YAKOB 2 - Bible en langue Bulu

Te semé mingume mi bôt

¹ A bobejañ, te bundane mbunane wônan mia buni étôtoʼo Nti wongan Yésus Krist a nsémane mingumba mi bôt.

² Bi tame jô na, nsulaʼane wônan été, môt a nyiin, a beʼe bilondo bi or, a too mbamba njaan, mfe ki a nyiin, a too mbubua, a beʼe bekuleba.

³ Nge mia dañe semé môt a beʼe abeñe ngômesan, a jô nye na: Wo, tabeʼe mbamba éto nyô, a jô mbubua na: Tebeʼe tetele, nge na: Tabeʼe valé e vôme ma telé mebo mam!

⁴ Ye mi nji liti nsémane mingume mi bôt? Ye mi nji bo betyiʼi mejô ba fase mam ane bewôé bôt?

⁵ A bobejañ ma nyeʼe, vôʼôlan, ye sa Zambe nye a nga top e bôt be ne mimbubua e mise me bôte ya si nyô a bo be minkukum e mbunan, a bo be benyoñe ngabe ya éjôé a nga baʼale ba ba nyeʼe nye?

⁶ Ve mia, mi vaaya mbubua éjijine jé. Ye sa minkukum e mmie mia tibili mia? E mbe fe ba ke ba woʼotô mia e meba mejô?

⁷ Ye sa mbe ba ndaman étyi ya mbamba jôé ba loone mia?

⁸ Yaa, nge mia bo atiñe njô bôte mewôk, aval ane e ne ntilane, na: Wo ye nyeʼe môt a ne wo bebé ane wo nyeʼe womien, mia bo mvoʼé .

⁹ Ve nge mia semé mingume mi bôt, mia bo abé a atiñ da ve mia mekua, ane betyame metiñ.

¹⁰ E ne été na, nge wo baʼale metiñe mese, ve ô tyame da, ô nto ntyame mese.

¹¹ Amu nyô a nga jô na te bo mejian , a nga jô fe na: Te wôé môt. A nge ô nji bo mejian , ve wo wôé môt, ô ntoo ntyame metiñ.

¹² Kobaʼan a bo aval ane bôt be ne nloone ya tyiʼibane mejô a atiñe ya éto beti.

¹³ E ne na: Ntyiʼane mejô ô ne njet e be nyô a nji koo bôt éngôngo. Nkoon éngôngo wo vini ntyiʼane mejô.

Mbunan ve tee mimboone mi mam

¹⁴ A bobejañ, da volô jé na môt a jô na, a bili mbunan ve mimboone momo? Ye mbunan ô ne nyii aval éyoñe te?

¹⁵ Nge monyoñ, nge ka, be nji bi jôme ya jaé a jôme ya di mimôse mise,

¹⁶ a môte wua ya be mia a jô nye na: Kele mvoʼé a tabe vôm a ne ayôñ, ma tame fe wo mbamba ndian, ve te ve nye jôme ya nyiñe je, da volô jé?

¹⁷ Avale te fe mbunan, wô étam étam, tee mimboon, ô ne ñwuan étame jé été.

¹⁸ Ve môt éziñ a ye jô na: Wʼô bili mbunan, me ki mimboon. Litiʼi ma ndeme ya mbunane wôé, teke mimboon, ve me ma ye liti wo ndeme ya mbunane wom amu mimboone miam.

¹⁹ Ye wo buni na Zambe a ne ve wua? Wo bo mvoʼé ! Mimbia minsisime fe mia buni nalé a mia nyeñeban.

²⁰ A éngôngole môt, ye wo kômbô foʼo yeme na, mbunan ô ne teke mimboon ô ne momo?

²¹ Ye Abraham ésaa wongan a nji lañebane zôsôô amu mimboon e vôm a nga beté mone wé Izak ataʼa metunaʼa yôp?

²² Ke ô lôô na, mbunan ô nga bo ésaé fufulu a mimboone mié, na Mimboon mi nga yemete mbunan,

²³ a ntilan wo jô na: Abraham a nga buni Zambe, a jame te e nga lañebane nye ane zôsôô a nga tôéban, a a nga lobane na mvôé Zambe.

²⁴ Mi lôô na zôsôô a so môt mimboon saa ve mbunan étam.

²⁵ Avale te fe Rahab, minga ébamba, ye a nji lañebane zôsôô amu mimboon vôm a nga nyoñe belooé si, a bo na be bulane zene fe?

²⁶ Ajô te, aval ane nyôl é ne tee mvebe é ne ñwuan, nalé fe mbunan ô ne teke mimboon ô ne ñwuan.