SAMUEL ÔSU 7 - Bible en langue Bulu

¹ Ane bôte ya Kiryat-Yearim be nga zu a bo na éwolo Nti é bet; be nga kee je e ndaa Abinadab, e nkôle yôp, nde be nga telé mone wé Eléazar na a baʼale éwolo Nti.

Ekôane ya Mispa; Israél a dañe Befilisteñ

² Melu abui me lôteya, ataté môs éwolo é nga bômbô e Kiryat-Yearim, mimbu mi nga lôt mewôm mebaé. Eyoñe te ndaa Israél ése é nga yône be Nti.

³ Ane Samuel a nga jô nda Israél ése na: Nge mia bulane be Nti a e nleme wônan ôse, vaʼane bezambe bikule bese e zañe jenan, nalé fe beastarté, keʼane minleme mienan e be Nti a Nyʼétam mi saane nye éyoñe te a ye kôté mia e wo Befilisteñ.

⁴ Nalé bone bʼIsraél be nga vaa Bebalim a Beastarté e zañe jap a saane ve Nti étam.

⁵ Ane Samuel a nga jô na: Sulaʼan Israél ase e Mispa, a ma ye yeʼelane Nti asu denan.

⁶ Nde be nga sulan e Mispa, a labe mendim a sôé me asu Nti. Be nga tyi bidi môs ôte. A valé nye be nga jô na: Bi maneya bo Nti abé ! Nde Samuel a nga tyiʼi bone bʼIsraél mejô e Mispa.

⁷ Ane Befilisteñ be nga wôʼô na bone bʼIsraél be maneya sulan e Mispa, nde bivete biap bi nga bet a ke wosan Israél. Eyoñ Israél a nga wôʼô nalé, a nga ko woñ ôsu Befilisteñ.

⁸ Nde bone bʼIsraél be nga jô Samuel na: Te tabʼévô, ve yône be Nti, e Zambe wongan asu dangan, nalé a ye nyii bia e wo Befilisteñ.

⁹ Ane Samuel a nga nyoñ e mone ntômba a ngenan a nyañ a ve nye ngumba be Nti. A nga yône be Nti asu Israél, a Nti a nga yalane nye.

¹⁰ Nté Samuel a nga ve mvean ô ne ngumba, Befilisteñ be nga zu bebé a té Israél bita. Môs ôte Nti a nga bo na zoʼoyañ é bam a beta éduñ e be Befilisteñ a é nga zametane be fek. Nde bone bʼIsraél be nga dañe be.

¹¹ Ane bôte yʼIsraél be nga kôlô Mispa, a titane Befilisteñ a bôme be a kui e Bét-Karé si.

¹² Samuel a nga nyoñ akok a telé de e zañe Mispa a Sén a yôlé de na Eben-Ezér, a jôʼô na: Nti a volôya bia a kui éyoñe ji.

¹³ Nalé ate Befilisteñ be nga sambe te fe beta kui e sii Israél. E wo Nti ô mbe Befilisteñ e ngame yat nté ôse Samuel a nga vee.

¹⁴ Bitisone Befilisteñ be nga nyoñ Israél bi nga bulan e be Israél, ataté Ekroñ a kui Gat, nalé fe e si jap; Israél a nga wôlé bie e wo Befilisteñ. A évôvoé é mbe e zañ Israél a Beamorééñ.

¹⁵ Samuel a mbe ntyiʼi mejô Israél nté ényiñe wé ôse.

¹⁶ Mbu ôse a nga bo a kelek e Bétél a bômane nye, nalé fe e Gilgal a Mispa, a a nga tyiʼi Israél mejô e mevôm mete mese.

¹⁷ Eyoñe te a suʼulane bulan e Rama e vôme nda jé é mbe; e valé nye a nga tyiʼi Israél mejô, a valé fe a nga lôñe Nti ataʼa metunaʼa.