YASUA 20 - Bible en langue Bulu

Bitison bisaman ya sobô

¹ Nti a nga kobô Yasua na:

² Kobôʼô bone bʼIsraél na: Telaʼan e mfaʼa wônan, bitison ya sobô, mbie me nga kobô mia a anyu Môze.

³ Môt a ye vañe wôé môt, nge wôé nye e fuʼan, a ne nguleya tup a ke wé. Bitison bite bia ye bo mia mevôme ya sobô nkune metyi.

⁴ Ñwôé bôt a ye mate, a ke e tisone jia yʼété; a ye tebe anyiine mbé ya tison, a kañete bemvendé ya tison éte e jam a bili; éyoñe te ba ye nyoñe nye e fefele jap, e tison été, a ve nye vôme ya tabe baa be be e tison été.

⁵ Nge nkune metyi a tôñe nye, bemvendé ba ye bo te kalane ñwôé môt e mo mé: amu a nga wôé môt a ne nye bebé e fuʼan, amu a nji tame taté bo nsiñe wé.

⁶ A ye tabe e tison été akekui a tebeya asu betyiʼi mejô ya ayoñ, a ke fe kui éyoñe Monti ntuni a bo bisaé melu mete a wuya. Eyoñe te nje ñwôé môt a ye kôlô a bulan e tisone jé a e nda jé, e tison vôm a nga tup.

⁷ Nde be nga telé Kadés e Galilé, nkôle Néftali; Sikem nkôle Efrayim, a Kiryat-Arba a ne Ebroñ, nkôle Yuda.

⁸ E Yordan yat, mfaʼa jôp da tôô, be nga telé Yérikô; mfaʼa ya nkôte si, e njeʼese ayoñe Ruben, be nga telé Besér; Ramôt mfaʼa ya Galad, ayoñe Manasé été.

⁹ Bitisone bi, mbie bi nga teléban asu bone bʼIsraél bese, a asu ntabe ô too ézezañe jap. Nalé nyô ase a ne wôé môt e fuʼan a ne mate, a ke sobô été, a bo te wu e mo me nkune metyi, éyoñ a ngenan te tebe asu betyiʼi mejô ya ayoñ.