YASUA 24 - Bible en langue Bulu

Ekôan ya Sikem

¹ Ane Yasua a nga sulan meyoñ mese yʼIsraél e Sikem; ane a nga bañete fe bemvendé yʼIsraél, minlô mi bôte mié, betyiʼi mejô bé a bivet mewosane bié. Nde be nga sulan asu Zambe.

² Yasua a nga jô bôte bese na: Avale di nde Nti, Zambe yʼIsraél, a jô na: Bʼésoo benan, Téra, ésaa Abraham a ésaa Nakor, a nga too, aso nnôm éto, ôsôé Efrate yat, a kañe bezambe befe.

³ Ane me nga nyoñ ésoo wônan Abraham Efrate yat, a me nga wulu nye e si ése ya Kanaan; me nga bo na mvoñe bôte jé é bo abui, a me nga ve nye Izak.

⁴ Me nga ve Izak Esô a Yakob. Me nga ve Izak nkôle Séyir ô bo ngabe jé, ve Yakob a bone bé be nga siliki Ejipte.

⁵ Me nga lôme Môze baa Aron, a me nga bôm Ejipte a jam me nga bo ézezañe jé; éyoñe te me nga bo na mi kôlô wé.

⁶ Me nga bo na bʼésoo be kôlô Ejipte, a mi nga kui e mañ. Bôte yʼEjipte be nga tôñe bʼésoo évele mañ a bevagoñe bita, a bewulu bikabela.

⁷ Bʼésoo be nga yôn e be Nti, nde Nti a nga futi dibi e zañe jenan a bôte yʼEjipte; a nga bo na mendim me mañ me yandane be yôp: mise menan me nga yene jam me nga bo Ejipte, a mi nga tabe fé été ayap:

⁸ me nga kee mia e si Beamorééñ be nga too Yordan yat, a be nga wosane mia: me nga ve be e mo menan: mi nga nyoñe si jap, a me nga jiane be mise menan me lôô.

⁹ Balak, e mone Tipor, njô bôte ya Môab, a nga kôlô si a wosane Israél. A nga loone Balam, e mone Béor na a yoʼé mia.

¹⁰ Ve me nji ke kômbô vôʼôlô Balam: ane a nga viane botane mia, a me nga kôté mia e mo me Balak.

¹¹ Mi nga dañe Yordan a kui e Yérikô. Bôte ya Yérikô be nga wosane mia: Beamorééñ, Beférézieñ, Behévieñ a Beyébuzieñ: me nga ve be e mo menan,

¹² a me nga lôme memvam ôsu vienan, memvam mete me nga titane be be ke mia ôyap. Bejô bôte bebaé bete ya Beamorééñ. Nalé ate a nga boban, saake amu nkpwaté mekône wônan, nge élaé jenan.

¹³ Me nga ve mia si, e vôme mi nji ke wu njuk, bitison mi nji ke lôñ, ve mi too été, mefube mindik a beôlivié mi nji ke bé, ve mia di bie.

¹⁴ Ajô te, éyoñe ji, koone Nti woñ, a saane nye te meduʼan, ve a ndi nlem ése. Mia yiane vaa bezambe bʼésoo be nga saane be Efrate yat a Ejipte, ve boʼone Nti bisaé.

¹⁵ A nge mi nji simesane na mia yiane saane Nti, toban, e môse wu, môt mia kômbô saane nye, nge bezambe bʼésoo be nga saane be Efrate yat, nge bezambe Beamorééñ ya mi too si jap: ve ma, a nda jam, bia ye saane Nti.

¹⁶ Nde bôt be nga yalane na: Ôsimesane te ô kele bia ôyabe na bi liʼi Nti a bo bezambe befe bisaé!

¹⁷ Amu Nti a ne e Zambe wongan, nye a nga bo na bi kôlô Ejipte, nda belo, bia bʼésaa bangan, Nye a nga bo bitua bi mame bi, mise mañgan me lôô, Nye fe a nga baʼale bia, nté dulu ôse bi nga wulu, a ézezañe meyoñ mese bi nga tulan e zañ.

¹⁸ A nga titan meyoñ mese a Beamorééñ be too si éte ôsu viangan: ajô te bia fe bia ye bo Nti bisaé, amu a ne e Zambe wongan.

¹⁹ Nde Yasua a nga jô bôte na: Mi se nguleya saane Nti, amu a ne e Zambe a ne étyi, e Zambe a ne aban , a ye bo te jibi abé denan a mbia nlô wônan.

²⁰ Eyoñe mia ye liʼi Nti, a bo bezambe ya meyoñe mefe bisaé, a ye kôñelan a bo mia abé , a jiane mia éyoñ a tatéya mane bo mia mvaé.

²¹ Bôt be nga jô Yasua na: Teke bebé! Amu bia ye saane Nti.

²² Nde Yasua a nga jô bôte na: Mi ne bengaa ya boʼolô miabebiene na: Miabebien mia te tobe Nti na mia bo nye bisaé. Be nga yalane na: Bi ne bengaa.

²³ Yasua na: A ntoo ñhe ve vaane bezambe ya meyoñ mefe be ne ézezañe jenan, a vite minleme mienan ve be Nti, e Zambe Israél.

²⁴ Ane bôte be nga yalane Yasua na: Bia ye bo Nti, e Zambe wongan bisaé, a bia ye bo tyiñe jé mewôk.

²⁵ Ane Yasua a nga bo élat môs ôte baa be bôt; nde a nga titi be metiñ a memvinda e bituu, e Sikem.

²⁶ A nga tili mam mete mese e kalate metiñe me Zambe. A nga nyoñe beta akok a telé de élôn é mbe vôm a nʼétyi Nti si.

²⁷ Nde Yasua a nga jô bôte bese na: Mi lôô akoʼo di, da ye bo ngaa ya boʼolô mia, amu e maneya wôʼô mejô mese bia be Nti bia te kobô; da ye bo ngaa a boʼolô mia, nalé ate mia ye bo te kate Zambe wônan.

²⁸ Eyoñe te Yasua a nga suu bôt, môt ase a kele e vôme wé.

Awu Yasua

²⁹ Eyoñ mam mete me maneya, Yasua, mona Nun, mbo ésaé Nti, a nga wu a too mimbu ntet a awôme da.

³⁰ Nde be nga jame nye éfuse si jé, e Timnat-Séra, e minkôle mi Efrayim, e nkôle Gas akôé.

³¹ Israél a nga saane Nti nté ôse Yasua a nga vee, a nté ôse bemvendé be nga liʼi e mvuse Yasua, be yeme fe ésaé ése Nti a nga bo asu Israél be nga vee.

³² Be nga jame bivese bi Yôsep, mbie Israél a nga soo bie Ejipte e Sikem, abôta si Yakob a nga kus e be bone bʼAmor, ésaa Sikem, tañe ntete Kesita, a abôta te e nga nyiin e ngabe sii bone be Yôsep.

³³ Eléazar, monʼAron, nye fe a nga wu, be nga jame nye e nkôle Finéas, mone wé. Be nga ve nye nkôle te a minkôle mi Efrayim.