SAMUEL ÔSU 5 - Bible en langue Bulu

Ewolo Zambe e mo Befilisteñ

¹ Eyoñe Befilisteñ be nyoñeya éwolo Zambe, be nga kee je Eben-Ezér e tisone Asdôd.

² Nde be nga nyoñ éwolo Zambe a nyiñeli je e nda Zambe Dagon a bôé je fefele Dagon.

³ Tyé kpwaa, Beasdônieñ be nga kune kôlô si a koé na Dagon a kuya, asu é butu nye si ôsu éwolo Nti. Ane be nga nyoñe Dagon a bulane nye été jé.

⁴ Tyé kpwaa, be nga kune kôlô si a koé Dagon a kuya, asu é butu si ôsu éwolo Nti; e nlô Dagon a mekule me mo mé me kooéya me bôô anyiine mbé yôp, jôm é liʼiya nye ve nkuk.

⁵ Ajô te betuni be Dagon a bôte bese ba nyiin e nda zambe jé e Asdôd be ne teke wulu anyiine ya mbé a kui e môse wu.

⁶ Ane wo Nti ô nga jumbu e be bôte ya Asdôd, a nga wua be e beta njuʼu été; a nga bibi be a mot ataté asdôd a yiane si ése.

⁷ Eyoñe bôte ya Asdôd be yeneya jame te, be nga jô na: Éwolo Zambe yʼIsraél jaa ye ke tabe be bia, amu e wo wé wo liti bia be Dagon e zambe wongane njuk.

⁸ Nde be nga bañete a sulane bivete Befilisteñ a jô na: Bia ye bo éwolo Zambe yʼIsraél aya? Bivet bi nga yalane na: Éwolo Zambe yʼIsraél ja yiane ke e Gat. Ane be nga lôm éwolo Zambe yʼIsraél e Gat.

⁹ Eyoñ éwolo é keya, nde wo Nti ô nga silan tison. Beta njuk a nga kui; Nti a nga bibi bôte ya tison ataté nyô a dañe tyôtyoé a kui nyô a dañ anen; be nga kone mot.

¹⁰ Nde be nga lôm éwolo Zambe Ekroñ. Eyoñ éwolo Zambe é nga nyiin Ekroñ, bôte yʼété be nga yôn a jô na: Be zuya éwolo Zambe yʼIsraél be bia na bi mane wu, biabebien a bôte bangan!

¹¹ Ane be nga bañete a sulane bivete bise ya Befilisteñ. Nde bivete bite bi nga jô na: Bulaʼan éwolo Zambe yʼIsraél; é bulaʼan e vôme wé, é za mane wôé bia, biabebien a e bôte bangan. Amu beta njuʼu yʼawu a mbe e tison ése; e wo Zambe ô nga jumu été ngu.

¹² E bôt be nji ke wu be nga kone mot a e mvolan tison ése é nga sili ô nga bet a kui yôp.