YASUA 4 - Bible en langue Bulu

Mekoʼo awôm a mebaé

¹ Eyoñe ngum ayoñ ôse ô maneya dañe Yordan, Nti a nga jô Yasua na:

² Nyoñan befam awôm a bebaé ayoñ été, nda bôt ése môte wua.

³ Bendaʼane bôte bete na: Tokaʼane mekoʼo awôm a mebaé, ézezañe Yordan e mevôm betuni be nga tebe ne sim, éyoñe te mia ye dañe me Yordan a bôé me vôm mia ye bômbô meyôa den.

⁴ Nde Yasua a nga loone befam awôm a bebaé be nga toban e bone bʼIsraél été, nda ése fame jia.

⁵ Ane a nga jô be na: Tebaʼan ôsu éwolo élate Nti, e Zambe wônan, mi kelek e teme Yordan, éyoñe te môt ase a toʼé akoʼo da a beʼe de étule jé yôp, avalʼane tañe menda Israél me né.

⁶ Amu jame te da ye bo ndem be mia. Eyoñe bone benan ba ye sili mia a akiti na: Mekoʼo ma ma liti jé mfaʼa wônan?

⁷ Mia ye yalane be na: Amu mendime ya Yordan me nga tyiʼi ôsu éwolo élate Nti, éyoñ é nga dañe Yordan, ane mendim me nga tyiʼi. Mekoʼo ma me ne ndem ya simesan biyoñ bise mfaʼa bone bʼIsraél.

⁸ Bone bʼIsraél be nga bo avale Yasua a nga bendé be. Be nga vaa mekoʼo awôm a mebaé ézezañe Yordan, avale Nti a nga jô Yasua, a avalʼane tañe menda yʼIsraél é né. Nalé be nga kee mekoʼo mete a bôé me e vôme ya meyôa.

⁹ Yasua a nga telé mekoʼo awôm a mebaé ézezañe Yordan, vôm mebo betuni be nga beʼe éwolo élat me nga tebe. Mekoʼo mete me ne valé a kui môse wu.

¹⁰ Betuni be nga beʼe éwolo be nji ke jôʼé nteban ézezañe Yordan, vʼakekui éyoñe mam mese Nti a nga bendé Yasua na a kate bôt me maneya boban, avalʼane Môze a nga bendé Yasua. Nalé bôt be nga jiʼa mane dañ.

¹¹ Eyoñe bôte bese be nga man, éwolo Nti a betuni be nga tebe bôt ôsu.

¹² Ane mvôʼô Ruben, nyô Gad a nyô éfas ayoñ Manasé be nga tebe Israél ôsu be beʼe biôm mewosan, avalʼane Môze a nga bendé be.

¹³ Be mbe bôte mewosan bebé toyini mewôm menyin, be nga lôt asu be Nti, be too nkômesan ya wosan, a mesu me lumu be mfaʼa minjeʼese ya Yérikô.

¹⁴ Môs ôte Nti a nga nene Yasua e mise mʼIsraél ase, ajô te be nga semé nye avale be nga semé Môze, nté ôse a nga vee.

¹⁵ Ane Nti a nga jô Yasua na:

¹⁶ Bendéʼé betuni be beʼe ngaa éwolo na, be kôlô Yordan été a bete kindik.

¹⁷ Nde Yasua a nga bendé betuni na kôlaʼane Yordan, mi bet e kindik!

¹⁸ Eyoñ betuni be nga beʼe éwolo élate Nti be nga kôlô teme teme Yordan a dañe dañ éyoñ be nga vaa mebo map mendim a telé me e nkôte si, nde mendim me Yordan me nga bulan e vôme wop a lôt avale me mbe me lôtôk e zañe kindiʼi ébaé.

¹⁹ Bôte bese be nga kôlô Yordan a bete kindik ngon ôsu ya mbu é too melu awôm, ane be nga tabe Gilgal, nné Yérikô mfaʼa jôp da tôô.

²⁰ Yasua a nga telé mekoʼo awôm a mebaé be nga toʼé Yordan e Gilgal.

²¹ Ane a nga jô bone bʼIsraél na: Éyoñe bone benan ba ye sili bʼésaa bap a akiti na: Amu jé mekoʼo ma?

²² Mia ye tyeñele bone benan a jô be na: Israél a nga dañe Yordan nyô mvelan.

²³ Amu Nti, e Zambe wônan, a nga vele ôsôé Yordan, a kui na mi dañe wô avale Nti e Zambe wônan, a nga bo évele mañ, nje a nga vele ôsu wongan a kui na bi mane dañ.

²⁴ Nalé a nga boban amu na meyoñ mese ya si nyô me yeme na wo Nti ô ne éwôlô, a na, mi ko Nti wônan woñe melu mese.