SOFONI 3 - Bible en langue Bulu

Yérusalém a nji wôk mbemane Zambe

¹ Bidim a tison é ne melo a mvin, njalan a bôt ba tibili ba bevok!

² Tison éte é nji vôʼôlô tyiñ éziñ, é nji kañese melep , é nji tabe Nti ndi. E nji subu Zambe bebé,

³ bivete bié ézezañe jé bi ne bengbwengbwem ba bam; betyiʼi mejô bé be ne ane menkamenyañe ya mamengôʼé, mme me nji fe bi jôme ya di mametyé,

⁴ bekulu mejô bé be ne bivevese bi bôt, e bôt be ne njoñ; betuni bé ba ndaman étyi ya biôm bi nʼétyi, ba tyame metiñ,

⁵ ézezañe jé, Nti a ne zôsôô , a nji bo mvôl éziñ; tyé ése a liti zôsôô wé éngengeñ teke selan; ve mvômvôle môt teke wôʼôson.

⁶ Me maneya wôé meyoñ; nalé Nti a jô; azomezome menda map e ntoo ndaman me maneya ndaman minjoñe miap teke fe môt a lôt été! Bitisone biap bi maneya saaban, teke fe bôt ba lôt été, teke fe bôt be too été.

⁷ Me mbe me jôʼô na: nge ô too ye ko me woñ ô nga ye kañese melep ! Nda jé ja ye bo te tyamban. Me tebeya nye ngame yat mevale mese, ve be boya avôle ya mane zametane mimboone miabe mise.

⁸ Ajô te ñhe mi yangeʼe ma, nalé Nti a jô, e môse ma ye kôlô si asu nsaane biôm, amu me tyiʼiya na ma zu sulane meyoñ na me kôane bijôé bise be ma, asu ya mialane woñ e be be, ayôñ ese ya ayaa dam; amu si ése ja ye dik a nduane ya abane dam.

Mengakaʼa

⁹ Eyoñe te ma ye bo biyaé ya meyoñ me bôt mfuban , asu ya na mese me loone jôé Nti éyoñ ba kañe nye fufulu.

¹⁰ Bôte ba kañe ma, nalé fe bôte bam be nga mane mialan ba ye soo ma mimvean e asôé yate ya Etiôpi.

¹¹ Môs ôte wo ye bo te beta wôʼô mimboone mi mame miôé mise ôson, mbia be mam ô nga bo ma; amu ma ye vaa ba ba vak a mebun ézezañe jôé. A wo ye suu ésase nkobô e nkôle wom ô ne étyi.

¹² Ma ye suu ayoñe bôt e ne njeʼebane nlem a atek ézezañe jôé, nde da ye sobô e jôé Nti été.

¹³ Mebukaʼa me Israél ma ye jôʼé mboone mvô. Ma ye bo te laa minsos ôyeme mvô wo ye bo te bo e menyu mab été, éyoñe ba ye bi bidi a vôme ya bômbô teke môt a ndeñele be.

¹⁴ Beteʼe tyiñ a yôtane ndañan a ngone Sioñ! Vaʼak a fôn a nleme wôé ôse a ngone Yérusalém!

¹⁵ Nti a keya wo mintyiʼane mejô ôyap; a keya nsiñe wôé zene fe; njô bôte ya Israél, Nti, a ne e zañe jôé. O nji fe bi mbia jame ya ko woñ.

¹⁶ Môs ôte ba ye jô e Yérusalém na: te ko woñ! A Sioñ, e mo môé me boʼo te tek!

¹⁷ Nti, e Zambe wôé, a ne e zañe jôé mbene wo nyii; a ye bo wo e beta avaʼa wé; a ye tabe évô e nyeʼane wé été asu dôé. a ye bi mefône ya ndañan asu dôé.

¹⁸ Ma ye kôane ba ba wôʼôlun ôyap a beta mebôk , ba be nga too wo ôyap mbe ôsame a nga titi bituu ane mbeʼe.

¹⁹ Eyoñe te ma ye ke ba ba bo wo na ô wôʼôlun ngame yat; ma ye nyii nyô a feñke, a kôane nyô be nga titan. Ma ye bo be jôme ya duma a ékañaʼa e vôm ase be nga bili ôson e si ése nyô.

²⁰ Eyoñe te ebiene ma ye beta bo na mi bulan, éyoñe te nje ma ye kôane mia; amu ma ye bo mia jôme duma a ékañaʼa e meyoñ me bôte ya si nyô été, éyoñe ma ye soo minkôme mienan mise menan me lôô, Nti a jô nalé.