SAMUEL ÔSU 2 - Bible en langue Bulu

Meyeʼelane Anna

¹ Anna a nga yeʼelan a jô na: Nleme wom wo vak e be Nti, Nkaʼale ô ne ma mvus amu Nti, Me ne kobô besiñe bam éngandé, Amu nyiane wôé wo ve ma avak,

² Nti étam a nʼétyi; E Zambe wongan étam a nʼakok. Nye étam a ne Zambe, mfe a nji bo.

³ Telaʼan abui nkobô ésase denan; Telaʼan nkobô mebune wônan; Amu Nti a ne e Zambe a yem mam mese A veʼe mimboon mi bôt mise e Kop.

⁴ A buʼuya élaé mimben Ve mintetek mi mbili ngu ane kandé

⁵ Ba be mbe mebume njalan éyoñ ése Ba kuane bebien atan Ane be ne bi jôme ya di. Ve ba be mbe zaé mebum éyoñ ése Be biya awoʼon. Toʼo nkôkôme minga fe ô biaya biyoñe zamgbwa. Ve minga a nga bili abui bon , A veñesaneya nkôkôm.

⁶ Nti a wôé a a nyii fe, A bo na bôt be ke Nge soo be vôme ya miñwuan.

⁷ Nti a bo bôt azoé nge kum A bete be nge sili be si.

⁸ A bete éngôngole môt mbuluʼu été Avale te fe a vaa nzôzoé akun. Asu ya toé ba be beta be bôt vôme wua A ve bʼéto é ne duma ane ngap. Amu si ése é ne jôme Nti A Nye a nga bôé je mekône mé yôp.

⁹ A bômbô évévé ya baʼale ba bese ba Semé nye Ve ba ba kate nye ba wu e dibi été. Amu môt a se nguleya dañ a ngule jé ébien.

¹⁰ Nti a bo na zoʼoyañ é bam é soʼo yôp, nalé ja ye tyaʼa besiñe bé Amu a ne ntyiʼi mejô a dañ e si nyô été. A ve njôô ya bôte bé ngu, A kôʼôlane ngule ya njôô Emien a nga top.

¹¹ Eyoñe mam mete me maneya, nde Elkana a nga bulan e nlame wé Rama; Ve Samuel a nga liʼi e silô na a saane Nti e fefele Eli, ntuni .

Asuʼu mboon bone bʼEli a ateʼe ésaa wop

¹² Bone bʼEli be mbe njalan a nsisime satan , be nji ke yeme Nti.

¹³ Avale di nde betuni bete be nga bo e be bôt: éyoñ ése bôt be nga zu tyiʼi biyem, mbo ésaé Ntuni a nga zu éyoñe ba yame tit, a bili élum é ne mesôñe melale mo,

¹⁴ éyoñe te a lum e vieʼe été: mbômeyô, minkeññ nge ôbé, jôm ése élum é nga toʼé, Ntuni a nga nyoñe je. Nalé be nga bo e be bôte bese yʼIsraél be nga zu e Silô valé.

¹⁵ Toʼo na be ngenan te diʼi avoñ, mbo ésaé Ntuni a nga zu a jô môt a ve étyiʼa na: Vaʼa Ntuni tite ya yam, amu aa ye ke kañese nyoñe tit é ne mbelan e mo môé, ve nyô é ne nyumi.

¹⁶ Nge môt a jô nye na: Ba ye taté diʼi avoñ, éyoñe te wo suʼulane nyoñ jôme wo yene mvaé, mbo ésaé a nga yalane na: Momo! Wo ye ve éyoñe ji, nalé momo wô na ma ye wôlé a ngu.

¹⁷ Abé bendômane bete é mbe anen e mise me Nti, amu be nga biasé mvean ô nga veban asu Nti.

¹⁸ Ve Samuel a nga bo ésaé e mise me Nti, ésoé fame te é nga beʼe éfôd ndombo.

¹⁹ Nyia wé a nga loé nye mone ngômesan mbu ôse a zu ve nye je éyoñe baa nnôm be nga zu ve biôm ba tyiʼi mbu ôse.

