YASUA 5 - Bible en langue Bulu

Ntyiʼibane metyel a abôʼô pak

¹ Eyoñ bejô bôt bese ya Beamorééñ be too Yordan yat mfaʼa jôb da dim, a bejô bôt ya Bekananééñ be too bebé mañ, be nga wôʼô na Nti a nga vele Yordan ôsu bone bʼIsraél, akekui be nga mane dañ, fek é nga jañe be mebum te fe ngule ya kuli mvebe asu bone bʼIsraél.

² Melu mete, Nti a nga jô Yasua na: Kôme atyeñe mekok a beta tyiʼi bone bʼIsraél metyel éyoñe baa.

³ Nde Yasua a nga kôm atyeñe mekok a tyiʼi bone bʼIsraél metyel, bebé e nkôl ô nga yôbane jôé na nkôle ntyiʼibane metyel.

⁴ Yasua a nga tyiʼi be metyel amu na: Bôte bese be nga kôlô Ejipte, beyôm, befam ya mewosan, bese be nga mane wu nkôte si e dulu zañ, valé be kôlôya Ejipte.

⁵ Bôte bese be nga kôlô Ejipte be nga tyiʼibane metye, ve ba bese be nga bialé zene zen nkôte si, valé be kôlôya Ejipte, teke wua a nga tyiʼiban atyel.

⁶ Bone bʼIsraél be nga wulu nkôte si tañe mimbu mewôm menyin, akekui befam mewosan bese be nga kôlô Ejipte a be nga bo te vôʼôlô tyiñe Nti be nga mane jañ; Nti a nga kane ngana mfaʼa wobe na ba ye bo te yene si, nje Nti a nga kane bʼésaa ngana na a ye ve bia, si, vôm menyañ a wôé bia len.

⁷ Nde a nga telé bon éjiane jap, a Yasua a nga tyiʼi be metyel amu be mbe minsôso, amu be nji ke tyiʼiban e zen .

⁸ Eyoñe bôte bese be nga mane tyiʼiban metyel, be nga tabe vôme wua minkan akekui be nga mane yet.

⁹ Ane Nti a nga jô Yasua na: Den, ôson yʼEjipte ô keya mia ôyap: ajô te be nga yôlé vôm ate na Gilgal a kui e môse wu.

¹⁰ Bone bʼIsraél be nga tabe Gilgal a jem abôʼô Pak e minjeʼese mi Yérikô, mamengôʼé ya ngon ôsu é too melu awôm a menyin.

¹¹ Nde be nga di bibuma ya si éte: belet é ne te mvusan, a miñyañan mefes me fôn môs ôte ôbien.

¹² Eyoñ be diya bibuma ya si éte, mametyé, ane manna a nga man. Bone bʼIsraél be nji ke fe beta bi manna , ve be nga di bibuma ya Kanaan mbu ôte.

Nyoñan Yérikô

¹³ A nga bo na Yasua a too Yérikô, nde a nga bete mis a fombô, ateme na môt a ntele nye ôsu, a bili nsoé nkpwaté mekône wo. Ane Yasua a nga subu nye bebé a sili nye na: Ye ô ne môte ya ngame jangan, ye nyô ya ngame besiñ bangan?

¹⁴ Nde a nga yalan Yasua na: Momo ve me ne njôô nsamba mewosan Nti, me ndôme so. Ane Yasua a nga ku asu é butu si, ve kañ a jô nye na: Jé nje Nti wom a jô mbo ésaé wé?

¹⁵ Nde évete nsamba mewosane Nti é nga jô Yasua na: Vaʼa besilefase bôé e mebo môé, amu vôm ô tele le a ne étyi. Ane Yasua a nga bo nalé.