YAKOB 3 - Bible en langue Bulu

Beyeʼele be baʼaleʼe ôyeme viap

¹ A bobejañe bam, te boone beyeʼele abui, amu mia yeme na ntyiʼan ajô wongan wo ye dañe bo ngu.

² Amu bia bese bia kob abui. Nge môt éziñ a bo te kop a nkobô, nyôlé a ne étua mbamba môt, nyô a ne nguleya bi ngume nyôle wé ngbwak.

³ Nge bia tiñeti bityé e menyu bikabela na bi wôʼô bia, bi jôôya fe ngume nyôle wop.

⁴ Fombaʼane fe be sitima, abui anen be né, abime ngul ôkôs wo jimbi be ô né, ve ba liti be zen ba yiane ke a ôyôm ngap.

⁵ Avale te fe ôyem, ô ne ôyôme ébuʼa, ve ô ne nguleya tametane na wo bo beta be mam. Fombaʼane fe ane ôyôme nduan ô wôʼô diʼi beta afan.

⁶ Oyem ô ne fe nduan, si abé . Oyem ô ne ébuʼa jia ya nyôle jangan, ñwô wo ve ngume nyôle wongan ôse mvit a diʼi ngum ényiñ wongan ôse. A ôbien, ô ne ndiʼan a nduane ya étôtôlan.

⁷ Môt a bili nguleya tooé mevale me biôme mese ngbwak, betite ya fé, anon, betite ba woñ a kos.

⁸ Vʼôyem, môt a se nguleya tooé wô ngbwak; ô ne abé , a wo fôʼôsan éyoñ ése, njalan ne lut a nsul wo wôé.

⁹ Ñwô bia botane Nti a Tate, ñwô fe bia yoʼé wô bôt be ne ntéan a éveʼela Zambe.

¹⁰ Anyu daa da nde bibotan a biyoʼé bia so. A bobejañ, e nji yiane bo nalé.

¹¹ Ye anjeñe da da kuli évôvoé a ayôle mendim?

¹² A bobejañ, ye figié a ne wum ôlive nge ndiʼi woone ke e wume fige? Anjeñe mendim me bili nku, e se ngule ya kuli bivôvoé mendim.

E fek ja so yôp

¹³ Za a ne fek a atyeñ e zañe jenan? A litiʼi ndem e mbamba ntabane wé été, e mboone mame wé été a nsuane émiene si a fek.

¹⁴ Ve nge minleme mienan mi ne njalan a mbia éviele a nsisime mesengan, te boone mebun a viane ndeñele bebela e minsose mienan été

¹⁵ feʼéte é nji so e yôp; é ne nyô ya si nyô, nyô betit, nyô Satan.

¹⁶ E ne été na, éviele a nsisime mesengan bia soo nzametane mam a abé mevale mese.

¹⁷ Ve feʼe ja so yôp, ôsusua, é ne mfuban , évôvoé, mvaé, ja late bôte ngbwa, ja ko éngôngo, ja wume mbamba bibuma, teke ôbangam nge bebaduʼu.

¹⁸ Ebuma zôsôô ja béban e mvoʼé été asu ba ba jeñe mvoʼé .