²⁰ Eli a nga botane Elkana baa e minga wé a jôʼô na: Nti a vaʼa wo mvoñe bôt é soʼo be minga nyô, éjiane ya mon a nga sili Nti! Ane be nga bulane jale dap

²¹ A Nti a nga botane Anna ndʼa nga beta biaé bobefame belaa a bobebinga bebaé. Vʼésoé ndôman, Samuel, é nga yaé e fefele Nti.

Samuel a saane Nti e Silô

²² Eyoñe Eli a ntoo nnôm abui, a nga wôʼôtan avale bone bé be nga bo Israél ase; a nga wôʼô fe na bone bete ba jôʼôbô e binga ba sulan anyiine nda éndelé bendôbaʼan.

²³ Nde a nga jô be na: Amu jé mia bo avale mame te? Amu bôte bese ba kate ma mbia mimboone mienan.

²⁴ Momo, a bone bam, e jam ma wôʼô da koban é nji ke bo mvaé; mia tindi ayoñe Nti na é tyame metiñ.

²⁵ Nge môt a bo e môte mboʼo abé , Zambe a ye tyiʼi nye ajô; ve nge môt a bo Nti abé , za a ye yeʼelan ajô dé? Ve be nji ke vôʼôlô tyiñ ésaa wop, amu Nti a nga kômbô wôé be.

²⁶ Samuel, ésoé ndôman, é nga ke ôsu a yaé; Nti a nga yene nye mvaé, nalé fe bôt.

Melep ma zu mfaʼa Eli a nda bôte jé!

²⁷ Ane môta Zambe a nga zu bʼEli a jô nye na: Avale di nde Nti a jô na: Jia! Me nga yené e be nda bôt ésoo éyoñ é mbe Ejipte, éjôé ndaa Faraoñ.

²⁸ Me nga tobe nda éte ézezañe ya meyoñ yʼIsraél été, asu ya saane ma e vôm a nʼétyi: asu ya bet ataʼa metunaʼa dame yôp, asu ya diʼi ôlobinda a nyume mvaé, asu ya jaé éfôd ôsu viam, a me nga ve nda bôt ésoo mimveane bityiʼa mise mia diʼibane nduan mi soʼo e be bone bʼIsraél.

²⁹ Amu jé mia tibi mimveane miam a bityiʼa biam a mebo, mbie me nga bendé na be ve e nda jam é nʼétyi? Amu jé wo semé benyôbon a dañe ma na mi vem a ndian bembômô ya mimvean mise yʼIsraél, ayoñe dam?

³⁰ Ajô te ñhe, nkulane mejô Nti, e Zamba Israél, wo jô na: Me nga jô bebela na nda jôé a ndaa ésoo mia ye saane ma nnôm éto. Vʼéyoñe ji, nalé Nti a jô, ngakaʼa éte é keya ma ôyap! Amu ma ye wumulu nyô a wumulu ma, ve ba ba biasé ma ba ye woban ôson.

³¹ Melu ma zu, éyoñ ma ye vaa e ngule jôé a nyô ya nda bôte jôé, nnôme môt wo ye bo te beta yené e nda jôé.

³² Nsiñ a ye nyoñe vôme yʼétyi e mise môé me lôô. Mam mese ma ye wulu mvoʼé e be bôte yʼIsraél, ve teke môt éziñe ya nda bôte jôé a ye kui nnôme môt.

³³ Ve ma ye baʼale môt éziñ ya mvoñe bôte jôé e fefele ataʼa metunaʼa dam, nalé aban a ateʼe nlem bia ye bi nye, a koé na e bôte bevoʼo bese be maneya wu.

³⁴ Ndem yʼété é ne e jam da ye kui be bobefame bôé bebaé: Ofni a Finéas; ba ye wu bese môse wua.

³⁵ Ma ye telé e ntuni a wulu ane da yian, nyô a ye bo avalʼane nleme wom wo kômbô a avalʼane nsisime wom wo yene mvaé; ma ye lôñe nye nda é ne te kʼafôʼôsan, a a ye wulu ôsu yʼéñwom a ne ñwoʼone mbon éyoñ ése.

³⁶ A e môt ase a ye liʼi nda jôé a ye zu kute meboñ ôsu vié asu ya bi nsañe moné ngʼôfufuse belet a jôʼô na: Futiʼi ma, ma yeʼelane wo, ésaé jia ya bisaé yʼétyi, nalé ma ye bi ôfufuse jôme ya di.