YASUA 23 - Bible en langue Bulu

Yasua a lebʼIsraél

¹ Ayabʼéyoñ e nga lôt, ataté éyoñ Nti a nga ve Israél awoʼon a kôté nye e mo besiñ be nga bômane nye. Valé Yasua a ntoo nnôm a mvendé môt.

² Ane a nga bañete Israél ase: bemvendé bé, minlô mi bôte mié, betyiʼi mejô bé a bivete bié ya mewosan. Nde a nga jô be na: Me ntoo nnôm a mvendé môt.

³ Mia mi nga yene mam mese Nti, e Zambe wônan, a nga bo meyoñ mana mese amu mia. Amu Nti, e Zambe wônan, nye a nga wosan e señe jenan.

⁴ Mi lôô, a asimba , me maneya ve mia meyoñ me liʼiya ma na mi nyoñe me ane ngap, avalʼane meyoñ menan me né, ataté Yordan a meyoñ mese me nga jian, a kui mañ me ne anen, mfaʼa jôp da dim.

⁵ Nti, e Zambe wônan, a ye tindi me me ke mia ôyap, a wôlé be mesi map ôsu vienan; mia ye nyoñe si jap avale Nti, e Zambe wônan, a nga jô mia.

⁶ Ve jeñan a ngulʼése ya baʼale a bo mam mese me ne ntilan e kalate metiñe Môze, te ke nye fefel mfaʼa ya mbo nnôm, nge mbo ngal,

⁷ nalé mia ye bo te bundan a meyoñ mia be be mi too mana. Mia ye bo te tote jôé bezambe bap, nge belane de e mengana menan été. Mia ye bo te kañe be, nge kute be meboñe si.

⁸ Ve mia ye kabetan a Nti, e Zambe wônan, avale mi boya a kui e môse wu.

⁹ Nti a nga wôlé meyoñ me ne anen a ngul mesi mi lôô ma: a kui den, teke môt a tebeya, nge vo mia.

¹⁰ Môte wua ya be mia a nga kui na, a titane bôte toyini: amu Nti, e Zambe wônan, a nga wosan asu denan, aval a nga jô mia.

¹¹ Ajô te, tabaʼane ñhe ntyel, a nyeʼe Nti, e Zambe wônan.

¹² Nge mia yale feñ, a timbi a meyoñ mevoʼo mia be be mi too ma, nge mia lat a me ajô meluk, a nge mia bundan a me,

¹³ tukaʼa yemane na, Nti, e Zambe wônan, a ye bo te ke ôsu a wôlé meyoñ mete mesi ôsu vienan. Ve meyoñ mete ma ye bo mia avot a ôlam, nkasa wo bibi mia mevel, a biyo e mise menan été: akekui mia ye jañ e mbamba si Nti, e Zambe wônan, a veya mia.

¹⁴ Mi lôô, ma ke den, e vôme jôm ése é ne si ja ke. Mia yem a nleme wônan ôse, a ényiñe jenan ése na: Teke ajô da ya mbamba mejô mese Nti, e Zambe wônan, a nga kobô mia e nga bo te bo ésaé: mese me maneya tôéban asu denan, teke da e liʼiya te bo ésaé.

¹⁵ Ve yemane na: Avale mbamba mejô me Nti, e Zambe wônan, a nga jô mia, me maneya tôéban asu denan, nalé fe Nti a ye tôé ayaa ese e nyôle jenan, akekui a maneya jiane mia e mbamba si Nti, e Zambe wônan, a veya mia nyô.

¹⁶ Nge mia tyam élate Nti, e Zambe wônan, a nga yôtan asu denan, nge mia ye kañe bezambe befe a kute meboñe menane si ôsu viap, ayaa Nti da ye yôñ e nyôle jenan, a mia ye jiʼa jañ e mbamba si a veya mia.