YAKOB 4 - Bible en langue Bulu

E bôte minleme miap mi ne nkaban

¹ Mejô a mintañete bia so vé be mia? Bia so e mbia minkômbane mienan mmie mia wosan e menyôle menan été.

² Mia nyamete ve teke bi. Mi ne bewôé bôt a éviele, ve teke nguleya kui vôm. Mia luman a juan. Mi nji bi, amu mi nji bo ba ba jaʼé.

³ Mia jaʼé ve te nyoñ, amu minjaʼane mienan mi nji sôñe jam e ne mvaé, ve mimvômane mienan.

⁴ A binga bijabô! Ye mi nji yeme na nyeʼane si nyô ô ne ziñ ja wosane Zambe? E môt a kômbô bo mvôé a si nyô a bo émiene nyô a siñe Zambe.

⁵ Nge na, ye mia buni na mimfufube mintilan mia kobô ékobôkobô vôme mia jô na: Zambe a kômbô a aban ese, nsisim a nga toé e be bia été.

⁶ Ve a dañe bo mvaé éyoñ a liti mvam . Amu ajô te mintilan mia jô na: Zambe a wosane bôt be ne mebun, ve a mvamane ba ba suu bebiene si.

⁷ Ajô te suʼane miabebiene si be Zambe. Ve benane njôane Satan a a ye tube mia ôyap.

⁸ Subaʼane Zambe bebé, ndemben a ye subu mia bebé. Sôbane mo menan, mia bebo mam abé a lumane minleme mienan, mia e bôt mi ne minleme nkaban.

⁹ Miabebien yemane na mi ne bingôngol, jaéne meyep, yônan. E vioé wônan ô kôñelaʼan awu a mevaʼa menan jame da teʼe nyô.

¹⁰ Suʼane miabebiene si asu Nti, a a ye bete mia yôp.

Mveane môte mfe mekua

¹¹ A bobejañ, te koban abé mia mia. E môt a kobô monyañ abé nge tyiʼi monyañ ajô, a kobô atiñ abé, a tyiʼi fe atiñ ajô. A nge wo tyiʼi atiñ ajô, ô nji bo ane metiñ ma jô, ve nyô a tyiʼi metiñ ajô.

¹² Amu môte wua nye a ne ntelé metiñ a ntyiʼi mejô. Nye étam a ne ngule ya nyii a wôé. O ne za e wo tyiʼi ébe môtô ajô?

Bejeñ akum a bekaʼa mam

¹³ Ngoʼo mia mia jô na: Den nge akiti bia ye ke e tisone nyô nge nyuli. Bia ye tabe wé ngume mbu, bia ye bo makit a bi moné,

¹⁴ mia mi nji yem akiti ya binyiñe bienan. Amu mi ne ve ndutu a kui nté éziñ a mané.

¹⁵ Mi liʼi jô na: Nge Zambe a kañese, bia ye nyiñ a bo jame di nge dili.

¹⁶ Mia wulu ngunguane ya énguñe jenan. Ngunguan avale te ô ne abé .

¹⁷ E môt a yeme bo mbamba jam ve te bo nye, a beʼe mekua ya mboon abé .