YASUA 21 - Bible en langue Bulu

Bitison mewôm menyin a muam bi bone be Lévi

¹ Ane betebʼôsu ya menda me bôt me bone be Lévi be nga zu e be ntuni Eléazar, Yasua e mone Nun, a bivete menda me bôte ya meyoñ yʼIsraél.

² Nde be nga kobô be e Silô, si ya Kanaan a jô na: Nti a nga bendé a anyu Môze na be ve bia bitison ya tabe, a mefôla yʼété asu mimbame betite miangan.

³ Nde bone bʼIsraél be nga ve mvôʼô Lévi bitisone bina a mefôla yʼété, bi soʼo e ngabe si jabʼété, avalʼane Nti a nga bendé.

⁴ Be nga bo asimba asu menda me bôte Bekeyatit. Wôna e mvôʼô Lévi été, bone bʼAron be nga nyoñe bitison awôm a bilaa a mboon asimba , bi soʼo e Yuda été, Siméoñ a Bényamin.

⁵ Bone be Keyat bevoʼo fe, a mboon asimba , be nga nyoñe bitison awôm, bi soʼo Efrayim, Dañ a éfas ayoñe Manasé.

⁶ E Basañ, a mboon asimba , bone be Gerson be nga nyoñe bitison awôm a bilaa, bi soʼo Isakar, Azér, Néftali a éfas ayoñe Manasé.

⁷ Bone be Mérari, avalʼane mebume map me né, be nga nyoñe bitison awôm a bibaé, bi soʼo ayoñe Ruben, Gad a Zabuloñ.

⁸ A mboon asimba , bone bʼIsraél be nga ve mvôʼô Lévi bitisone bite a mefôla map, avalʼane Nti a nga bendé a anyu Môze.

⁹ Môé bitison bi nga nyoñeban e Yuda a Siméoñ,

¹⁰ a veban e be bone bʼAron, e menda me bôte Keyat, mvôʼô Lévi, amu mbe asimba e nga taté liti,

¹¹ môé mete ma: Kiryat-Arba nye a ne Ebroñ nkôle Yuda a mefôla ma bômane nye. Arba a mbe ésaa Anak.

¹² Ve Kaléb a nga nyoñe mefube yʼété a minlame mié.

¹³ Be nga ve bone bʼAron, ntuni , tison ya sobô asu bewôé bôt, Ebroñ a mefôla mé, Libna a mevôm ma bômane nye.

¹⁴ Yatir a mefôla ma bômane nye; Estemon a mefôla ma bômane nye.

¹⁵ Olôn a mefôla ma bômane nye; Debir a mefôla ma bômane nye.

¹⁶ Ayin a mefôla ma bômane nye; Yuta a mefôla ma bômane nye; Bétsemék a mefôla ma bômane nye: bitison ébu, bi soʼo e be meyoñ mete mebaé.

¹⁷ Bitison bi nga nyoñeban e Bényamin kik, mbie bi: Gabaoñ a mefôla ma bômane nye; Géba a mefôla ma bômane nye;

¹⁸ Anatot a mefôla ma bômane nye; Almôn a mefôla mé: bitison binyin.

¹⁹ Betuni, bone bʼAron, be nga nyoñe bitison awôm a bilaa a mefôla ma bômane bie.

²⁰ Mvôʼô Lévi, be mbe ba ya bone be Keyat, bevok be nga nyoñe bitison yʼEfrayim a asimba .

²¹ Be nga ve be tison bewôé bôt be ne sobô: Sikem a mefôla mé; Gézér a mefôla mé e minkôle mi Efrayim.

²² Kibsayim a mefôla mé, nalé fe Bétôroñ a mefôla mé: bitison binyin;

²³ bitison bi nga nyoñeban e Dañ: Elteké a mefôla mé; Gibeton a mefôla mé;

²⁴ Ayalôn a mefôla mé, nalé fe Gat-Rimôn a mefôla mé: bitison binyin.

²⁵ Mfaʼa éfas ayoñ Manasé: Taanak a mefôla mé. Gat-Rimôn a mefôla mé: bitison bibaé.

²⁶ Bitison bise bi mbe awôm a mefôla map mbie bi nga veban e be mebume me bone be Keyat bevok.

²⁷ Ngab é nga nyoñeban e bʼéfas ayoñe Manasé, a veban e be bone be Gerson ya mvôʼô Lévi nje nyô: Gôlañ, e Basañ, a mefôla mé, a too tison bewôé bôt be ne nguleya sobô, nalé fe Biktra a mefôla mé: bitison bibaé;

²⁸ bitison bi nga nyoñeban e be mvôʼô Isakar: Kisiôn a mefôla mé; Dabrat a mefôla mé.

²⁹ Yarmut a mefôla mé, nalé fe Eyin-Ganim a mefôla mé: bitison binyin;

³⁰ bitison bi nga nyoñeban e be Azér: Miseal a mefôla mé; Abdôn a mefôla mé,

³¹ Elkat a mefôla mé, nalé fe Reyôb a mefôla mé: bitison binyin.

³² Bitison bi nga nyoñeban e be Néftali: tison bewôé bôt be ne nguleya sobô: Kédés, e Galilé, a mefôla mé; Amôt-Dor a mefôla mé, nalé fe Kartañ a mefôla mé: bitison bilaa.

³³ Bitison bi bone be Gerson, avalʼane menda me bôte map me né, bise bi mbe awôm a bilaa.

³⁴ Mvôʼô Lévi be nga liʼi, ba ya menda me bôte me Mérari, be nga ve be bitison bi nga nyoñeban ana: Yôknam a mefôla mé, Karta a mefôla mé,

³⁵ Dimna a mefôla mé, nalé fe Nayalal a mefôla mé: bitison binyin;

³⁶ bitison bi nga nyoñeban e be Ruben: Bétzér a mefôla mé; Yatsa a mefôla mé,

³⁷ Kedémôt a mefôla mé, nalé fe Méfat a mefôla mé: bitison binyin.

³⁸ Bitison bi nga nyoñeban e be Gad: tison bewôé bôt be ne sobô: Ramôt ya Galad a mefôla mé; Mayanayim a mefôla mé,

³⁹ Hesboñ a mefôla mé, nalé fe Yazér a mefôla mé: ase bitison binyin.

⁴⁰ Bitison bise bi nga veban e be bone be Mérari, avalʼane mebume map me né, be too mebukaʼa ya mvôʼô Lévi, bi mbe awôm a bibaé.

⁴¹ Bitisone bise mvôʼô Lévi be nga nyoñ ézezañe bone bʼIsraél bi mbe mewôm menyin a muam, a mefôla map.

⁴² Tison ése yʼété é nga bili mefôla ma bômane je: avale te é mbe mfaʼa bitison bite bise.

⁴³ Avale di nde Nti a nga ve Israél si ése a nga kane ngana na a ye ve bʼésaa bap; ane be nga nyoñe je a tabe été.

⁴⁴ Ajô te Nti a nga ve be awoʼon e mefôla mese ma bômane be, avale a nga kane ngana e be bʼésaa bap: teke wua ya besiñe bap a mbe nguleya tebʼasu dap, a Nti a nga ve besiñe bap bese e mo map.

⁴⁵ Mbamba mejô mese Nti a nga kobô asu Israél, teke da yʼété e nga selan: mese me nga tôéban.