YASUA 1 - Bible en langue Bulu

Yasua, ntebʼôsu ya ayoñ

¹ Eyoñe Môze mbo ésaé Nti a wuya, Nti a nga jô Yasua mona Nun a mongô bisaé Môze na:

² Mbo ésaé wom Môze a wuya, ajô te éyoñe ji, kôlôʼô si a dañe Yordan nyô, womien a bôte bana bese mi ke e si me nga ve be.

³ Vôm ase abo si denan da ye tibi, me veya mia nye, avale me nga tiñeti Môze.

⁴ Minné mienan mia ye bo avale di: Ataté nkôte si mfaʼa ya nké, a kui minkôle mi Libañ mfaʼa ya akôé, si Behétieñ ése, ataté fe e beta ôsôé ba loone Efrat mfaʼa jôp da tôô, a kui e beta mañ ba loone Méditérané, mfaʼa jôp da dim.

⁵ Nté ôse wo ye nyiñ, teke môt a ye dañe wo e ngu. Ma ye bo te liʼi wo nge kandane wo.

⁶ Yeme ngu a bo ayok, amu wo ye bo na e bôte ba be nyoñe si me nga kane ngana e be bʼésaa babe na ja ye bo énjap.

⁷ Ve jame da na, yeme ngu a dañe bo mbane ya baʼale mam mese ya metiñe Môze, mbo ésaé wom, a nga bendé wo; te saʼale me e mbo nnôm nge e mbo ngal: nalé wo ye wulu a fek e vôm ase wo ke.

⁸ Kalate metiñe nyô a ye bo te kôlô anyu dôé, ve wo ye yéʼé nye môs baa alu, nalé wo ye baʼale a bo e mam mese me ne ntilan été: éyoñe te e mame môé ma ye wulu mvoʼé , a wo ye ke ke ve ôsu.

⁹ Ke me bendéya wo na ô yeme ngu a bo ayok, te ko woñ, nalé fe te fôʼôban? Amu Nti, e Zambe wôé, a ne e be wo, vôm ase wo ke.

¹⁰ Ajô te Yasua a nga bendé betebʼôsu ya ayoñ a jô be na:

¹¹ Kelane minkan minkan a jô bôte na be kômesane ngaʼaban: amu den melu mela, mia ye dañe Yordan nyô a ke nyoñe si nje Nti, e Zambe wônan, a veya mia é bo énjenan.

¹² Yasua a nga jô menda me bôte Ruben, Gad a éfas ayoñ Manasé na:

¹³ Mi simesaʼan éfia nje Môze, mbo ésaé Nti, a nga tote mia na: E Zambe wônan a veya mia éfuse si ji.

¹⁴ E binga benan, bone benan a mimbame biyeme mienan bia ye liʼi e vôme Môze a nga ve mia, e Yordan yat. Ve miabebien a bôte bese be ne biwôlô ya wosan, mia ye taté dañ a ke bobenyoñe benan ôsu mi too nkômesan asu bita, nalé mia ye volô be,

¹⁵ akekui Nti a veya fe bobenyoñe benan awoʼon avalʼane mia, a na be fe be nyoñeya éfuse si Nti, e Zambe wônan a ve be. E mvuse valé mia ye bulane zu tabe e vôm a ne éñwônan, nye Môze mbo ésaé Nti, a nga ve mia e Yordan yat, mfaʼa jôp da tôô.

¹⁶ Nde be nga yalane Yasua na: Bia ye bo avalʼése ô bendéya bia na bi bo, a bia ye ke e vôm ase wo ye lôme bia.

¹⁷ Bia ye bo wo mewôk mfaʼa ya mam mese avale bi nga bo Môze. Bia kômbô ve na Nti a tabe e be wo avale a nga too e be Môze.

¹⁸ Môt ase a ye bo tyiñe jôé melo, nge bo te vôʼôlô mejô môé, nge bene bo jam ese wo bendé nye, môt ate a ye wôéban. Ve da, yeme ngu a bo ayok.