YASUA 22 - Bible en langue Bulu

Ataʼa metunaʼa e Yordan yat

¹ Yasua a nga loone bone be Ruben, ba be Gad a ba bʼéfas ayoñe Manasé,

² a jô be na: Mi nga bo e jam ese Môze, mbo ésaé Nti, a nga bendé mia, a mi nga bo tyiñe jam mewôk mfaʼa ya jam ese me nga bendé mia,

³ den melu abui, mi nji ke liʼi bobenyoñ, a mi nga bo abendé Nti, e Zambe wônan, a nga bendé mia.

⁴ Amu Nti, e Zambe wônan, a veya bobenyoñ benan awoʼon avale a nga jô: mi ntoo nguleya bulan e menda bindelé menan, e mfaʼa si jenan é né, nje Môze, mbo ésaé Nti, a nga ve mia e Yordan yat.

⁵ Bômbaʼan évévé ya bo abendé a atiñe Môze, mbo ésaé Nti, a nga bendé mia, mia yiane nyeʼe Nti, e Zambe wônan, wulaʼan e mezene mé mese été: boʼon mebendé mé, kabetaʼan a nye, a saane nye a nleme wôé ôse a nyôle jôé ése Nge na a ényiñe jôé ése, nalé éfia néfes, nkobô beyude, ja liti fe.

⁶ Nde Yasua a nga botane be a suu be be ke: nalé be nga ke e menda bindelé map.

⁷ Môze a nga ve éfas ayoñe Manasé ngap e Basañ, wôna a nga ve éfas évoʼo ngap e Yordan yat, mfaʼa jôp da dim. Eyoñ Yasua a suuya be be ke e menda bindelé map, a nga botane be,

⁸ a jô be na: Bulaʼan e menda bindelé menan a abui akum, abui mimbam biyem, abui moné, or, mvot, étyé a mengômesan, mia be bobenyoñ mi kabaʼane biôm mi nga sa besiñe benan.

⁹ Ajô te bone be Ruben, ba be Gad a ba bʼéfas ayoñe Manasé, be nga bulane valé, be kandaneya bone bʼIsraél bevok e Silô, si ya Kanaan, be kelek e si ya Galad, nyô be nga nyoñe ngap, avalʼane Nti a nga bendé a anyu Môze.

¹⁰ Eyoñ be nga kui mefôla me Yordan ma wôʼa si ya Kanaan, nde bone be Ruben, ba be Gad a ba éfas ayoñe Manasé be nga lôñ ataʼa metunaʼa e Yordan. Ataʼa metunaʼa te e mbe beta jôme ya yen.

¹¹ Bone bʼIsraél bevok be nga wôʼô na bone be Ruben, ba be Gad, a ba bʼéfas ayoñe Manasé be lôñeya ataʼa metunaʼa te, zôsôô a si ya Kanaan, mefôla me Yordan me ne éfase bone bʼIsraél.

¹² Eyoñe bone bʼIsraél be nga wôʼô jame te, nde bôte bese be nga sulan e Silô a ke wosane be.

¹³ Bone bʼIsraél be nga lôme Finéas, e mone Eléazar, ntuni , e be bone be Ruben, Gad a éfas ayoñe Manasé,

¹⁴ baa be bivet awôm be nga ke, nda bôt ése évete jia, mfaʼayoñ ese ya meyoñ yʼIsraél; bese be mbe minlô ya menda me bôte map, ézezañe betoyini yʼIsraél.

¹⁵ Nde be nga ke e be bone be Ruben, Gad a éfas ayoñe Manasé, e si ya Galad, a kobô na:

¹⁶ Avale di nde ékôane bôte Nti ése ja jô na: Melo mi boya Zamba Israél ma ma tinan aya, amu mi lumeya Nti mvus, a lôñe ataʼa metunaʼa, mfaʼa ya bene njôane Nti môse wu?

¹⁷ Ye abé Péor e ne mone jam e mfaʼa wongan, a too ke na, a kui môse wu, bi ngenan te tuneban mfaʼa ya mbia jam ate, a mbia ébubua a nga suan ayoñe Nti e zañ!

¹⁸ Ve den mi beteya lume Nti mvus! Nge mia bene Nti den, akiti a ye wôʼô ngum ayoñ Israél ôse ôlun.

