Tt 3 - Bible en langue Bulu

Bewosane mbunane biyoñ bia suʼulan

¹ Wômôlôʼô bôte bese melo na, ba yiane suu bebiene si e be betebe ôsu ya éjôé a ba be bili ngule njôan. Ba yiane bo mewôk a tabe nkôman asu mbamba mboon ase.

² Te ta môt, a saʼale meluman, a yené mvoʼé e be bôt, a liti ndeme njeʼebane nlem e be bôte bese.

³ Amu melu mvus, bia fe bi nga too mekut, bebene njôan, ñyalane feñ, belo minkômban mise a mimvôman mevale mese, a nyiñ ézezam a minyamete été, angôndô abé , a siane bia bia.

⁴ Ve éyoñe mvame Zambe Nyii wongan, a nyeʼane wé mfaʼa bôt, bi nga yené,

⁵ a nga nyii bia, saa amu mimboone biabebien bi nga bo e zôsôô été, ve amu nkoon éngôngole wé, a zene mewoban me mfefé abialé a mvumelane Mfufube Nsisim a ve.

⁶ Nsisim ate nye a nga miase be bia abui abui, amu Yésus Krist Nyii wongan,

⁷ nde, éyoñe bi kabeya amu mvame jé, bia ye bo benyoñe ngab ényiñe ya melu mese amu ndi minlem é né.

⁸ Njôane wu ô ne wu ya buni. Ma yi na ô tuʼa yemete wô, nde ba bese be buniya Zambe, be ve ngu mfaʼa mbamba mimboon. Mam mete me ne mvaé, a mvolan e be bôt.

⁹ Ve zesé minjeñan, nlañane bindan, môman, nsañetaʼan ajô metiñ, saʼaleʼe bie: bi ne zezé a teke mvolan.

¹⁰ Teléʼé môt a bili ékotekote nyeʼelan e fefe, éyoñ ô lebeya nye éyoñe jia nge bibaé, te wôk.

¹¹ Wo yeme na, avale môte te e ne njañane fé, mbo mam abé , a ne nyô a ve émiene mekua.

Mebendé a mebatan

¹² Eyoñe me lômeya wo Atémas nge Tisik, jeñe zen ése ya zu koone ma Nikapolis. Valé nye me tyiʼiya na, ma ye lôt ôyôn.

¹³ Tukaʼa kômesane dulu Zénas, ñyeʼele metiñ, a Apôlôs na, jôm é bo te jembane be.

¹⁴ Bôte bangane fe ba yiane yéʼé na be tulan ôkup e mbamba mimboon, mfaʼa ya kôme mam ma siliban avôl avô. Be za yené be too te bibuma.

¹⁵ Bôte bese bia be be bi too, ba batane wo. Bataʼane me ba ba nyeʼe bia e mbunan été. Mvam é tabeʼe be mia bese.