SAMUEL ÔSU 16 - Bible en langue Bulu

Zambe a tobe Davib mfefé njô bôt

¹ Ane Nti a nga jô Samuel na: Wo ye yône Saül nté mbé ? Ma me beneya nye na a bo te beta jôô Israél. Jaléʼé nlaʼa mbone wôé a ke! Ma lôme wo e be Izayi, e Bétléhém, amu me yeneya njô bôte wom e bobefame bé été.

² Ane Samuel a nga jô na: Ma ye ke aya? Eyoñe Saül a ye wôʼô de a ye wôé ma. Nde Nti a nga jô na: Wo ye kee ngal éjakas a jô na: Ma zu ve Nti étyiʼa.

³ Wo ye loone Izayi éyoñe ya ntyiʼan; mamien ma ye kate wo jam wo yiane bo, a wo ye woʼo ma nyô ma ye liti wo mbon.

⁴ Ane Samuel a nga bo e jame Nti a nga jô, nde a nga ke Bétléhém. Ane bemvendé ya tison be nga zu tôbane nye be fôʼôbaʼan a jô na: Ye nsoone wôé wo kate jam éziñ ya mevak?

⁵ A nga yalane na: Yaa! Ma zu ve Nti étyiʼa. Tunane miabebien a tôñe ma vôm ma ke ve étyiʼa. A nga bo fe na Izayi a bobefame bé be tuneban a a nga loone be e vôm a nga ve étyiʼa.

⁶ Eyoñe be nga suan, Samuel a nga simesan éyoñ a yeneya Eliab na: Ma buni foʼo na nyôô Nti a ne ñwoʼone mbon nye a tele nye ôsu nyô.

⁷ Ve Nti a nga jô Samuel na: Te fombô avale wo yene nye atan, ayabe nté dé, amu me beneya nye. Amu é nji ke bo ajô ya jôme bôt ba yen amu bôt ba fombô jôm avale ja yené atan ve Nti a fombô nlem .

⁸ Ane Izayi a nga loon Abinadab a lôte nye e mise me Samuel. Samuel nye na: Nyôna fe Nti a nji tobe nye.

⁹ Ane Izayi a nga lôte Samma, Samuel a nga jô na: Nyôna fe Nti a nji tobe nye.

¹⁰ Nalé Izayi a nga bo na bobefame bé zamgbwa be lôt e mise me Samuel, nde Samuel a nga jô Izayi na: Nti a nji ke tobe môt éziñ yʼété.

¹¹ Eyoñe te Samuel a nga sili Izayi na: Ye ô nji bi bobefam befe? Izayi na: A liʼiya ve nyô a ne mongô, a ve biyem bidi. Nde Samuel a nga jô Izayi na: Lôme bôt be ke loone nye, amu bi se nguleya tabe si vʼakekui a soya va.

¹² Ane Izayi a nga lôme bôt be ke nyoñe nye. A mbe ôbe évele, a beʼe mbamba be mis a bili fe mbamba éyekaʼa. Eyoñe te Nti a nga jô Samuel na: Kôlôʼô si ô woʼo nye mbon, amu e nye le!

¹³ Ane Samuel a nga nyoñe nlaʼa mbon a woʼo nye wô ézezañe bobenyañ. Nde Nsisime Nti ô nga bi David ataté môs ôte a ke ôsu. Ane Samuel a nga kôlô a ke e Rama.

Saül a mbia nsisim . David e mongô bisaé Saül

¹⁴ Ane Nsisime Nti ô nga kôlô be Saül a mbia nsisim , a soʼo be Nti a nga jalé nye a woñ.

¹⁵ Ane bebo bisaé be Saül be nga jô nye na: Tame yen, mbia nsisim , a soʼo be Zambe, a ndeñele wo.

¹⁶ Ajô te a masa kobôʼô! Bebo bisaé bôé be ne émbôé. Ba ye jeñe môt a yeme bôme ndeñge; a ye bôme nye éyoñe mbia nsisim a so be Zambe a zuya be wo a wo ye bi mvolan.

¹⁷ Ane Saül a nga yalane bebo bisaé bé na: Jeñane ñhe ma môt a yeme bôme ndeñge mvaé a zuu ma nye.

¹⁸ Ane wua ya bisoé bebo bisaé a nga kobô na: Me nga yene mona Izayi e Bétléhém, a yeme bôme ndeñge; a ne fe ôdidiʼi mben, môta mewosan, keʼete a abeñe môt, a Nti a too be nye.

¹⁹ Ane Saül a nga lôme bôt e be Izayi be kate nye na: Lôme ma mone wôé David, nyô a baʼale mintômba.

²⁰ Nde Izayi a nga nyoñ éjakase jé, a beté bidi été yôp, a nyoñe fe ndeʼe woon a étoñ ékela, a lôme ñhe David mone wé a ke ve bie Saül.

²¹ Ane David a nga kui a tebe e mise me Saül, nde Saül a nga dañe nyeʼe nye, a bo nye mbeʼe mengale wé.

²² Ane Saül a nga lôm be kate Izayi na: Ma yeʼelane wo na ô jôʼé ma David, amu me yeneya nye mvaé.

²³ Eyoñ ése e nsisim wo so be Zambe ô nga bi Saül, David a nga nyoñe ndeñge a bôme nye, éyoñe te nje Saül a nga vebe mvoʼé a bo fe ôbe mvoʼé , a éyoñe te mbia nsisim a nga kôlô be nye.