SAMUEL ÔSU 9 - Bible en langue Bulu

Saül a ke be Samuel e Rama

¹ Môt éziñe ya ayoñe Bényamin a too jôé na Kis mona Abiél ndaé Seror, ndile Bekôrat, ôwuabañ Afia, mona mone Bényaminite, A mbe ngungule môt a éwôlô.

² A nga bili monafam jôé na Saül, étua abeñ ésoé ndôman, abeñ a bone bʼIsraél bese, a dañe fe bese ayap.

³ Beyale bijakase be Kis, ésaa Saül, be nga jañ; nde Kis a nga jô Saül, e mone wé na: Nyoñe wua ya bebo bisaé, kôlôʼô si a ke jeñe beyale bijakas.

⁴ Nde a nga tulan minkôl, teke yene be; a nga beta tulane si ba loone Kaalim, teke jôm! A beta lôt e sii Bényamin, teke yene jôm.

⁵ Be nga kui e Suf a Saül a nga jô mbo ésaé ba nye be mbe nsamba na: Zaʼa bi bulan amu na ésaa wom éyoñ a vuaneya beyale bijakas, a ye viane bi njuʼu nlem amu bia.

⁶ Nde mbo ésaé a nga yalane nye na: Da tôbane na môta Zambe a ne e tisone nyô, bôte bese ba semé nye; jam ése a jô da boban avale a te jô. Nkelek, ndôʼôtô na a ye kate bia e zene bia yiane tôñ.

⁷ Nde Saül a nga jô mbo ésaé wé na: Ve nge bia ke, jé bia ye ve môta Zambe? Amu bidi bi nji beta bo e bikpwaé biañgan été, a bi nji bi jôm éziñe ya ve môta Zambe. Bi bili jé?

⁸ Ane mbo ésaé a nga beta nyoñe nkobô a jô Saül na: Me bili mone nsañe moné, ma ye ve nye môta Zambe, a a ye liti bia e zene bia yiane tôñ.

⁹ Melu mvus, môt a ke sili nkômbane Zambe a mbe a jôʼô na zaʼa bi kean e be ñyene mam! Amu môt ba loone dene na nkulu mejô, be nga loone nye melu mvuse na ñyene mam.

¹⁰ Saül a nga jô mbo ésaé wé na: Ô kobôya mvoʼé ! Zaʼa ñhe bi ke! Nde be nga ke e tisone môta Zambe a nga too.

¹¹ Eyoñ be beteya e tison, be nga tôbane bobebinga be kele laé mendim ane be nga jô be na: Ye ñyene mam a ne va?

¹² Be nga yalane na: Yaa a ne wo ôsu; éyoñe ji kelʼavô, amu a te zu e tisone den, amu ntyiʼane biôm wo yiane boban den asu bôt e vôm a ne mbetane yôp.

¹³ Eyoñ mia ye kui a nyiin e tison, mia ye koone nye te na a beté e vôm a ne mbetane yôbe na a di; amu bôt baa ye ke di te na a soya, amu a yiane botane mvean; e mvuse valé nje bôt be ne nloon ba ye di. Ajô te betan éyoñe ji, a anaʼana mia ye koone nye.

¹⁴ Eyoñe be nga kui ézezañe tison, Samuel a nga ke tôbane be e vôm ba bet e nda yôp.

¹⁵ A tatéya bo na, môse wua ôsu, te na Saül a so, Nti a nga kate Samuel

¹⁶ na: A Akiti, avalʼéyoñe di, ma ye lôme wo môte ya Bényamin, wo ye woʼo nye mbone na a bo nliti zene ya bôte bam Israél. A ye nyii bôte bam e wo Befilisteñ; a me Fombôya bôte bam amu ñyône wop ô beteya a kui be ma.

¹⁷ Eyoñe Samuel a nga yene Saül, Nti a nga jô nye na: Môt me nga jô wo nye nye le; nye a ye bi éjôé e be bôte bam.

¹⁸ Nalé Saül a nga subu Samuel bebé e mbé tison a jô na: Litiʼi ma, ma yeʼelane wo, e vôme nda ñyene mam é né.

¹⁹ Nde Samuel a nga yalane Saül na: Tôñe ma mfaʼa éto yʼékôndôʼô yôp. Bia be mia bia ye di den. Ma ye jôʼé wo ô ke mametyé, a liti wo e jam ése é ne wo nlem .

²⁰ Te tyelé nleme yôp amu beyale bijakase biôé bi ne njañan dene melu mela, amu be yenéya. Za a nee e mam mese me nʼédima Israél? Ye sa wo a ndaa ésoo ése?

²¹ Saül a nga yalane na: Ye me nji bo môte ya Bényamin, ayoñe da ya meyoñ ma dañe tyôtyoé Israél? Ye abume dam é nji dañe tyôtyoé e mebum mese yʼayoñe Bényamin? Amu jé wo kobô me nalé?

²² Ane Samuel a nga nyoñe Saül a mbo ésaé wé, ndʼa nga nyiñeli be aba nda a ve bʼéto ôsu ya bôt be mbe nloon, be mbe bebé bôte mewôm mela.

²³ Eyoñe te Samuel a nga jô nyame bidi na: Zaʼa ve be ngap ma te ve wo me jôʼô na: Bôʼé je e fefe.

²⁴ Nde ñyame bidi a nga vaa éname yʼabé a jôm ése ja bômane je a bôé je ôsu Saül. Ane Samuel a nga jô na: E ngabe ba te naane wo le; zaʼa je ôsu viôé a di, amu me ne jô na ba te naane wo je éyoñ ma te loone bôt. Eyoñe te Saül baa Samuel be nga di vôme wua môs ôte.

²⁵ Be nga so éto yʼékôndôʼô yôp a zu e tison, Samuel a nga laane Saül minlañ andile yôp.

²⁶ Nde be nga kôlô si ndibe tyé. Eyoñe jôp é ngenan te tôô, Samuel a nga loone Saül andile yôp a jô na: Kôlôʼô si a ma ye suu wo ô ke, nde Saül a nga kôlô si, be nga ke e njoñe yôbe bebaé nsamba wua, nye a Samuel.

²⁷ Eyoñ ba siliki akuʼu tison, Samuel a nga jô Saül na: Jôʼô mbo ésaé wôé na a ke bia ôsu. Nalé mbo ésaé a nga tebe be ôsu. Samuel a nga jô Saül na: Tebeʼe éyoñe ji, a ma ye bo na ô wôʼô nkobô Zambe.