SAMUEL ÔSU 10 - Bible en langue Bulu

¹ Ane Samuel a nga nyoñe ndeʼe mbon a nga sôé Saül e nlô. Ndʼa nga wubane nye a jô na: Nti a maneya woʼo wo mbone na ô bo nliti zene ya ngabe bôte jé.

² Den, éyoñ wo ye kandane ma, wo ye koone bôte bebaé be too fefel avuse Rachél, e nnéa sii Bényamin, e Selsa. Ba ye kate wo na: Beyale bijakas ô nga ke wo jeñ be yenéya. Eyoñe ji ésoo a jôʼéya ajô beyale bijakas, ve njuk ô ne nye nlem amu ajô denan a jôʼô na: Me bo aya ajô mone wom?

³ Akôlô ya valé, wo ye ke ôbe Nté a kui élône ya Tabor, valé nye bôte belaa ba ye tôbane wo, be betek be Zambe e Bétél, be beʼe, môte wua, bone bikela belaa, nyô mbok afufuse belet alaa, nyô mboʼo ke ndeʼe woon.

⁴ Ba ye batane wo a ve wo belet ébaé, wo ye nyoñe je e mo map.

⁵ Eyoñe te wo ye kui e Gibéa-Elohim e vôme nkane bita Befilisteñ ô né. Eyoñ ô nyiineya e tison, wo ye tôbane nsamba bekulu mejô be soʼo éto yʼékôndôʼô yôp, mvet, ngom, ndiñ a éngombé bi too bʼôsu, be kuluʼu mejô.

⁶ Nsisime Nti wo ye bi wo, mia be be mia ye kulu mejô a wo ye tyendé a bo avale môt afe.

⁷ Eyoñe mendem mete ma ye tôébane be wo, boʼok e jam wo ye yene na wo yiane bo, amu Zambe a ne be wo.

⁸ Eyoñe te wo ye ke ma ôsu e Gilgal, a ma ma ye zu be wo éyoñe jam, asu ya ve mimvean mi ne ngumba, a bityiʼa ya nlatane ngbwa. Wo ye yañge melu zamgbwa akekui me soya be wo a bo na ô yem e jam wo yiane bo.

⁹ Nné ane Saül a nga lume mvus a kandane Samuel, Zambe a nga ve nye e nlem ôfe, a mendem mete mese me nga boban môs ôte ôbien.

¹⁰ Ane be nga kui Gibéa a yene nsamba bekulu mejô ô zaʼa tôbane nye. Nsisime Zambe, ô nga bi nye, ndʼa nga taté na a kulu mejô ézezañe jap.

¹¹ Bôte bese be nga yeme nye ôsusua éyoñ be nga yen ane a kulu mejô ba be bekulu mejô, nde môt ase a nga jô nyô mboʼo e bôt été na: Jé é kuiya e be mona Kis? Ye Saül fe a ntoo môte ya bekulu mejô?

¹² Nde môte ya vôm ate a nga yalane na: Za a ne ésaa wop? Ajô te nkana ô nga tébane na: Ye Saül fe a ntoo môte bekulu mejô?

¹³ Eyoñ a maneya kulu mejô, a nga ke éto ékôndôʼô ya yôp.

¹⁴ Ndômenyañe Saül é nga sili nye a e mboo ésaé wé na: Mi nga ke vé? Nde Saül a nga yalane na: A ke jeñe beyale bijakas; ve bi nji ke yene jôm, nde bi nga ke e be Samuel.

¹⁵ Ndômenyañe Saül é nga beta nyoñe nkobô a jô na: Kañeteʼe ñhe ma e jame Samuel a nga jô mia.

¹⁶ Ane Saül a nga yalane ndômenyañe na: A nga kate foʼo bia na beyale bijakas be yenéya. Ve a nji kate nye jam é nambeʼe ajô éjôé a nga kobô nye.

Saül a tobane njô bôt a mboon asimba

¹⁷ Ane Samuel a nga sulane bôt e Mispa asu be Nti,

¹⁸ Nti, Zambe yʼIsraél, a jô na: Ma me nga soo Israél Ejipte. Me nga kôté mia e wo bôte yʼEjipte a e wo meyoñ me nga tibili mia.

¹⁹ Ve den, mia mia ben e Zambe wônan a nga nyii mia e minjuʼu mienan mise a biyebe bienan bise, a mia jô nye na: Teléʼé bia njôô! Zaʼan éyoñe ji asu be Nti, ane meyoñ menan a betoyini be bôte benan be né.

²⁰ Ane Samuel a nga zuu meyoñ mese yʼIsraél, nde ayoñe Bényamin é nga toban.

²¹ Ndʼa nga zuu ayoñe Bényamin ane mebume map me né a abume Matri é nga toban. Eyoñe te Saül, e mona Kis a nga toban. Be nga jeñe nye, ve be nji yene nye.

²² Ane be nga beta sili nkômbane Zambe a sili na: Ye môt ate a nga zu foʼo va? Nde Nti a nga yalane na: A solô e mfaʼa mimbeʼe mi né.

²³ Ane be nga nyoñe nye wé mbi, nde a nga tebe ézezañe bôt. A nga dañe bese ayap.

²⁴ Ane Samuel a nga jô bôte bese na: Ye mi yeneya nyô Nti a tobeya? Amu mfe a nji bo ane nye e bôte bese été. Ane bôte bese be nga bete metyiñ a jô na: Ényiñe njô bôt é boʼo ayap!

²⁵ Ane Samuel a nga lañe be e mam ba yiane bo njô bôt a mam njô bôt a yiane bo; a nga tili me e kalate a bôé nye e vôm a ne étyi. Eyoñe te Samuel a nga suu bôt be ke, môt ase e jale dé.

²⁶ Saül fe a nga ke e nlame wé Gibéa. Biwôlô bi bôt bi nga ke liʼitane nye mbe Zambe a nga nnambe nlem .

²⁷ Ve zesé bôt éziñ é nga jô na: Jia! Ye môte nyô nye a ye nyii bia! Nde be nga biasé nye, teke zu ve nye biôm ve Saül a nga too évô.