SAMUEL BAA EJÔÉ DAVID 5 - Bible en langue Bulu

David, njô bôte ya Israél ase; Yérusalém a nyoñeban

¹ Ane meyoñ mese yʼIsraél me nga zu be David Ebroñ a jô nye na: Ô lôô na bi ne bivese biôé a minsône miôé.

² Ayap é ngenan te lôt éyoñe Saül a mbe njô bôte wongan, wo ô nga wulu Israél meke a meso. Nti a nga jô wo na: Wo ye ve mbame bôte wom Israél bidi, a wo ye bo nliti zene yʼIsraél.

³ Ajô te bemvendé bese yʼIsraél be nga zu be njô bôt Ebroñ, a njô bôte David a nga bo élat a be Ebroñ e mise me Nti. Nde be nga woʼo David mbone ya bo njô bôt Israél.

⁴ David a mbe mimbu mewôm mela éyoñ a nga tebe njô bôt; a nga jôô mimbu mewôm menyin.

⁵ Ebroñ, a nga jôô Yuda mimbu zamgbwa a ngon ésaman; e Yérusalém a nga jôô Israél ase a Yuda mimbu mewôm mela a mila.

⁶ Njô bôt ba be bôte bé be nga wulu dulu ôban e Yérusalém a wosane Beyébuzieñ, bôte ya si éte. Nde be nga jô David na: Woo ye ke nyiine va, amu jaʼana mindindim a bôt ba feñke ba ye sôʼôlô wo! Nalé a nga kômbô jô na: David aa ye ke nyiine va.

⁷ Ve David a nga nyoñe vôm a mbe nlôñan ôlem jôé na Sioñ: nye a ne beta tisone David.

⁸ David a nga jô môs ôte na: Môt ase a ye bôé Beyébuzieñ a koone be mfaʼa mendim ma lôt, miñyeyeme mite a mindindime mite, mie David a vini! Ajô te njôan ô ne na: Ndindim a ñyeyem baa ye ke nyiin e nda été.

⁹ Ane David a nga tabe ôlem été a loone wô na tisone David. A nga lôñe menda mbômaʼan, ataté Milô a ke e tison été.

¹⁰ David a nga dañe yaé a Nti, Zambe ya minsamba mewosan a nga too be nye.

Zambe a yemete éjôé David

¹¹ Hiram, njô bôte ya Tir, a nga lôme minlôman be David be bili bilé bi Sédre, bebuti menda a beba mekok be too été, be nga lôñe David nda ya tabe.

¹² David a nga yeme na Nti a yemete nye njô bôte ya Israél a na éjôé jé ja ye yaé amu ayoñe dé Israél.

¹³ David a nga beta nyoñe bibon a luʼu binga ya Yérusalém, valé a soya Ebroñ, a a nga beta biaé bobefam a bobebinga.

¹⁴ Môé ya ba be nga bialé nye Yérusalém mme ma: Samua, Sôbab, Natan, Solômon,

¹⁵ Yibhar, Elisua, Néfég, Yafia,

¹⁶ Elisama, Eliada a Elifélét.

¹⁷ Eyoñe Befilisteñ be nga wôʼô na be woʼoya David mbone ya bo njô bôte yʼIsraél, nde be nga bete bese na be jeñe nye. Ane David a nga wôʼô jame te a sis ôlem.

¹⁸ Befilisteñ be nga suan a nyiin e mbiʼili ya Refayim.

¹⁹ Nde David a nga sili nkômbane Nti a jôʼô na: Ye me bet a wosane Befilisteñ? Ye wo ye ve be mo mam? Nti a nga yalane David na: Betek, amu ma ye foʼo ve Befilisteñ e mo môé.

²⁰ Ane David a nga kui e Bal-Pératsim vôm a nga bôé be. Eyoñe te a nga jô na: Nti a boya beta aveñ e minsamba besiñe bam ôsu viam, avalʼane mbane mendim ma te bo. Ajô te be nga yôlé vôm ate na Bal-Pératsim.

²¹ Ane be nga liʼi bengunemelane babe valé, David a bôte bé be nga mane kee be.

²² Ane Befilisteñ be nga beta bet a nyiine mbiʼili Berefayim.

²³ David a nga sili nkômbane Nti, a Nti a nga yalane na: Te wo bet; lôte be mfaʼa ya mvus, éyoñe te wo ye kui be be zôsôô a bilé ba loone bemurié.

²⁴ Eyoñe wo ye wôʼô éduñe mebo é soʼo e bemurié yôp a ntoo ve wulu avô, amu Nti le a suaneya ôsu viôé na a bôé nkane Befilisteñ.

²⁵ Ane David a nga bo jame Nti a nga bendé nye a bôé Befilisteñ ataté Géba a kui Gézér.