SAMUEL BAA EJÔÉ DAVID 6 - Bible en langue Bulu

Ba beʼe éwolo élat

¹ Ane David a nga beta sulan biwôlô bezimbi ya Israél tañe toyini mewôm mela.

² Nde David a bôte bese be mbe fefele jé be nga kôlô si a ke e Balé-Yuda a ke nyoñ éwolo yʼélate Zambe, éwolo é beʼe jôé Nti Zamba minsamba mewosan yʼIsraél, nye a too Bekerubime yôp.

³ Nde be nga futi éwolo élat e vagoñ a ne mfefé été a kee je é kôlôʼô e ndaa Abinadab é ne nkôle yôp; Uza a Ahiyô, bone bʼAbinadab, be nga ve mfefé vagoñe zen .

⁴ Nde be nga vaa je e ndaa Abinadab é ne e nkôle yôp; Uza a mbe a wuluʼu e fefel éwolo Zambe, Ahiô ke ôsu.

⁵ David a ndaa Israél ése be nga vôé a mevale bibômebômé mese ôsu Nti bi too mboon a élé Sipré, bingombé, memvet, mengom, nyas a biwoé.

⁶ Eyoñe be kuiya éfuse si ya Nakôn, Uza a same wo mfaʼa éwolo élat é mbe a nnambe je amu benyak be nga sendé.

⁷ Nde ayaa Zambe é nga yôñ Uza nyô, a Zambe a nga bibi nye valé amu mbia jam a nga bo. Uza a nga wu valé, bebé éwolo Zambe.

⁸ Ane David a nga wôʼô ôlun amu Nti a nga bibi Uza a avale melebe te: nde be nga loone vôm ate na: Perét-Uza a kui môse wu.

⁹ Ane David a nga ko Nti woñ môs ôte a jô na: Ewolo Nti ja ye nyiine nda jam aya?

¹⁰ A nji kômbô nyoñ éwolo Nti e nda jé e tisone David nde be nga kee je e ndaa Obéd-Edom ya Gat.

¹¹ Ewolo Nti é nga tabe ndaa Obéd-Edom ya Gat ngon éla, a Nti a nga botane Obéd-Edom a nda jé ése.

Ewolo Elat ja kui Yérusalém

¹² Be nga kate njô bôte David na: Nti a botaneya nda Obéd-Edom a jôm ése é ne énjé amu éwolo Zambe; Eyoñe te David a nga ke nyoñ éwolo Zambe e ndaa Obéd-Edom a zuu je e tisone David ézezañe beta mevak été.

¹³ Eyoñe bôte be nga beʼe éwolo Nti be nga daa mebo biyoñ bisaman, nde be nga tyiʼi nnôme nyak, a mone nyak a ne avoñ abui.

¹⁴ David a nga jem a ngul ése e mise me Nti éfumulu éfôd é too nye kandé.

¹⁵ Ane David a ndaa Israél ése be nga kee éwolo Nti e beta mevak été, toñ é kobôʼô.

¹⁶ Eyoñe éwolo Nti é nga nyiin e tisone David été, Mikal, ngone Saül, a mbe a fombôʼô vundi; a nga yene njô bôt a fôʼôsaʼan a a jemek ôsu be Nti. Nde a nga biasé nye e nleme wé été.

¹⁷ Eyoñe be soya éwolo Nti, be nga bôé je e vôme wé ézezañe nda éndelé David a nga kôm asu dé; a David a nga tyiʼi mimvean mi ne ngumba a mi ya nlatane ngbwa.

¹⁸ Eyoñe David a maneya ve mimvean mi ne ngumba a mi ya nlatane ngbwa, ane a nga botane bôt a jôé Nti ya minsamba mewosan.

¹⁹ Wôna a nga kabe bôte bese a ndula bôte ase yʼIsraél, befam a binga, môt ase éwôlé belet, ñyañane tit a éwôlé mboon a bibuma bi ndiʼi woon. A bôte bese be nga bulan, môt ase e nda jé.

²⁰ Ane David a nga bulan a botane nda jé éyoñe te Mikal, e ngone Saül, é nga ke tôbane nye a jô nye na: Za avale duma den asu njô bôte yʼIsraél amu a te yené e mise me binga ya bebo bisaé bé, avale zesé môt é ne bo!

²¹ Ane David a nga yalane Mikal na: Ma te vak e mise me Nti, Nyô a nga tobe ma a dañ ésoo a nda bôte jé ése a telé ma njôô ya ayoñ Israél: ôsu vié ñwô ma te vak.

²² Ma ye bo jôme ya biasé a dañe valé a sili mamiene si e mise mam; ve ma ye bo môta duma e fefele bebo bisaé be binga wo jôô be le.

²³ Ajô te Mikal ngone Saül é nji biaé a kui môse yʼawu dé.