SAMUEL ÔSU 11 - Bible en langue Bulu

Saül a dañe Beamônite

¹ Nahas, njô bôte ya Beamônite a nga zu dili tisone Yabés bita e Galad. Ane bôte ya Yabés be nga jô nye na: Boʼo élat a bia a bia ye saane wo.

² Ve Nahas, njô bôte ya Beamônite a nga yalane be na: Ma ye bo élat a mia vengevenge ve ma tube mia bese dise ya mbo nnôm, nalé ma ye liti Israél ase ôsame.

³ Nde bemvendé ya Yabés be nga jô nye na: Vaʼa bia awoʼon tañe melu zamgbwa, nalé bia ye lôme bekatefoé e si ése yʼIsraél. A nge môte ya nyii bia a ne momo, bia ye kee wo biabebien.

⁴ Ane bekatefoé be nga kui e Gibéa Saül, a kañete mejô mete e melo me bôt; ane bôte bese be nga bete tyiñ a yi.

⁵ Saül a soʼo mefup a tele e mvuse beyôm benyaʼa bé. Nde a nga jô na: Amu jé bôt ba yôn? Nde be nga kate nye mejô bôte ya Yabés be nga lôme foé.

⁶ Ane Nsisime Zambe ô nga bi Saül éyoñ a nga wôʼô mejô mete, a ayaa dé e nga dañe yôñ.

⁷ A nga nyoñe beyôm benyaʼa bebaé a ba be mefus a lôme me a bekate foé e si ése yʼIsraél, a jôʼô na: Môt ase a ye bo te wulu e mvuse Saül a Samuel ba ye bo beyôm benyaʼa bé avale da. Nde bone bʼIsraél be nga ko woñ a taʼa nsamba ane môte wua.

⁸ Nne Saül a nga lañe be e Bézék. Bone bʼIsraél be mbe toyini mintete mila a bôte ya Yuda toyini mewôm mela.

⁹ Nde be nga jô bekatefoé be nga so na: Mia ye kobô bôte ya Yabés ya Galad na: A akiti, nyian wo ye kui be mia, éyoñe jôp da ye ve ayôñe dé ése. Ane bekatefoé be nga zu kate bôte ya Yabés foé éte, nde be nga dañe vak.

¹⁰ Ane bôte ya Yabés be nga jô Beamônite na: A akiti bia ye ve mia biabebien, a mia ye bo bia ane mia kômbô.

¹¹ Tyé kpwaa, Saül a nga kabe bôt minsamba mila. Nde be nga nyiine minkan éyoñe tyé ja taté lendé a wôé Beamônite a kui éyoñ ayôñe ya môs é ntoo. Bô bese be nga nyiñ be nga mialan, be nji fe bo nguleya tebe bôte bebaé vôme wua.

¹² Ane bôte yʼIsraél be nga jô Samuel na: Beza be nga jô na: Ye Saül a ye jôô bia? Zaʼane bôte bete bi wôé be.

¹³ Ve Saül a nga jô na: Môt éziñ aa ye ke wôéban e môse wu, Amu Nti a boya ésaé nkôtan Israél été.

Samuel a suu ésaé ntyiʼi mejô Israél été

¹⁴ Ane Samuel a nga jô bôte na: Zaʼa bi keane Gilgal a yemete éjôé.

¹⁵ Nde bôte bese be nga ke Gilgal. Be nga telé Saül njôô e mise me Nti Gilgal. A be nga ve Nti mimveane ya nlatane ngbwa; éyoñe te Saül a bôte bese yʼIsraél be nga bo beta mevak.