nga loon abume bôte Zéra avalʼane betebʼôsu bap be né, ane Zabdi a nga litiban ônyu.

¹⁸ A nga loone minlô ya nda bôte Zabdi, nde Akan, mona Karmi, ndaé Zabdi, ndile Zéra ya ayoñ Yuda a nga litiban ônyu.

¹⁹ Ajô te Yasua a nga sili Akan na: A mone wom, vaʼa Nti duma a akéva. Nyô a ne Zambe ya Israél; nalé fe na kate ma jam ô nga bo a te solé ma de!

²⁰ Nde Akan a nga yalane Yasua na: E ne foʼo bebela na ma me boya nsem e mise me Nti, Zambe ya Israél. Jam ese me nga bo nde di:

²¹ me nga yen, e biôm ya nsa été, étua mbamba alôʼô ya Sinéar nalé besikel be argent mintete mibaé a beta ébabe or adit tañ besikel mewôm metan; ane me nga nyamete bie a nyoñe bie; biôm bite bi ne nda éndelé jam, nsolan si été, argent nye a ne mfaʼa ya si.

²² Nde Yasua a nga lôme bôte mbil nda éndelé. A be nga koone foʼo bi ntoo mbamba nsolan nda éndelé Akan été, argent a too mfaʼa ya si.

²³ Ane be nga vaa bie nda éndelé a zuu bie be Yasua a Israél ase a bôé bie asu be Nti.

²⁴ Wôna Yasua a nga nyoñe Akan, mona Zéra, nalé fe argent, alôʼô a ébabe or, bobefame bé, bobebinga bé, a benyaʼa bé, bijakase bié, mone mbame wé, nda éndelé jé a jôm ése é mbe énjé. Israél ase a nga fulan a Yasua, ane be nga kee be mbiʼili Akor.

²⁵ Nde Yasua a nga jô na: Amu jé ô litiya bia abime njuʼu di! Nti fe a liti wo njuk e môse wu. Ane Israél ase a nga lume nye mekok . Be nga diʼi be nduan a lume be mekok .

²⁶ Be nga bo beta avis mekok Akane yôp; avise mekoʼo te e ne a zu kui e môse wu, a Nti a nga jôʼé mbia ayaa wé. A mbiʼili wu wo loban a zu kui e môse wuna na mbiʼili Akor.