SAMUEL ÔSU 1 - Bible en langue Bulu

Eli, ntuni a ntyiʼi mejô e Silô

¹ Môt éziñ a nga too Ramatayim-Sôfim, si minkôle ya Efrayim jôé na Elkana, e mona Yérôham ndaé Elihu, ndile Tôhu, ôwuabañe Suf, môte ya ayoñ Efrayim.

² A nga bili binga bebaé: nyô ôsu a mbe jôé na Anna, nyô baa ke jôé na Pénina. Pénina a nga bili bon , ve Anna a nji bi bon .

³ Mbu ôse a nga kôlô tisone jé a ke e Silô na a kañe Nti ya minsamba mewosan a tyiʼi nye biyem. Bone bʼEli bebaé, Ofni a Finéas, be mbe e Silô valé be too betuni be Nti.

⁴ E môs ôse Elkana a tyiʼi biyem, a nga ve Pénina e minga wé ba be bone bé bese befam a binga, mengap.

⁵ Vʼa nga ve Anna ngap ja yiane bôte bebaé amu a nga nyeʼe nye akôsa bo na Nti a nga dibe nye abum abiaé.

⁶ Mvane jé (Pénina) é nga ve nye ôlune nlem éyoñ ése a jeñe na a yaa amu Nti a nga dibe nye abum abiaé.

⁷ Nalé a nga boban mimbu mise na éyoñe Anna a ke e nda Nti, Pénina a nga ve nye ôlune nlem avale da. Ajô te a mbe ve yôn a teke fe di bidi.

⁸ Ane Elkana, nnôme wé, a nga jô nye na: Amu jé wo yôn a tabe te di? Amu jé e nleme wôé ô nʼéyôé? Ye me nji dañe bon awôm be wo?

⁹ Ane Anna a nga kôlô éyoñe ndian a nyuan bi maneya e Silô. Eli ntuni a nga to éto jé anyiine mbé ya Nda Zambe Nti.

¹⁰ Ane Anna, nleme ntyaʼan a ôlun, a nga yeʼelane Nti a dañe yôn.

¹¹ Nalé a nga tiñeti atiñ a jô na: A Nti ya minsamba mewosan! Nge wo fombô éngôngole ya mbo ésaé wôé a ne minga a né, a simesane ma, a bo te vuan e mbo ésaé wôé a ne minga, a nge wo ve mbo ésaé wôé a ne minga monafam, ma ye ve nye Nti melu mese yʼényiñe jé, a étyeñe minlô ja ye bo te lôt e nlô wé.

¹² Amu a nga jaé yeʼelan asu be Nti, nde Eli a nga fombô anyu dé.

¹³ Anna a mbe a kobôʼô e nleme wé été; biyaé bié étam mbie bi fôʼôsaʼan, ve tyiñe jé teke wôʼé. Ajô te Eli a nga buni na a ne e sulé.

¹⁴ Nde a nga jô nye na: Wo ye tabe sulé a kui éyoñ évé? Boʼo na sulé jôé é man.

¹⁵ Ane Anna a nga yalane na: Momo a tate wom, me ne e minga nlem ô ne ntyaʼan, me nji nyu woon nge bilam bi ne ngu; ve ma too me kuʼi e nleme wom e be Nti.

¹⁶ Te nyoñe mbo ésaé wôé ane minga a ne zesé jôm. Amu mintaé miam a ôlune viam bi dañeya abui nde ma kobô a kui éyoñe ji.

¹⁷ Eli a nga beta nyoñe nkobô a jô na: Kele mvoʼé , a Zambe ya Israél a vaʼa wo e jôm wo te sili nye!

¹⁸ Wôna Anna a nga yalane na: E mbo ésaé wôé a ne minga a tame ñhe foʼo yene mvame be wo.

¹⁹ Ane be nga kôlô si e ndibe tyé; éyoñ be maneya kute meboñe si asu be Nti, be nga bulan a kui e nda jap e Rama. Ane Elkana a nga fulane Anna e minga wé. Nde Nti a nga simesane Anna.

Abialé Samuel

²⁰ Ezezañe mbu, nde Anna a nga nyoñ abum; a nga biaé monafam a yôlé nye jôé na Samuel, amu a nga jô na: Me nga sili nye Zambe.

²¹ Elkana, nnôm, a nga bet a nda bôte jé ése asu ya ve Nti étyiʼa ya mbu ôse a asu ya jalé ntiñetane wé.

²² Ve Anna a nji ke ke. Amu a nga jô nnôme na: Éyoñe monafam a ye tyi mebé, ma ye kee nye a liti nye asu be Nti na a tabe valé atabatabe.

²³ Elkana, nnôme wé, a nga jô nye na: Boʼok avale wo ye yene mvaé, tabeʼe va akekui ô tyiliya nye mebé. Ve Nti Emien a boʼo na mejô mé me tôéban! Nalé Anna a nga liʼi; a nga nyaa nye mebé akekui a nga tyili nye me.

²⁴ Eyoñ a tyiliya nye mebé, ba nnôm be nga bet ba be mon be bili beyôm benyak belaa, mveʼan avut a ndeʼe woon a kee nye e ndaa Nti e Silô, valé monafam a ngenane mongô.

²⁵ Be nga tyiʼi nnôme nyak a kee mongô e be Eli.

²⁶ Ane Anna a nga jô na: A Tate wom, ye wo simesane foʼo minga a nga tele wo bebé môs éziñ na a yeʼelane Nti? Ane womien ô vee, ma me ne minga ate.

²⁷ E mon me nga sili meyeʼelane mam été e nye nyô: Nti a veya ma nye.

²⁸ Ma ma bulane ve nye Nti; e ngum ényiñe wé ôse, a ye bo mona Nti. Eyoñe te nda bôt ése é nga kañ asu be Nti.