SAMUEL ÔSU 8 - Bible en langue Bulu

Bone bʼIsraél ba sili njô bôt

¹ Eyoñe Samuel a ntoo nnôm, ndʼa nga telé bone bé betyiʼi mejô ya Israél.

² Jôé ntôle mone wé é mbe Yoél, jôé nyô baa é mbe Abiya; be mbe betyiʼi mejô e Birséba.

³ Bone be Samuel be nji ke tôñe bibôʼa mebo bié; be nga dañe nyeʼe nseñge, a nyoñe biboteze a tyiʼi bôte mejô ékotekot.

⁴ Ane bemvendé bese yʼIsraél be nga sulan a zu be Samuel Rama.

⁵ Be nga jô nye na: Ô ntoo nnôm a bone bôé kik teke tôñe bibôʼa mebo biôé; éyoñe ji teléʼé bia njôô ya jôô bia avale meyoñ mevoʼo mese me bili.

⁶ Jame te é mbe abé e mise me Samuel na ba sili na: Vaʼa bia njô bôte ya jôô bia; nde Samuel a nga yeʼelane Nti.

⁷ A Nti a nga jô nye na: Vôʼôlôʼô e tyiñe jap e mfaʼa ya jam ése ba ye jô wo; amu sake wo ba ben, ve ma. Be nji beta kômbô na me jô ô be.

⁸ Avale ba zu ba bo éyoñ ése, ataté éyoñ me nga soo be Ejipte a kui den be liʼi ma na ba saane bezambe befe, avale te ba bo wo.

⁹ Ajô te ñhe, vôʼôlôʼô tyiñe jap; ve vaʼa be ayemé éngengeñ a bo na be yem e mam njô bôt a ye jôô be a ye sili be.

¹⁰ Nalé Samuel a nga baʼalan mejô me Nti mese e be bôt be nga sili nye njô bôt.

¹¹ Ane a nga jô na: E mame njô bôt a ye jôô mia a sili mme ma: a ye nyoñe bobefame benan a belane be asu bevagoñe bé a asu bebete bikabela bé; ba ye mate mimbi ôsu ya vagoñe wé;

¹² A ye bo be bivete ya toyini, a bi ya mewôm metan, a ye fe belane be asu ya senane mesi mé, asu ya kôane bidi bié a kôme mengale bita mé a biôme ya bevagoñe bé.

¹³ A ye nyoñe bobebinga benan be bo belet.

¹⁴ A ye nyoñe mefube menan ma dañ abeñ nalé fe mefube mindiʼi menan a beôlivié benan, a ve bie bebo bisaé bé.

¹⁵ A ye nyoñe ngab awômô ya memvoñe menan a nyô ya mefube mindiʼi mi woone menan a ve je bivete bezimbi bia saane nye a bebo bisaé bé.

¹⁶ A ye nyoñ bebo bisaé benan be ne befam ba dañe yeme saé a ba ya bebo bisaé benan be ne binga ba dañe yeme saé, a bisoé bendômane bienan, a bijakase bienan, a a ye belane bie asu bisaé bié.

¹⁷ A ye nyoñe ngab awômô ya mimbame biyeme mienan, a miabebien mia ye bo alo dé.

¹⁸ Môs ôte mia ye yôn amu njô bôt miabebien mia ye top, ve môs ôte, Nti aa ye ke yalane mia!

¹⁹ Ve bôt be nga bene vôʼôlôʼô tyiñe Samuel. Be nga jô na Momo! Bia ye bi njô bôte be bia,

²⁰ nalé bia fe bia ye bo ane meyoñ mevoʼo mese; njô bôte wongan a ye tyiʼi bia mejô, a ye ke bia ôsu a bo ntebʼôsu ya mewosane mangan.

²¹ Samuel a nga wôʼô mejô mese bôt be nga kobô a kate me e melo me Nti.

²² Ane Nti a nga jô Samuel na vôʼôlôʼô tyiñe jap a ve be njô bôt. Samuel ke a nga jô bôte na, kelan, môt ase e tisone jé.