¹⁹ Nge si é ne ngabe jenan é nji ke bo mfuban , a ntoo ñhe ve kean e si é ne ngabe Nti, e vôm étabaʼa jé é né, éyoñe te mia bi ngap ézezañe jangan, ve te benane njôane Nti, a te kubane bia nyô, a lôñ ataʼa metunaʼa e too te di Nti, e Zambe wongan.

²⁰ Eyoñ Akan, e mone Zéra, a nga bo nalé mfaʼa ya jôm é mbe na ja yiane jañ, Israél ase a nga tôban ayaa Nti. Sa nyʼétam a nga wu amu mbia mboone wé.

²¹ Bone be Ruben, ba be Gad a ba bʼéfas ayoñe Manasé be nga yalane bivet betoyini yʼIsraéle na:

²² Zambe, Zambe, Nti, Zambe, Zambe, Nti, nyʼétam a yem! A Israél nye fe a ye yeme de! Nge amu mbenane njôan, nge melo e mfaʼa Nti, te nyii bia e môse wu!

²³ Nge bi nga lôñʼataʼa metunaʼa asu ya ngaa a mimvean, nge asu ya bo mimvean ya late Zambe ngbwa, Nti Emien a siliʼi bia sitoʼo yʼété!

²⁴ Bebela na, jame te e nji ke bo ane mia simesan; ve bi nga bo de, amu bi nga bili biyebe, a simesane na: A akiti, bone benan be za jô émbangane na: Élat évé é ne e zañe jenan a Nti, e Zamba Israél?

²⁵ Nti a nga bôôé Yordan nné e zañe jangan a mia, bone be Ruben a bone benan, nde émbangan ba ye bo te beta ko Nti woñ.

²⁶ Ajô te bi nga jô biabebiene na: Mboʼon ésaé a lôñe ataʼa metunaʼa, saa kik asu mimvean mi ne ngum nge asu metunaʼa,

²⁷ vʼavalʼane ngaa e zañe jangan a mia, nalé fe e zañe bone bangan éyoñ bi maneya wu, bi kañe Nti ôsu vié a mimveane miangan mi ne ngum, biyem biangan bia ye ve a mimveane miangan ya late Zambe ngbwa: nalé bone benan ba ye bo te jô émbangan a akiti na: Ngap é nji ke bo mia e be Nti!

²⁸ Bia te jô na: Nge ba kobô bia avale nkobô te a akiti, nge kobô de e be bone bangan, bia ye yalane na: Yenan éveʼela ataʼa metunaʼa Nti, nje bʼésaa bangan be nga bo, saa ke amu mimvean mi ne ngum nge metunaʼa, ve avalʼane ngaa e zañe jangan a mia.

²⁹ Ajô te e nji ke bo bebé e be bia na bi bene njôane Nti nge lume nye mvuse den, amu nlôñan ataʼa metunaʼa, asu mimvean mi ne ngum, asu zesé mimvean, nge asu mimvean ba ve ane metunaʼa e fefelʼataʼa metunaʼa Nti, e Zambe wongan, nyô a ne ôsu yʼétabaʼa jé!

³⁰ Eyoñe Finéas, ntuni , nalé fe bivete ya ayoñ a minlô betoyini yʼIsraél ba be be nga too, be nga wôʼô mejô me bone be Ruben, Gad a éfas ayoñe Manasé be nga kobô, be nga vak.

³¹ Nde Finéas e mone Ntuni Eléazar, a nga jô bone be Ruben, Gad a éfas ayoñe Manasé na: Bia yeme dene na Nti a ne ézezañe jangan, amu mi nji ke sebʼétome ji mfaʼa Nti, a amu nalé, mi kôtéya bone bʼIsraél e wo Nti.

³² Finéas, e mone Ntuni Eléazar, a bivet, be nga kôlô e be bone be Ruben, Gad, a éfas ayoñe Manasé, si ya Galad, a bulan e si ya Kanaan, e be bone bʼIsraél, a kate be foé.

³³ Ane bone bʼIsraél be nga vak amu foé éte: nde be nga botane Zambe, a be nji fe beta kobô ajô ya ke bita, a jiane sii bone be Ruben, a bone be Gad be nga too.

³⁴ Nde bone be Ruben a bone be Gad be nga yôlé ataʼa metunaʼa te jôé be jôʼô na: Ataʼa metunaʼa di e ne ngaa e zañe jangane na Nti a ne Zambe.