SAMUEL ÔSU 4 - Bible en langue Bulu

Befilisteñ ba bôm Israél a wôlé éwolo Elat, awu Eli a bobefame bé

¹ Samuel a nga kobô Israél ase. Ane Israél a nga ke tôbane Befilisteñ a wosane be. Be nga vule minkan bebé Eben-Ezér, a Befilisteñ be nga vule minkan Afék.

² Befilisteñ be nga tebe minnoñ ya wosane Israél be lôô, a mewosan me nga taté. Befilisteñ be nga dañ Israél a wôé bôt bebé toyini ényin.

³ Ane bôt be nga bulane minkan, a bemvendé yʼIsraél be nga jô na: Amu jé Nti a te kañese na Befilisteñ be dañe bia e môse wu? Kela nyoñane éwolo Elate Nti e Silô; ja yiane tabe e zañe jangan a nyii bia e mo besiñe bangan.

⁴ Nde be nga lôme nkane bezimbi e Silô, ane be nga soo éwolo yʼElate Nti ya minsamba mewosan a too e zañe Bekerubime yôp. Bobefam bʼEli bebaé, Ofni a Finéas, be mbe valé, ba bʼéwolo Elate Zambe.

⁵ Eyoñ éwolo Elate Nti é nga nyiine minkan, Israél ase a nga dañe bete metyiñ, si é tiʼitaʼan.

⁶ Befilisteñ be nga wôʼô zôʼé ya metyiñ mete a jô na: Amu jé zôʼé ya mbetane metyiñe wu e minkane Beébre? Nde be nga suʼulane yeme na éwolo Elate Nti é nga suan e minkan.

⁷ Ane be nga ko woñ a jô na: Ngoʼo bia! Amu avale di é ngenan te boban a kui éyoñe ji.

⁸ Ngoʼo bia! Za a ye kôté bia e wo ya mingungule bezambe mi? Bezambe bete mbe be nga wôé bôte yʼEjipte a mevale bibubua mese e nkôte si.

⁹ Yemane ngu a tabe ane befam a Befilisteñ, Beébre be zaa timili mia alo avale mi nga timili be alo; boʼone befam a wosaʼan!

¹⁰ Nde Befilisteñ be nga wosan Israél a dañe nye. Ane môt ase a nga tup e nda éndelé jé. Ebôm é mbe angôndô yʼanen, bone bʼIsraél be nga wu bôte toyini mewôm mela ba wulu a mebo.

¹¹ Ewolo yʼElate Zambe é nga nyoñeban a bobefam bʼEli bebaé, Ofni a Finéas, be nga wu.

¹² Ane môte ya Bényamin a nga mate a soʼo e nseñ mewosan a zu e Silô môs ôte ôbien, mengômesane nyaban a e nlô nduʼane tyia.

¹³ Eyoñ a nga suan, Eli a mbe a fombôʼô, a too éto bebé e njoñ amu nleme wé ô mbe ô fôʼôbaʼan amu éwolo Zambe. Eyoñ a nga suan e tison, môt ate a nga bôé foé, a tison ése é nga bete metyiñ a yôn.

¹⁴ Eyoñ Eli a wôʼôya zôʼé ya miñyône mite, a nga jô na: Beta zôʼé nyô a liti jé? Nde môt a nga jiʼa zu kat Eli foé.

¹⁵ Valé Eli a ntoo mimbu mewôm ébu a muam, mis me lôô vôme wua te nguleya beta yen.

¹⁶ Ane môt a nga jô Eli na: Ma le! Ma so e nseñe mewosan a e nne ma te tube nseñe mewosan e môse wu. Eli a nga jô na: Jé ja te bo, a mone wom?

¹⁷ Nde mbeʼe foé a nga yalane na: Israél a te tube Befilisteñ, a ba te dañe bôte bangan beta ndañan; toʼo bobefame bôé mebaé, Ofni a Finéas, be wuya, a éwolo Zambe é keya.

¹⁸ Nné ane a nga tot éwolo Zambe ndʼEli a nga koo éto a ku si kayale e fefele mbé; ane tyiñ é nga buʼi nye a ane a nga wu; amu valé a ntoo nnôme môt a too fe adit. A nga bo ésaé ntyiʼi mejô Israél été, tañe mimbu mewôm menyin.

¹⁹ E mbome wé, e mingaa Finéas, a mbe abum a valé a ntoo bebé ya biaé. Eyoñ a nga wôʼô foé ya e nyoñan éwolo Zambe, nyô ya awu ntyi a nyô ya awu e nnôme wé, ndʼa nga vitibi a biaé, amu mintaé mi nga bi nye atemetem.

²⁰ Amu a nga ye bili abiaé, nde binga be nga too nye bebé be nga jô nye na: Te ko woñ amu ô biaya monafam! Vʼa nji ke yalan nge kee nleme wé.

²¹ Ane a nga yôlé monafame na Ikabôd a jôʼô na: Duma é kôlôya Israél! Amu nyoñan éwolo Zambe, amu ntyi wé, amu e nnôme wé.

²² A nga jô na: Duma é kôlôya Israél, amu be nyoñeya éwolo Zambe.