YASUA 11 - Bible en langue Bulu

Beta bita bebé mendim me Mérôm Mewosan mfaʼa ya akôé a mfaʼa mebukaʼa mevoʼo ya si

¹ Eyoñe Yabin njô bôte ya Asor a wôʼôya foé nyô, a nga lôme minlôman e be Yôab njô bôte ya Madon, nalé fe e be Simron a e be nyô ya Aksaf,

² e be bejô bôt be too minkô mfaʼa ya akôé, ba be too Araba, Kinarôt mfaʼa ya nké, ba be too si é ne njeʼese a ba be ne mfaʼa jôp da dim, mefôla ya Dor,

³ e be Bekanéeñ be too mfaʼa jôp da dim, e be Beamorééñ, e be Beétieñ, e be Beférézieñ, e be Beyébuzieñ be too minkô, e be Beévieñ be too nkôle Ermone si, si ya Mispa.

⁴ Bese be nga kui atan a minsamba mewosane miap; be mbe abui ane nselek ô ne abui e nsaʼa mañ, bikabela a bevagoñ bita babe fe be too étua abui.

⁵ Nalé bejô bôt bete bese be nga bo akôna a vule minkan bebé mendim me Merôme na be wosane Israél.

⁶ Ane Nti a nga jô Yasua na: Te ko be woñ, amu a akiti avalʼawolo di, ma ye ve be bese e mo me Israél be too mbalan meveñ bebé ya wu. Wo ye tyiʼi bikabela biap mimbiaé a diʼi bevagoñ bita bap e nduan.

⁷ Ane Yasua a bôte bé bese ya bita be nga suan vôm be nga too mendim me Mérôm atemetem, nalé be nga ku be yôp.

⁸ A Nti a nga ve be e mo me bone bʼIsraél; be ve bôé be a titane be a kui beta Sidoñ, a kui fe Misrefôt-Mayim, a kui mbiʼili ya Mispa mfaʼa jôp da tôô; Israél a nga wôé be môte wua te liʼi.

⁹ Yasua a nga bo be avale Nti a nga jô nye na a bo: A nga tyiʼi mimbiaé ya bikabela biap a diʼi bevagoñ bita bap e nduan.

Yasua a nyoñe tison Asor

¹⁰ Melu mete, éyoñ Yasua a bulaneya mvus, a nga nyoñe tison Asor a wôé njô bôte wé a nkpwaté mekôn. Bebela a ne na, melu mvus, Asor nye a mbe nlô tison ya bijôé bite bise.

¹¹ Ajô te be nga wôé be a nkpwaté mekôn a jiane bôt bese be mbe été: Teke jôm éziñ ja vebe é nga liʼi, a be nga diʼi Asor a nduan.

¹² Yasua a nga nyoñe fe bitison bejô bôt bete bese a bejô bôte bap bese, a nga wôé be a meyo me nkpwaté mekôn a jiane be avale Môze, mbo ésaé Nti a nga bendé.

¹³ Ve Israél a nji ke diʼi tison éziñ e bitison ya minkô vengevenge ve Asor, nye Yasua a nga diʼi.

¹⁴ Ane bone bʼIsraél be nga sa akum ese ya bitison bite a mimbam biyem; ve be nga jiane bôt bese a meyo me nkpwaté mekôn, akekui be nga mane wôé be bese, jôm ja vebe teke liʼi.

¹⁵ Jame Nti a nga bendé Môze mbo ésaé wé, nde Môze a nga bendé Yasua, a Yasua a nga bo de, a nji ke biasé jam éziñ ya mam Nti a nga bendé Môze.

¹⁶ Avale te nde Yasua a nga nyoñe si: nkôle Négéb ôse, si ése ya Gôzen, njeʼese Araba, nkôle Israél a ngabe jé é ne njeʼese.

¹⁷ Ataté nkôle Halak ñwô wo yené mfaʼa ya Séyir, a kui Bal-Gad, e beta mbiʼili ya Libañ, nkôle Ermone si, a nga nyoñ bejô bôte bap bese a bôé be, a wôé fe be.

¹⁸ Yasua a nga wosane bejô bôte bete melu abui.

¹⁹ Teke tison éziñ é nga bo élate mvoʼé a Israél, vengevenge ve Gabaoñ, vôm Beévieñ be nga too. Be nga nyoñe bie bise a mewosan.

²⁰ Amu Nti nye a nga ve minleme miap teke éngôngo, a mane wôé be, avale Nti a nga bendé Môze.

²¹ Melu mete fe Yasua a nga ke vaa bone bʼAnak minkôle ya Ebroñ, Debir, Anab, minkôle mise ya Yuda a mi ya Israél: a nga jiane be a bitisone biap.

²² Teke mone Anak éziñ a nga beta liʼi e si bone bʼIsraél, vengevenge ve e Gaza, Gat a Asdôd.

²³ Nalé ate nye Yasua a nga nyoñe si ése, avale Nti a nga jô Môze, a Yasua ke a nga ve je Israél, é bo ngabe jap avalʼane meyoñ me ne nkaban. Ataté éyoñe te, si é nga bo évôvoé teke fe bita.