SAMUEL ÔSU 18 - Bible en langue Bulu

Yônatan a dañe nyeʼe David

¹ Nné ane David a nga mane kobô Saül, Yônatan a nga kabetane David, a Yônatan a nga nyeʼe nye anʼémien.

² Môs ôte ôbien, Saül a nga bi David, teke beta jôʼé nye na a bulan e nda bʼésaa.

³ Ane Yônatan a nga bo élat a David, amu a nga nyeʼe nye anʼémien.

⁴ A nga vaa alôʼô a nga beʼe a ve de David, nalé fe mengômesane mé, a jaʼana nkpwaté mekône wé, élaé jé a e kandé jé.

⁵ David a nga ke e vôm ase Saül a nga lôme nye a a nga bo mbamba ésaé vôm ase; Saül a nga telé nye évete ya bôte mewosan a bôte bese yʼayoñ be ga yene nye mvaé, toʼo na bebo bisaé be njô bôt.

⁶ E mebulane me nkane bita, valé David a maneya wôé Gôliat mone Filisteñ, binga ya bitisone bise yʼIsraél be nga zu tôbane njô bôte Saül, be yiʼa bia a be jemek a tyiñe mengom a bibômébômé bife, be beteʼe metyiñ a mevak.

⁷ Binga ba be yalaʼane ba bevok be woék a jô na: Saül a wôéya betoyini bé, a David ki mewôm betoyini bé.

⁸ Nde beta ôlun a nga bi Saül na a nyoñe jame te mbia nyoñan. Ane a nga jô na: David nye ba ve toyini awôm, ve ma ba viane ve betoyini! Jôm é liʼiya nye vʼéjôé.

⁹ Ataté môs ôte a ke ôsu, Saül a nga yene David mbia be mis.

¹⁰ Tyé kpwaa, nde mbia nsisim , a soʼo be Zambe, a nga bi Saül, nye ve taté na a tyibelan e zañe nda . David a bôme ndeñge ane môse mivok, a Saül ki a bili akoñe wo.

¹¹ Ane Saül a nga fôʼé akoñ a jôʼô na: Ma ye lume David a late nye e mfin, ve David a nga yeʼe nye biyoñ bibaé.

¹² Saül a nga ko David woñ amu Nti a nga too be David a too ke Saül ôyap.

¹³ Ajô te Saül a nga vaa David bebé e vôm a nga too, a telé nye évete ya toyina bôt. David a mbe a kelek a soʼok, a too nlô ya bôt.

¹⁴ E mam mese David a nga bo me nga wulu mvoʼé , a Nti a nga too be nye.

¹⁵ Eyoñe Saül a yeneya na mam ma ke David mvoʼé éyoñ ése, a nga ko nye woñ;

¹⁶ VʼIsraél ase a Yuda be nga nyeʼe David, amu a mbe évete jap meke a meso.

David Nnômengona njô bôt

¹⁷ Ane Saül a nga jô David na: Ntôle ngone wome wu, Mérab, ma ye ve wo wô ô bo minga wôé, boʼo ma vʼésaé a éwôlô ése a bo ntebʼôsu ya mewosane Nti. Amu Saül a nga simesane na: Sake wo wom wo yiane wôé David, ve wo Befilisteñ.

¹⁸ Nde David a nga yalane Saül na: Me ne za, a ényiñe jame ke jé a abume bôt ésaa wom ke jé Israél été, ane me ne nguleya bo nnômengona njô bôt?

¹⁹ Eyoñe melu ya na Mérab, ngone Saül é vebane be David me nga kpwaan, nde be nge viane ve nye Adriél, ndômane ya Mehôla é luʼu nye.

²⁰ Ve Mikal, ngone Saül, é nga nyeʼe David, nde be nga kate de Saül, nye ve yene nalé mvaé.

²¹ Saül a nga jô e nlem éte na: Ma ye ve nye nye, éyoñe te a ye bo nye ôlam a éyoñe te Befilisteñ ba ye wôé nye, ajô te Saül a nga jô David éyoñe baa na: Wo ye bo nnômengone wome den.

²² Saül a ga bendé bebo bisaé bé na: Kobaʼan David ômômoʼo na: Tame yen njô bôt a bebo bisaé bé bese ba nyeʼe wo: ajô te boʼok nnômengona njô bôt éyoñe ji.

²³ Nde bebo bisaé be Saül be nga baʼalane mejô mete e melo me David, a David a nga yalane na: Ye é ne mone jam e mise menane na môt a bo nnômengona njô bôt? Ma me ne nzôzoé môt, me nji bo mfañe jôm.

²⁴ Ajô te bebo bisaé be Saül be nga kalane nye foé na: Avale di nde David a jô.

²⁵ Ane Saül a nga jô na: Avale di nde mia ye kobô David na: Njô bôt a nji yi nsuba; ve a kômbô bikôbe metyele Befilisteñ ntet, nalé a ye kuneban e be besiñe bé. Saül a nga bôndé feʼe na David a ku e mo Befilisteñ.

²⁶ Ane bebo bisaé be Saül be nga kate David mejô mete a David a nga yene jame te mvaé na a ye bo nnômengona njô bôt. Te na éyoñ é ne ntiñetan é kpwaan,

²⁷ David a nga kôlô si a ke baa be bôte bé a wôé befame ya Befilisteñ mintete mibaé. Eyoñe te a nga soo bikôbe metyele biap, a be nga ve bie njô bôt abim ébien a nga sili, nalé ate David a ye bo nnômengona njô bôt. Eyoñe te Saül a nga ve nye ngo jé.

²⁸ Ane Saül a nga yene na Nti a ne be David. Mikal, ngone Saül a mbe a nyekeʼe David.

²⁹ Eyoñe te Saül a nga dañe dañe ko David woñ, a a nga bo nsiñe wé éyoñ ése.

³⁰ Bivete Befilisteñ bi mbe bi kuik e kpwatôla a éyoñ ése bia suan, David a nga wôé bôt abui a dañe bebo bisaé be Saül bese, a jôé dé e nga dañe wum.