YASUA 13 - Bible en langue Bulu

Nkabane si; abendé ya kabane si

¹ Eyoñe te Yasua a ntoo nnôm amu abui mimbu, Nti a nga jô nye na: Ô ntoo nnôm, a si ja yiane nyoñeban é ngenan étua anen.

² Ngabe si é liʼiya nje nyô: mefôla mese Befilisteñ be too; si Begézurieñ ése

³ ataté ôsôé Sior wo lôt Ejipte ôsu a kui nné Ekroñ mfaʼa ya akôé, éfuse si ja yiane wôk a Bekananééñ, ve bejô bôt betane ya Befilisteñ mbe be too été: nyô ya Gaza, nyô ya Asdôd, nyô ya Askalôn, nyô ya Gat a nyô ya Ekroñ; Beévieñ fe be too été.

⁴ Mfaʼa ya nké: si ése Bekananééñ be bili a Méara a ne si Besidônieñ, a kui Afék a nné Beamorééñ;

⁵ si Begibilieñ, a Libañ ase mfaʼa jôp da tôô, ataté Bal-Gad a ne nkôle Ermone si, a kui anyiine Amat;

⁶ bôte bese be too minkô, ataté Libañ a kui Misrefôt-Mayim, Besidônieñ bese, ma ye wôlé mesi map asu bone bʼIsraél. Ve wo ye ve Israél mesi mete mese ane ngap a mboon asimba avale me nga bendé wo.

⁷ A a ntoo ve kabe si nyô éyoñe ji a ve je ane ngap e be meyoñ ébu a éfas ayoñ Manasé.

⁸ Bone be Ruben, ba be Gad a éfas ayoñ Manasé be nga nyoñe ngabe jap, nyô Môze a nga ve be Yordan yat mfaʼa jôp da tôô; a avalʼane Môze, mbo ésaé Nti, a nga ve be je:

⁹ ataté Aroér a ne nsaʼa ôtôñ Arnon, a ataté tison é ne ézezañe mbiʼili, afôla si ese ya Médeba a kui Dibôn,

¹⁰ bitisone Sioñ njô bôte Beamorééñ a mbe a jôʼô Hesboñ, bise a kui minné mi bone bʼAmon;

¹¹ Galad, si Bezurieñ a Bemakatieñ, nkôle Ermon ôse a Basañ ase, a kui Salka.

¹² Ejôé Ôg ése ya Basañ, nye a nga jôô Astarôt a Edré, a nye a mbe wua ya Berefayim be nga liʼi. Môze a nga bôé bejô bôt bete a wôlé mesi map.

¹³ Ve bone bʼIsraél be nji ke wôlé mesi Begézurieñ a ba Bemakatieñ: ajô te be nga tabe ézezañe jap a zu kui môse wu.

¹⁴ Ayoñe Lévi étam nde e nga liʼi te nyoñe ngap; ngabe jé é mbe ve mimvean mia diʼibane nduan asu Nti, e Zambe Israél avalʼane e nga jôbane be nye.

Nkabane si Yordan yat mfaʼa jôp da tôô

¹⁵ Môze a nga ve ayoñ Ruben ngap avalʼane mebume map me né.

¹⁶ Be nga nyoñe si ataté Aroér, nsaʼa ôtôñ Arnon a tison é ne ézezañ mbiʼili, si ése é ne bebé Médeba.

¹⁷ Hesboñ a bitison bié bise bi ne njeʼese: Dibôn Bamôt-Bal, Bét Bal-Méôn,

¹⁸ Yatsa, Kédémôt, Méfat,

¹⁹ Kiriyatayim, Sibma, Sérét. Asaar nkôle ya mbiʼili yôp,

²⁰ Bét Ayesimôt;

²¹ bitison bise ya njeʼese a éjôé Sioñ, njôô Beamorééñ a nga jôô Hesboñ, ése; Môze a nga bôé nye, émien a bivete ya Madian: Evi, Rékém, Sur, Ur a Réba, be mbe éjôé Sioñe si, be too fe si éte.

²² Mbo bemviʼi, jôé na Balam mona Béor, a mbe wua ya bôte bone bʼIsraél be nga bôé a nkpwaté mekôn.

²³ Nnéa sii Ruben a mbe ôsôé Yordan a kindiʼi jé. Ngabe bone be Ruben nje le, avalʼane mebume map me né, e ne na: Bitison a minlame miap.

²⁴ Wôna Môze a nga ve Gad a bone bé ngap avalʼane mebume map me né.

²⁵ Be nga nyoñe ngabe si avale di: Yazér, bitison bise ya Galad, éfase si bone bʼAmon a kui Aroér, bebé a Raba.

²⁶ Ataté Hesboñ a kui Ramat-Mispé a Bétônim, ataté Maanayim a kui nné ya Debir,

²⁷ mfaʼa mbiʼili Bét-Aram, Bét-Nimra, Sukôt a Safôn, mebukaʼa ya éjôé Siôñ, njô bôte ya Hesboñ, Yordan a mefôla mé, a kui akuʼu mañ me Kinérét, mfaʼa jôp da tôô Yordan yat.

²⁸ Ngabe bone be Gad nje le: bitison a minlame miap, avalʼane mebume map me né.

²⁹ Môze a nga ve fe éfas ayoñ Manasé a bone bé ngap avalʼane mebume map me né:

³⁰ be nga nyoñe ngabe si avale di: ataté Manayim, Basañ ase, éjôé Ôg, njô bôte ya Basañ, ése, a beta bitison bi ne Yayir mfaʼa ya Basañ: bitison mewôm mesaman.

³¹ Efase Galad, Astarôt a Edré, bitison ya éjôé Og njô bôte ya Basañ, bi nga veban be bone be Makir e mone Manasé a e be éfase bone be Makir, avalʼane mebume map me né.

³² Ngabe Môze a nga ve nje le: minjeʼese ya Môab mfaʼa Yordan yat e jôp da tôô, bebé a Yérikô.

³³ Môze a nji ke ve ayoñe Lévi ngap; ve ngabe jé é mbe Nti, Zamba Israél, aval Emien a nga jô nye.