SOFONI 2 - Bible en langue Bulu

Melep asu bôt minlem mi ne njeʼeban

¹ Sulaʼan a fas, a ayoñe bôt e ne te wôʼôson,

² te na ntyiʼan ô boban, nalé fe te na môs ôte ô za lôté ane ôyôme zesé nkôt élok, te na ayaa Nti e zaʼa kui be mia, te na môse ya ayaa Nti ô zaʼa kui be mia.

³ Jeñane Nti, mia bôte bese ya si minlem mi ne ne mieññ, a mia tôé abendé dé! Jeñane nya ntyiʼane mejôô, jeñane njeʼebane minlem! Ndôʼôtô na mia ye fam e môse ayaa Nti da ye bo.

Ayaa asu meyoñ bikuu

⁴ Amu Gaza a ye liʼi bilik, Askalôn ki a ye bo ne sangaññ. Ba ye titan Asdôd e zañe môs , a Ekroñ a ye tébane si.

⁵ Bidim a e bôt be too fefele mañ, a ayoñe Bekérétieñ, amu ajô Nti e ne mia ngame yat, Kanaan, si Befilisteñ. Ma ye tyame wo, a wo ye bo teke fe bôt be too be wo.

⁶ Nsaʼa mañ wo ye bo foʼo ve mevôme betit ba di bilok, foʼo ve menda bebaʼale mintômba, a mebemba mimbame biyem.

⁷ Nsaʼa mañe te wo ye bo asu mebukaʼa me nda Yakob; nde ba ye ve mimbame betite miap bidi valé; ba ye bômbô si mamengôʼé e menda ya Akalôn été; amu Nti, e Zambe wop a ye wosan asu dap, a bulane soo minkôme miap.

Ayaa asu meyoñ me too e jôbe da dim

⁸ Me nga wôʼô meta ya Môab a minkobô mi ébiasé mmie bone bʼAmon be nga sili mie ayoñe bôte dame si, a kôlô si a wosane minné mi si mié.

⁹ Ajô te, ane me vee! Nalé Nti ya minsamba mewosan, Zambe ya Israél a jô, Môab a ye bo ane Sodom, a bone bʼAmon ane Gomor, nalé a ne na: e vôm a ne njalan a mbia bilok, akoʼo nku, ôsone jam nnôm éto; mebukaʼa ya bôte bam ma ye be sa, bôt ba ye nyiñ ayoñ dam été, ba ye nyoñe mevôm mete ane ngap.

¹⁰ Mam mete ma ye kui be be amu mebune map, amu be nga wu a ôsame a wosane ayoñe bôte Nti ya minsamba mewosan.

¹¹ Nti a ne ékowoñe be be; amu a ye bo azezambe ese ya si ve momo jôm; mebôta me si ya meyoñe mañ ma bômane me ma ye kute meboñe si asu dé abôta si ese e vôme wé.

Ayaa asu meyoñe ya nké a akôé

¹² A bôte ya Etiôpi nkpwaté mekône wom wo ye fe jii mia.

¹³ A ye same wo wé a wosane bôte ya akôé, a ye wôé Beasirieñ a bo Ninive ne sangaññ, a bo nye si é ne ayet ane nkôte si.

¹⁴ Mimbame biyem mia ye bo nye étabaʼa jap, Betite mevale mese: ngôkoé ba mvep ba ye bômbô e mendoʼo mé été; tyiñ ja ye yôn é soʼo vundi. Bilik bia ye bo anyiine mbé amu biôm be nga bo a bilé bi sédre bia ye téban.

¹⁵ Tame ñhe yene tisone mevak éte, nje é nji bi jame ya tyelé nleme yôp, a ja jô nleme wé été na: ve ma, foʼo ve ma! Jia! E ntoo jôm ôlun, étabaʼa betit! ba bese ba lôte je bebé ba loñe vioñ a febe wo.