Biblia Todo Logo
Bìoball air-loidhne

- Sanasan -

YASUA 6 - Bible en langue Bulu

1 Yérikô a mbe ndiban a mfetan: teke môt a mbe ngule ya kui atan nge nyiin e tison été.

2 Ane Nti a nga jô Yasua na: Tame yen, me veya Yérikô e mo môé, nalé fe njô bôte wé a biwôlô bi bôte ya mewosan.

3 Wo a bôte mewosan bese, mia ye tyiñelane tison tañe mimôse misaman, môs ôse éyoñe jia.

4 Betuni zamgbwa ba ye tebe ôsu éwolo élat, be beʼe metoñ minlaʼa mi ntômba zamgbwa. Môse zamgbwale, mia ye tyiñelane tison biyoñ zamgbwa a betuni ba ye loñe toñ.

5 Eyoñe minlaʼa mi ntômba mia ye kobô, a éyoñ mia ye wôʼô tyiñe toñ, bôte bese ba ye yôtane metyiñe mabe ngu. Nalé ate beta akaʼa ya tison a ye ku ébiene yôp, a bôte bese ba ye bet, môt ase a kele ôsu vié.

6 Ane Yasua, mona Nun, a nga loone betuni a jô be na: Bekaʼan éwolo élat, a bôte ya be mia zamgbwa be tebeʼe je ôsu, be beʼe metoñ minlaʼa mi ntômba zamgbwa.

7 Wôna a nga jô bôte bevoʼo na: Lôtan a tyiñelane tison éyoñ jia, asuzoʼo nkan bita a tele ôsu éwolo élat.

8 Nde bôt be nga bo avale Yasua a nga jô: betuni zamgbwa be nga beʼe metoñ minlaʼa mi ntômba zamgbwa ôsu éwolo élat, be nga lôt a loñe metoñ, éwolo élate Nti é nga tôñe be mvus.

9 Asuzoʼo nkan bita a nga wulu ôsu betuni be mbe be loñe metoñ, nkan bita ôvok ô nga zu mvus éwolo élat. Be nga wulu a tyiñe toñ.

10 Yasua a nga ve bôt atiñe na: Mia ye bo te yôtan nge bo na tyiñ jenan é wôʼé, a mia ye bo te kobô akekui môs ma ye jô mia na: Betaʼan metyiñ! Eyoñe te nje mia ye yôtan.

11 Ane éwolo élat é nga tyiñelane tison éyoñe jia, a beta bulane minkan, a lôt alu valé.

12 Ndibe tyé, Yasua a nga kôlô si, a betuni be nga beʼe éwolo élat.

13 Betuni zamgbwa be nga beʼe metoñ minlaʼa mi ntômba zamgbwa ôsu éwolo élate Nti, be nga beta taté dulu a loñe toñ, ngap bezimbi jia é too be ôsu, nyô fok é zaʼa be mvus. Be wuluʼu a tyiñe toñ.

14 E môse baa, be nga tyiñelane tison éyoñ jia, nde be nga beta bulane minkan. Be nga bo avale da tañe môs misaman.

15 Môse zamgbwale, be nga kune kôlô si a tyiñelane tison biyoñ zamgbwa, nsamba ô too ntaʼan avale da. Môs ôte étam ñwô be nga tyiñelane tison Yérikô biyoñ zamgbwa.

16 Eyoñ zamgbwale, betuni be nga loñe metoñ, a Yasua a nga jô be na: Betaʼan metyiñe yôp, amu Nti a veya mia tison!

17 Tison ébien a biôm bise bi ne été, bia ye mane jañ a vebane ngumba e be Nti. Rahab, minga ébamba, nye étam a ye nyiiban, émien a jôm ése é ne nda jé été, amu a nga solé belooé si bi nga lôm.

18 Ve tabaʼan ntyele ya nyoñ jôm ése ja yiane jañ, amu nge mia nyoñe je, mia ye soo njuk a njañ e minkan yʼIsraél été.

19 Argent, or a biôm bi ne mboon a mvot nge a étyé, bi ne asu Nti: bia ye nyiin akume dé été.

20 Ane bôte bese be nga bete metyiñe yôp, a toñ é nga kobô. Eyoñ bôt be nga wôʼô tyiñe toñ, be nga bete metyiñ yôp a mfin mekoʼo ya Yérikô ô nga ku ôbiene yôp, a bôt be nga nyiine tison été, môt ase a kele ôsu vié. Ane be nga nyoñe tisone Yérikô.

21 Be nga jiane jôm ése é mbe tison été a nkpwaté mekôn: befam a binga, bongô a minnôm, benyak, mintômba a bijakas.

22 Yasua a nga jô bôte bebaé be nga looé si na: Kelan be minga ébamba a kuli nye atan nalé fe jôm ése é ne énjé, amu mi nga kane nye ngana.

23 Ane bendôman bete be nga ke a kuli Rahab atan, nalé fe ésaa, nyia bobenyañ a jôm ése a nga bili; be nga kuli bebiaé bé bese atan. Nde be nga solé be atan ya minkan yʼIsraél, vôme njuk ô nji bo nguleya kui be be.

24 Be nga diʼi tison a biôm bise bi mbe été, ô vaa ve argent, or a biôm bi ne mboon a mvot nge a étyé, mbie be nga futi, ane akum ya nda Nti.

25 Yasua a nga nyii Rahab, minga ébamba a nda bôte jé, nalé fe jôm ése a nga bili. Nde a nga nyiñ Israél été a zu kui e môse wu, amu a nga solé e bôte Yasua a nga lôme na be ke looé tison Yérikô.

26 Eyoñe melu mete nje Yasua a nga kane ngana na: Biyoʼé, asu be Nti, e be môt ase a ye tebe a beta lôñe tison Yérikô. Nyô a bo mbôkaʼa yʼété a ye dimili ntôle monafame wé, a nyô a bo mimbé yʼété a ye dimili monafame wé a dañ mongô.

27 Nti a nga too be Yasua, ajô te duma dé e nga yiane si ése ya Kanaan.

© LʼAlliance Biblique du Cameroun, 2009

Bible Society of Cameroon
Lean sinn:



Sanasan