SAMUEL ÔSU 13 - Bible en langue Bulu

Israél a wosane Befilisteñ Saül a ve mimvean mi ne ngumba

¹ Saül a mbe mimbu éyoñ a nga tebe njô bôt, a nga jôô Israél tañe mimbu mibaé.

² Ane Saül a nga tobe befame yʼIsraél toyini: élaa baa toyini ébaé be mbe e Mikmas a e nkôle Bétél; toyini mbok a mbe a Yônatan e Gibéa ya Bényamin. Ndʼa nga suu e bôte bevoʼo bese, môt ase e nda éndelé jé.

³ Ane Yônatan a nga bôé nkane bita Befilisteñ ô mbe e Gibéa, nde Befilisteñ be nga wôʼô jame te. Ane Saül a nga bo na toñ é kobô e si ése a jôʼô na: Beébre bese be wôk!

⁴ Nde Israél ase a nga wôʼô be jôʼô na Saül a bôéya nkane bita Befilisteñ, a na Israél a ntoo mbia jôm e be Befilisteñ.

⁵ Nde be nga sulane bôt be Saül e Gilgal. Ane Befilisteñ be nga sulan asu ya wosan Israél. Be nga bili bevagoñ bita toyini mewôm mela a bewulu bikabela bôte toyini ésaman, a Befilisteñ bete be mbe abui ane nseleʼe ya nsaʼa mañ. Nde be nga zu vule minkan e Mikmas, e Bét-Avén mfaʼa jôp da tôô.

⁶ Ane beta ôlun a nga bi bôte yʼIsraél, amu Befilisteñ be nga dañe bametane be. Nde be nga sobô e mimbase mekok , e bibé a e mimfule mekok , e si été a bibé menjeñ.

⁷ Beébre befe be nga dañe yordan a ke e si Gad e mfaʼa ya Galad. Valé Saül a ngenan e Gilgal, ve bôte bese be nga too fefele jé be nga fôʼôban.

⁸ A nga yañge melu zamgbwa, a kui éyoñe Samuel a nga tiñeti. Ve Samuel a nji suan e Gilgal, a bôt be nga taté na ba mialan a ke Saül ôyap.

⁹ Nde Saül a nga jô na: Zaʼane ma mvean ô ne ngumba a bityiʼa ya nlatane ngbwa. Ane a nga ve mvean ô ne ngumba.

¹⁰ Valé a nga mane ve mvean ba diʼi ngumba, ane Samuel a nga so, nde Saül a nga ke ôsu vié na a batane nye.

¹¹ Ane Samuel a nga jô na: Jé wo te bo? Nde Saül a nga yalane na: Éyoñe ma te yene na bôt be nga tyamelan a ke ma ôyap, a na ô nji so éyoñ ô nga tiñeti, a koé na Befilisteñ ki be maneya sulan e Mikmas.

¹² Nde ñhe ma jô mamiene na: Befilisteñ ba ye zu a wosane ma e Gilgal, a ma me nji yeʼelane Zambe! Ajô te ma te tyiʼi na mamien me tame tyiʼi mvean ba diʼi ngumba.

¹³ Ane Samuel a nga jô Saül na: Ô boya ane môt a ne feʼe momo, ô nji ke baʼale abendé Nti, e Zambe wôé, a nga ve wo. Nti a nga yiane yemete njôane wôé Israél été nnôm éto!

¹⁴ Eyoñe ji njôane wôé woo ye ke fe tebe. Nti a jeñeya môt e nleme wé wo yene mvaé, a Nti a teléya nye nliti zene ya bôte bé, amu ô nji baʼale jame Nti a nga bendé wo.

¹⁵ Eyoñe te Samuel a nga kôlô si a ke Gibéa ya Bényamin a kôlôʼô Gilgal. Eyoñe te Saül a nga lañe bôt ba be be be nga too: be mbe befam mintete misaman.

¹⁶ Saül, Yônatan e mone wé a bôte bese ba be be be nga too be nga tabe e Gibéa ya Bényamin, a Befilisteñ be nga vule minkan e Mikmas.

¹⁷ Ane minsamba milale ya minkane Befilisteñ mi nga kui na mia ke e nsa: nsamba wua ô nga ke e mfaʼa zene ya Ofra e si ya Kual;

¹⁸ nsamba ôvok ô nga ke e zene ya Bétôron; a e nsamba lale ô nga ke e mfaʼa zene ya nné a sis e mbiʼili Sebôyim, e mfaʼa ya nkôte si.

¹⁹ Teke nlui melui a mbe e si ése yʼIsraél; amu Befilisteñ be nga jô na: Beébre ba ye bo te lui toʼo nkpwaté mekôn nge akoñ.

²⁰ A môt ase yʼIsraél a nga ke e be Befilisteñ a jep ataté ésobelé ja faʼa si, édikas, ôvôn a ébaʼa jé,

²¹ éyoñe meyo bibak, bidikas, bikule si a avôn bi ntoo atu.

²² A nga bo na e môse mewosan me nga boban, teke nkpwaté mekôn ngʼakoñ bi mbe e mo me bôte bese ba be Saül a Yônatan be mbe; Saül a mone wé Yônatan mbe be nga bili bie.

²³ Eko bezimbi jia ya Befilisteñ é nga zu tabe bebé e Mikmas.