SAMUEL BAA EJÔÉ DAVID 7 - Bible en langue Bulu

Nkulan mejô Natan ajô nda bôt David

¹ Eyoñe njô bôt a nga tabe e nda jé, a Nti a veya nye awoʼon, éyoñ a nga kôté nye be besiñ bé bese be nga bômane nye,

² ndʼa nga jô nkulu mejô Natan na: Womien tame ñhe yen! Ma me too nda é ne nlôñan a Sédre, vʼéwolo Zambe é too e nda éndelé si.

³ Ane Natan a nga yalane njô bôte na: Kelek a bo e jam ése é ne wo nlem , amu Nti a ne be wo.

⁴ Vʼa nga bo na, alu te, Nti a nga kobô Natan na:

⁵ Kele jô mbo ésaé wom David na: Nti a kobô na: Ye wo wo ye lôñe ma nda ya tabe?

⁶ Amu me nji tabe e nda ataté môs me nga soo bone bʼIsraél Ejipte a kui môse wu, ve ma zu ma wulu me too nda éndelé si a e tabernakel été.

⁷ Vôm ase bia be bone bʼIsraél bese bi keya, ye me toteya éfia e be ayoñe da ya meyoñ yʼIsraél di me nga bendé na é ve bôte bam yʼIsraél bidi, ye me jôya na: Amu jé mi nji lôñe ma nda besédre?

⁸ Eyoñe ji wo ye kobô mbo ésaé wom David na: Nti ya minsamba mewosan a jô na: Ma me nga nyoñe wo vôm ba baʼale biyem, e mvuse mimbam betit, na ô bo nliti zene ya bôte bam yʼIsraél.

⁹ Me nga too be wo e vôm ase ô nga ke, me maneya vaa besiñe bôé bese ôsu viôé, me neneya jôé dôé é bo ane jôé ya beta be bôt be ne si nyô;

¹⁰ Me veya ayoñe dam Israél vôm ya tabe a me bemeya nye si na a tabe été a bo te beta fôʼôsan, na bikotekot bi bôt bi bo te beta samele nye avalʼane melu mvus,

¹¹ A avalʼane melu me nga telé betyiʼi mejô e be bôte bam Israél. Me veya wo awoʼon éyoñ me maneya kôté wo e be besiñe bôé bese. Ajô te Nti a kate wo foé na a ye bo wo nda bôt.

¹² Eyoñ melu môé ma ye jaé a éyoñ wo ye bômbô mia bʼésoo, ma ye yemete mvoñe bôte jôé e mvuse jôé, nyô a ye kui miñya miôé, a ma ye yemete éjôé jé.

¹³ Nye a ye lôñe jôé dame nda , a ma ye yemete éto njôane jé nnôm éto.

¹⁴ Mamien ma ye bo nye ésaa a nye a ye bo ma mon. Nge a kop, ma ye belane bôt ane ôlé ya bôme nye a ane minkasa ya yite nye.

¹⁵ Ve mvame jam ja ye bo te kôlô be nye, avale me nga vaa je be Saül, nyô me nga telé fefel ôsu viôé.

¹⁶ Ôsu viôé, nda jôé a éto njôane jôé bia ye bo teke afôʼé, éto njôane jôé fe ja ye bo ñyemetan nnôm éto.

Meyeʼelan me David

¹⁷ Ane Natan a nga kobô David avalʼane mejô mete mese me né a avalʼane ñyenane te ô né.

¹⁸ Eyoñe te David a nga tebe asu Nti a jô na: Me ne za, A Nti wom, nda bôte jame ke jé, ane ô keya kui ma nté te?

¹⁹ Vʼabime te da be tyôtyoé e mise môé, a Zambe wom me wôʼôya fe ô kobôʼô ajô ndaa mbo ésaé wôé melu ma zu ôsu. Ye zene môta biname le, a Zambe wom?

²⁰ Jé David a ne jô wo a dañ abim a jôya? Wo yem mbo ésaé wôé, wo e Zambe wom!

²¹ Amu nkobô wôé a avalʼane nleme wôé wo kômbô nde ô maneya bo beta be mam bete asu ya liti me mbo ésaé wôé.

²² O ne foʼo anen a Zambe ya nnôm éto! Amu teke jôm ja funane wo, a Zambe mfe a nji bo ve wo, éyoñ bia fombô mam bi nga wôk a melo mangan.

²³ Ye ayoñ afe é ne si nyô é too ane ayoñe dôé Israél, a ye bezambe be nga tame ke kôté ayoñe te na é bo éndap a ve de jôé avale ô nga bo Israél? Ô boya Israél beta be mam, beangôndô be mam asu mvaé ya si jôé, bôte bôé ô nga kôté Ejipte be too, nalé fe meyoñ a bezambe yʼEjipte be too, asu ya na Israél a bo jôme jôé

²⁴ O yemeteya ayoñe dôé Israél na é bo ayoñe dôé nnôm éto; a wo, Nti, Ô ntoo e Zambe wé.

²⁵ Eyoñe ji, a Zambe ya nnôm éto, boʼo na nkobô ô maneya kobô mbo ésaé wôé a nda bôte jé ô tabe nnôm éto, a boʼok avalʼane nkobô wôé ô né.

²⁶ Jôé dôé e boʼo duma nnôm éto a be jôʼô na: Nti ya minsamba mewosan a ne e Zambe Israél! E ndaa mbo ésaé wôé David é boʼo ngu asu dôé!

²⁷ Amu womien, a Nti ya minsamba mewosan, Zambe yʼIsraél, Ô kulaneya mbo ésaé wôé jam ô jôʼô na: Ma ye lôñe wo nda ! Amu ajô te mbo ésaé wôé a te bi ngule nlem ya yeʼelane wo.

²⁸ Eyoñe ji a Zambe wom, wo ô ne Zambe, mejô môé me ne bebela, a ô kateya mbo ésaé wôé mbamba jame nyô.

²⁹ Ajô te kañeseʼe botan e ndaa mbo ésaé wôé éyoñe ji, nalé ja ye tabe nnôm éto asu dôé! Amu wo Zambe wom ô kobôya, a ébotane jôé, e ndaa mbo ésaé wôé ja ye nyoñ ébotan nnôm éto.