SAMUEL ÔSU 3 - Bible en langue Bulu

Zambe a loone Samuel

¹ Samuel, ésoé ndôman, é nga saane Nti e fefele Eli. Melu mete Nkobô Nti ô mbe njeñeban, miñyenane fe mi nji bo éyoñ ése.

² Melu mete fe, Eli a mbe a bôô e vôme wé. Valé mise mé me nga taté tek. A nji fe bo nguleya yen.

³ A nga bo na, lambe Zambe a ngenan te dim, a Samuel a bôô e nda Zambe Nti, e vôm éwolo Zambe é nga too,

⁴ nde Nti a nga loone Samuel, ane a nga yalane na: Me nyô!

⁵ Nde a nga mate mbi e bʼEli a jô na: Me nyô, amu wo te loone ma. Eli a nga yalane na: Me nji ke loone wo, bulaʼan ke bômbô si.

⁶ Ane Nti a nga beta loone Samuel. Nde Samuel a nga kôlô si, a ke e bʼEli a jô na: Me nyô, amu wo te loone ma. Eli a nga yalane na: Me nji ke loone wo a mone wom; bulaʼan ke bômbô si.

⁷ Valé Samuel a ngenan te yeme Nti, a ajô Nti é ngenan te litibane be nye.

⁸ Ane Nti a nga beta loone Samuel éyoñe lale. Ndʼa nga kôlô si a ke e bʼEli a jô na: Me nyô amu wo te loone ma. Eli a nga yeme na Nti nye a loone mongô.

⁹ Ane a nga jô Samuel na: Kelek a bômbô si; nge ba beta loone wo, wo ye yalane na: A Nti kobôʼô amu mbo ésaé wôé a wôk. Nde Samuel a nga ke bômbô si e vôme wé.

¹⁰ Ane Nti a nga zu a beta loon ane biyoñ bivoʼo na: A Samuel, a Samuel! Nde Samuel a nga yalane na: A Nti, kobôʼô, amu mbo ésaé wôé a wôk.

¹¹ Ane Nti a nga jô Samuel na: Ma zu bo mbia jam Israél été melo mebaé ya môt ase a ye wôʼô de ma ye nyamelan.

¹² Môs ôte, ma ye bo Eli e jam ése me nga jô é too abé asu nda bôte jé; ma ye taté a sondô fe jame te.

¹³ Me nga kate nye na Mamien ma ye jiane nda jé nnôm éto amu abé émien a yem nde é nga bo bobefame bé biôme ya biasé, ve a nji ke komekane be.

¹⁴ Ajô te ma kane ngana asu ndaa Eli na: Teke foʼo na abé ya ndaa Eli da ye jamban, toʼo a bityiʼa biyem nge a mimvean mi avut.

¹⁵ Samuel a nga bômbô si a kui mametyé, ndʼa nga dii mimbé ya ndaa Nti, a nga ko woñe ya kañete Eli nyenan a nga yen.

¹⁶ VʼEli a nga loone nye a jô na: A Samuel, mone wom! Nde a nga yalane na: Me nyô!

¹⁷ Eli na: Nkobô Nti a te kobô wo ô nʼaya? Te solé ma jam. Zambe a boʼo wo avale di a beté fe wo jam afe, nge wo solé ma jam éziñe ya mam mese a te jô wo!

¹⁸ Nde Samuel a nga kate nye mejô mese teke solé nye jôm. Ane Eli a nga jô na: Nti le, a boʼok avalʼEmien a yene mvaé.

¹⁹ Ane Samuel a nga yaé, a Nti a nga too be nye. Te kʼajô da ya mejô mé me nga ku si.

²⁰ Israél ase, ataté Dañ a kui Birséba, a nga yeme na Nti a nga telé Samuel a bo nkulu mejô wé.

²¹ Nti a nga ke ôsu a yené e Silô, amu Nti a nga yené be Samuel e Silô a zene ya mejô mé.