SAMUEL ÔSU 12 - Bible en langue Bulu

¹ Ane Samuel a nga jô Israél ase na: Me wôʼôya tyiñe jenan e mfaʼa ya jam ése mi nga jô ma a me teléya mia njô bôt.

² Eyoñe ji e njô bôt a ye wulu mia nye ñhe nyô. Mfaʼa wom me ntoo nnôm, me ntoo nyube nlô; mfaʼa bone bam mia be be mi too; me nga wulu mia me too mongô a kui môse wu.

³ Ma nyô! Yalaʼane ma Nti a too a éñwé a ne ñwoʼone mbon, za ya be mia me nga nyoñe nnôme nyak nge éjakas? Za me nga tibili nge yemete jam éziñ? Môte mbé a nga bo ma ébotezele na me dime mis e mam a bo? Ma ye yaʼane mia biôm bite.

⁴ Nde be nga yalane na: Ô nji ke tibili bia, nge tindi bia jam éziñ a ô nji ke nyoñe jôm e mo me môt éziñ.

⁵ A nga beta jô be na: Nti a ne e ngaa a ne mia ngame yat, a éñwé a ne nwoʼone mbon fe a ne ngaa e môse wu na mi nji ke koone jôm e mo mam. Ane be nga yalane na wo kobô bebela!

⁶ Samuel a nga jô bôte na: Nti nye a nga telé Môze a Aron, nye fe a soo bʼésoo e si yʼEjipte.

⁷ Eyoñe ji tebaʼan e mbôñ ajô asu Nti. Ma ye taté kate mia mbamba be mam a nga ve mia, miabebien a bimvame bienan.

⁸ Eyoñe Yakob a suaneya Ejipte, nde bʼésoo be nga loone Nti a volô be a Nti a nga lôme Môze a Aron, be ve vaa bʼésoo Ejipte a toé be e vôme nyô.

⁹ Ve be nga vuane Nti, e Zambe wop, ndʼa nga kuane be e mo me Sisera, évete nkane bita ya Asor, a e mo Befilisteñ a e mo me njô bôte ya Môab a nga wosane be,

¹⁰ ane be nga loone Nti a volô be a jô na: Bi boya abé , amu bi liʼiya Nti a saane Bebaal a beastarté: ajô te kôtéʼé bia éyoñe ji e mo besiñe bangan, éyoñe te bia ye saane wo.

¹¹ Ane Nti a nga lôme Yérubal, Badan, Yefté a Samuel. Ndʼa nga kôté mia e mo besiñe benan be nga bômane mia, a mi nga suʼulane tabe mvoʼé .

¹² Eyoñ mi yeneya na Nahas, njô bôte bone bʼAmon a zuya wosane mia, nde mi nga jô me na: Momo! Bia yi môt a jôô bia. Vʼa too na Nti, e Zambe wônan nye a ne e njô bôte wônan.

¹³ Njô bôt mi nga top nye ñhe nyô, nyô mi nga sili; Nti a teléya njô bôte be mia.

¹⁴ Nge mia ko Nti woñ, nge mia saane nye, nge mia vôʼôlô tyiñe jé, a nge mi nji ke bene nkobô Nti, mia ye lat a Nti, e Zambe wônan, miabebien a njô bôt a jôô mia.

¹⁵ Ve nge mia bo te vôʼôlô tyiñe Nti, wo Nti wo ye ke mia e ngame yat, avale ô nga ke bʼésoo e ngame yat.

¹⁶ Eyoñe ji tebaʼan mi yen e beta jam Nti a ye bo mise menan me lôô.

¹⁷ Ye sa den nye ba kôane fôn? Ma ye yeʼelane Nti a Nye a ye lôme mindum mi mveñ a mveñ. Ajô te miabebien mia yiane kañese a yen abim avé abé mi nga bo e mise me Nti é nʼanen éyoñ mi nga sili njô bôt.

¹⁸ Ane Samuel a nga yeʼelane Nti, a e Nti a nga lôme mindum mi mveñ a mveñ môse te ôbien. Nde bôte bese be nga dañe ko Nti a Samuel woñ.

¹⁹ Bôte bese be nga jô Samuel na: Yeʼelane Nti, e Zambe wôé, asu bebo bisaé bôé, nalé bia ye bo te wu; amu bi betéya abé afe e yôbe ya ma mevoʼo bi boya na bia sili njô bôt asu dangan.

²⁰ Nde Samuel a nga jô bôte na: Te koone woñ! Mi maneya bo abé ése di; ve te keane Nti ôyap, ve saane Nye a e nleme wônan ôse.

²¹ Te keane nye ôyap; nalé momo wôna mia ye lat a momo a ne teke mfi nge nkôtan , amu a ne foʼo ve momo.

²² Nti aa ye ke jôʼé e bôte bé amu jôé dé é nʼanen, amu Nti a nga tyiʼi na a bo mia ayoñe dé.

²³ Mboone ya bo Nti abé fe ô kele ma ôyap, nge jôʼé yeʼelan asu denan! Ma ye yeʼele mia zen é ne mvaé a zôsôô .

²⁴ Ve da na koone Nti woñ, a saane nye e bebela été, a e nleme wônan ôse; amu mia yiane yen e jam é nʼanen a boya mi too.

²⁵ Ve nge mia bo abé , mia ye wu, miabebien a e njô bôte wônan.