YAKOB 1 - Bible en langue Bulu

¹ Ma, Yakob, mbo ésaé Zambe a Nti Yésus Krist, ma tili meyoñ awôm a mebaé me ne mmialan e yôbe yôp. Mbôlané!

² A bobejañ, nyoñane meveʼele mese ma kui e be mia a mbamba nlem ,

³ mi yeme na, e meveʼele mbunane wônan wo tôbane me, ma kôʼôlane njiban.

⁴ Ve na, njiban ô boʼo ésaé, nde mia ye bo nya mvoʼé a njalan, teke jam éziñ e ne abé be mia.

Meyeʼelane me mbunan

⁵ Nge feʼe ja jembane môt éziñe ya be mia, a jakéʼé je Zambe, nye a ve bôte bese tyiʼibi tyiʼibi, te minkomekan, ja ye vebane be nye.

⁶ Ve a jakéʼé a mbunan, teke bone bisô biziñ. Amu e môt a sôan, a funane ntyôa mañ, ñwô évuñulu ja tindi.

⁷ Môt avale te a boʼo te veʼe feʼe na, Nti a ye ve nye jôme si jôme ka.

⁸ Amu a ne môt a nee nleme nkaban, nyô a yeñelan.

Nkukum a nzôzoé

⁹ E monyoñ a ne nzôzoé a yene mvaé éyoñ a betebane yôp,

¹⁰ a nkukum avale da, éyoñ wo silibane si. Amu a ye lôt aval ane same ya afup.

¹¹ Amu éyoñe jôp e tôôya, ayôñe dé da kôtô bilok, sam é koo, a abeñe dé ya yen a mis é mané. Avale dada nkukum wo ye jañ e zañe ya bisaé bié.

Ajô meveʼele ényiñe mbunan été

¹² Ebotan a e môt a jibi meveʼele , amu na, éyoñ a kabeya, a ye nyoñ ékate duma ya ényiñ é ne ntiñetan e be ba ba nyeʼe nye.

¹³ Môt éziñ a boʼo te jô, éyoñ a tôbane meveʼele na, meveʼele ma so ma be Zambe. Amu Zambe a voʼo bo abé , nalé fe émien a voʼo veʼele môt.

¹⁴ Môt ase a tôbane meveʼele amu minkômbane mié émien mia duʼu nye, a dutu nye.

¹⁵ Eyoñ nkômban ô nyoñeya abum, wo biaé abé , a éyoñ abé e tôlôbôya, da suʼulane biaé awu.

¹⁶ Te duʼuban, a bobejañ ma nyeʼe.

¹⁷ Mfañe mvean ôse, a nya das ase, bia so yôp, e be Esaa bifufup, nye a ne teke ntyendan nge nsisiñe ya nkôñelan.

¹⁸ Amu mbamba nkômbane wé, a nga biaé bia a benya mejôô ya anyu dé, nde bia ye bo bembômô ya mintéane mié.

Nwôʼan a mboone mejô me Zambe

¹⁹ Simesaʼan ajô di a bobejañ ma dañe nyeʼe, môt ase a boʼo avôle ya wôk, ve ôteʼeteʼe ya kobô a ôteʼeteʼe ya yaa.

²⁰ Amu ayaa môt e nji jalé nkômbane Zambe a ne zôsôô .

²¹ A na, vaʼane mvin ése a nkpwala ôse wo nemban. Nyoñane mejô me ne mbéane be mia a évôvoé nlem , mme me ne ngule ya nyii binyiñe bienan.

²² Ve boʼone bôt ba bo mejô, saa ve bewôʼétam, mi za duʼu miabebien.

²³ Nge môt a wôʼô mejô, ve te bo me, a funane môt a yen asu dé a nga bialé de e ngobé

²⁴ A mane yen émien, a kelé, été été, a vuane jôm a funane je.

²⁵ Ve môt a beme mis e mbamba atiñ , e di ya éto beti a tôñe de, saa ve ñwôʼan étam, ve bo ane da yeʼele, môt ate a ye yene mvaé ya mimboone mié.

²⁶ Nge môt éziñ a buni na a ne mbuni Zambe, ve te bi ôyeme vié ngbwak, a duʼémien, mbunane wé ô ne zesé.

²⁷ Nya mbunane a ne mfuban a tee ayeñ, asu Zambe Esaa, nye nyô: njomane bobenyui a minkus e minjuʼu miab été, a nsaʼalane si nyô asu ya bo te bili mvin.