YASUA 2 - Bible en langue Bulu

Belooé si bebaé ba ke e Yérikô

¹ Melu me lôteya, ane Yasua mona Nun a nga lôme bôte bebaé asoé be kôlôʼô Sitim a jô be na: Kelan mia fombô si a dañe dañ tison Yérikô. Nde be nga ke a nyiine nda minga ébamba jôé na Rahab. Ane be nga bômbô valé.

² Ajô te be nga kate njô bôte ya Yérikô na: Bôt ba te so e be bone bʼIsraél a alu na be looé si.

³ Nde njô bôte ya Yérikô a nga lôme Rahab tyiñe na a kuli bôt be nga nyiine nda jé atan, amu be nga so na ba zu looé si ya Kanaan ése.

⁴ Ve Rahab a nga nyoñe bôte bete bebaé a solé be, nde a nga yalane na: Bôt ba te foʼo nyiine nda jam, ve me nji yem e vôm ba te so.

⁵ Ba te fe kui atan e dibi été, éyoñ ba dibe mbé akaʼa ya tison, me teke yem e vôm ba te ke: boʼon avôle ya tôñe be, mi koone be.

⁶ Ve Rahab a nga bo bôte bana na be bet andile ya nda jé yôp, a solé be e mintemba mi ésombé mié si.

⁷ Nalé bôt be nga tôñe be mfaʼa zen ja ke e Yordan akekui mimbale ya été. Be ngenan be nga ke, nde mbé akak ô nga diban e mvuse jap.

⁸ Te na belooé si be bômbô si, Rahab a nga bete vôm be nga too andile yôp,

⁹ a jô be na: Ma yeme na, Nti a veya mia si nyô. E woñe bôt bese ba ko mia ô biya fe bia, a bôte bese ya si jañgan be biliya atek asu denan.

¹⁰ Amu bi nga wôʼô na Nti a nga kôtô évele mañ ôsu vienan éyoñ mi nga kôlô Ejipte, a wôʼô fe avale mi nga bo bejô bôte bebaé ya Beamorééñ be nga too Yordan yat: Sioñ a Og, mbe mi nga jian ne meñ.

¹¹ Eyoñ bi nga nyoñe foé éte, ane befôʼôfôʼô a benyeñenyeñ be nga bi bia, môt ase a nga ko ko woñ ya beta kuli mvebe wé, amu Nti, e Zambe wônan a ne nyô a dañ ôyabe yôp, a nyô a dañ ôyabe si.

¹² Eyoñe ji kanan me ngana a jôé Nti na, mia ye mvamane nda bôt ésaa wom, avale ma fe me mvamaneya mia. A mia ye ve ma ndem me ne tabe je ndi

¹³ na mia ye nyii ésaa wom, nyia wom, bobenyañe bam, bekale bam a jôm ése é ne énjap, a na mia ye kamane bia bi bo teke wu.

¹⁴ Ajô te bôte bete be nga jô nye na: Bi ne nkômesane ya dimili jaʼana binyiñe biañgan amu ajô denan, nge mia bo te kulan e jam bia tiñeti zañe bia be mia. Eyoñe Nti a ye ve bia si nyô, bia ye liti nyeʼane wongan e be wo a mvamane wo.

¹⁵ Nde a nga daa be e vundi, a suu be si a nko, amu nda jé é mbe e fefele akak, nne a mbe a too valé.

¹⁶ Ane a nga jô be na betan e mfaʼa ya nkô, nge nalé momo, wôna bôt ba te tôñe mia ba ye koone mia. Eyoñ mia ye kui nkô, mia yiane sobô tañe melu mela akekui éyoñ e bôt ba te tôñe mia ba ye bulan, mvuse ya valé mia ye suʼulane tôñe zene jenan.

¹⁷ Ane bôte bete be nga jô nye na. Avale di nde bia ye tôé jam bi maneya tiñeti wo:

¹⁸ éyoñ bia ye suane va, nyoñ évele nkole ji a tiñeti je e vundi wo te daa bia, a tooé ésoo, nyua, bobenyoñ a nda jôé ése vôme wua.

¹⁹ Môt ase a ye telé mebo mbé yôp ya nda jôé na a kui atan, metyi mé ma ye bebe e nlô wé émiene yôp, a bia ye bo teke bijô! Ve nge môt a same wo a nnambe wua ya bôt mia be be mi too nda jôé été, metyi me môt ate ma ye bebe e minlô miañgane yôp.

²⁰ Nge wo kulane jam bi maneya tiñeti di, bia ye bo te bijô mfaʼa ya ngana bi maneya kane nyô nge bia tyame je!

²¹ Ane Rahab a nga yalane be na: E boʼok avalʼane mi maneya tiñeti! Nde a nga suu be be ke: ane be nga ke. A a nga tiñeti évele nkole vundi.

²² Nde be nga ke a kui nkôl a tabe wé melu mela, akekui éyoñ bôt be nga tôñe be be nga bulan. Bôt be nga tôñe be be nga jeñe be e zene zen , ve teke yene be.

²³ Nde belooé si bebaé be nga suʼulane sise nkôle si a dañe Yordan. Ane be nga kui e be Yasua, mona Nun, a kañete nye mam mese me nga kui e be be.

²⁴ Ajô te be nga jô Yasua na: Bebela a ne na, Nti a kalaneya si ése e mo mangan, amu na bôte bese be too été ba nyeñeban ôsu viangan.