SAMUEL ÔSU 6 - Bible en langue Bulu

Ewolo ja kôlô e mo Befilisteñ a taté bômbô e Bétsemék nalé fe e kiryat-Yearim

¹ Ewolo Nti é nga bômbô e si Befilisteñ ngone zamgbwa.

² Eyoñe te Befilisteñ be nga loone betuni a mimvimviʼi a jô na: Bia ye bo éwolo Nti aya? Katane bia avale bi ne nguleya bulane je e vôme wé.

³ Ane be nga yalane na: Nge mia bulan éwolo Zambe yʼIsraél mi nji yiane bulane je é too ékôkoé, mia yiane tyiʼi metunaʼa ya mmeman abé; éyoñe te mia ye bo mvoʼé a yeme fe amu jé e wo Zambe ô nji ke kôlô be mia.

⁴ Ane Befilisteñ be nga jô na: Za étyiʼa ya mmeman abé bia ye zu ve? Betuni a mimvimviʼi be nga yalane na: Biveʼelaʼa bi mot bitan bi too mboon a or a bidu bitan bi too fe mboon avalʼébubua da e biya mia bese a bivete bienan.

⁵ Boʼone biveʼela bi mote bienan a biveʼela bidu bienan bia yiane si, a vaʼane Zambe yʼIsraél duma: ndôʼôtô na a ye bo e wo wé ô ne be mia, be bezambe benan a e si jenan éveves.

⁶ Amu jé mia ye bo minleme mienan ayet avalʼane bôte yʼEjipte a Faraoñ be nga bo? Eyoñe Zambe Emien a mbe be e ngame yat, ye be nji titane bone bʼIsraél na be ke?

⁷ Eyoñe ji nyoñane mfefé vagoñ a beyale benyaʼa bebaé ba nyaa bon a be ngenan te beʼe mimbeʼe; tiñetaʼane beyale benyak e vagoñ a zuu bone babe nda .

⁸ Mia ye nyoñ éwolo Nti a futi je e Vagoñ; mia ye bôé biôm bi ne mboon a or mbie mia ve nye ane metunaʼa ya mmeman abé e fefele jé, bi too éwolo été, éyoñe te mia ye bulane je é ke.

⁹ Mia ye tuʼa fombô; nge ja bet e zene ya nnéa si e mfaʼa ya Bétsemék, mi yeme na Nti nye a ne tine ya beta bidime biangan; nge nalé momo, bia ye yeme na sake wo wé ñwô ô nga bibi bia a ébubua, ve na jame te é nga kui bia nalé.

¹⁰ Nde bôte bete be nga bo nalé. Be nga nyoñe beyale benyaʼa bebaé ba nyaa bon a tiñeti be e vagoñ a fete bone bap e nda été.

¹¹ Be nga futi éwolo Nti e vagoñ été a futi fe éwolo é nga bili bidu bi or a biveʼela bi mote me or.

¹² Nde beyale benyak be nga tôñe tetela zen e mfaʼa zene ya Bétsemék; be nga tôñe ve zen éte be kele ba tat teke yale e mbo nnôm nge mbo ngal. Bivete Befilisteñ bi nga tôñ éwolo a kui e nnéa si ya Bétsemék.

¹³ Bôte ya Bétsemék be kôʼane fôn e mbiʼili, nde ba bete mis a yen éwolo; ane be nga vak éyoñ be nga yene je.

¹⁴ Ane vagoñ a nga kui afube Yasua ya Bétsemék a tebe valé. Betʼakok a mbe valé. Nde be nga so e njaʼa é mbe vagoñ, a be nga ve beyale benyak ngumba e be Nti.

¹⁵ Belévit be nga sili éwolo Nti a éwolo baa nje é mbe é bili biôm bi or; nde be nga bôé bie e betʼakoʼo yôp. Môs ôte bôte ya Bétsemék be nga ve Nti mimvean mi ne ngumba a bityiʼa .

¹⁶ Eyoñe bivete bitane ya Befilisteñ be nga yene jame te, be nga bulan Ekroñ môse te ôbien.

¹⁷ Biveʼela bi mote me or Befilisteñ be nga ve Nti ane metunaʼa ya mmeman abé mbie bi: jia asu Asdôd, jia asu Gaza, jia asu Asdalôn, jia asu Gat a jia asu Ekroñ.

¹⁸ Bidu bi or bi mbe fe asu tison ése ya bitisone Befilisteñ bi mbe asu bivete bitan ataté tison é nga bili ôlem a kui e nlam ô yoo, a kui beta akok, e vôm be nga bôé éwolo Nti, a akoʼo te é ngenan afube Yasua e Bétsemék a kui môse wu.

¹⁹ Ane Nti a nga wôé bôte ya Bétsemék éyoñ be nga fombô éwolo Nti; a nga wôé befame mewôme zamgbwale ya bôte toyini mewôm metane ya ayoñ; nde bôte bese be nga nyiñ be nga tabe meyeb été amu Nti a nga bibi be a njet ése.

²⁰ Ane bôte ya Bétsemék be nga jô na: Za a ne nguleya nyiñ e vôme Nti a né, e Zambe a nʼétyi Nyô? A a ye bete vé na a ke bia ôyap?

²¹ Be nga lôme minlôman e be bôte ya Kiryat-Yearim be jô be na: Befilisteñ be sooya a éwolo Nti; Sisan a bo na é bete be mia.