SAMUEL BAA EJÔÉ DAVID 9 - Bible en langue Bulu

David a bo Mefibôsét, mona Jônatan mvaé

¹ Ane David a nga jô na: Ye môt éziñ ya nda bôte Saül a ngenan foʼo me mvamane nye amu Yônatan?

² Mbo ésaé éziñ ya nda Saül, jôé na Siba, a nga zu be David njô bôt. Ane njô bôt a nga jô nye na: Ye wo ô ne Siba? Ma, mbo ésaé wôé, me ne Siba!

³ Ane njô bôt a nga jô na: Ye môt a nji beta bo e nda bôte Saül, me liti nye mvame Zambe? Siba a nga yalane njô bôte na: Mona Yônatan a ngenan a vee, ve a ne mbôbôʼô mebo.

⁴ Njô bôt a nga sili na: A ne vé? Siba a nga yalane njô bôte na: A ne e ndaa Makir, mona Amiél, e Lôdebar.

⁵ Ajô te njô bôt a nga lôme bôt be ke nyoñe nye e ndaa Makir, mona Amiél, e Lôdebar.

⁶ Ane Mefibôsét, e mona Yônatan, mona Saül, a nga zu be David a ku asu é butu si, a kute meboñe si, David a nga jô na: A Mefibôsét! Nye na: Mbo ésaé wôé nyô.

⁷ David a nga jô nye na: Te ko woñ! Bebela a ne na ma zu mvamane wo amu ésoo Yônatan. Ma ye bulane kee wo mesi mʼésoo Saül mese, a wo ye di tawôlô wom éyoñ ése.

⁸ A nga kute meboñe si a jô na: Mbo ésaé wôé a ne za ane wo kôñelan e be mbime mvu ô ne ane ma?

⁹ Ane njô bôt a nga loone Siba, mbo ésaé Saül a jô nye na: Ma ve mona masa wôé jôm ése é mbe ji Saül a nda bôte jé ése.

¹⁰ Wo ye bé mefup asu dé, womien, bone bôé a bebobisaé bôé a wo ye naane bidi wo ye kôan, nalé mona e masa wôé a ye bi bidi ya di. Ve Mefibôsét, e mona masa wôé, a ye di tawôlô wom éyoñ ése. Siba a nga bili bon awôm a betan a bebo bisaé mewôm mebaé.

¹¹ Ane Siba a nga jô njô bôte na: Mbo ésaé wôé a ye bo mam mese njô bôt e tate wom a bendé mbo ésaé wé. David a nga jô na: Mefibôsét a ye di tawôlô wom ane wua ya bone be njô bôt.

¹² Mefibôsét a nga bili monafam a too mongô, jôé na Mika, a ba bese be nga too e ndaa Siba be mbe bebo bisaé Mefibôsét.

¹³ Mefibôsét a nga too Yérusalém, amu a nga di éyoñ ése e tawôlô njô bôt. A mbe ñyeyem mebo mebaé.