SAMUEL BAA EJÔÉ DAVID 3 - Bible en langue Bulu

¹ Mewosan me nga tabe ayap e zañe nda bôte Saül a nda bôte David. Ve David a nga dañe dañe bo ngu, ve ba ya nda Saül be nga ke ke si.

² Bobefam be nga bialé David Ebroñ. Ntôle fame wé ô mbe Amnon, ba Ahinôam ya Yizrél be nga biaé nye;

³ nyô baa a mbe Kiléab, baa Abigayil, nga Nabal ya Karmel be nga biaé nye; nyô lale a mbe Absalom, e mona Maaka, ngone Talmayi, njô bôte ya Gésur;

⁴ nyô nyini a mbe Adôniya, e mona Agit; nyô tane a mbe Sefatia e mona Abital;

⁵ nyô saman a mbe Yitream, e mona Egla, nga David. Bana mbe be nga bialé Ebroñ.

Yôab évete mewosane David a wôé Abnér évete mewosane Isbôsét

⁶ Eyoñe bita bi mbe zañe ngame Saül a ngame David, Abnér a nga yeme ngu e ngame Saül,

⁷ Ve Saül a nga bili ébon jôé na Rispa, ngone Aya, nde Isbôsét a nga jô Abnér na: Amu jé ô maneya bômbô a ébon ésaa wom?

⁸ Nde Abnér a nga dañe yaa amu mejô Isbôsét a nga kobô a jô na: Ye me ne mvu ja wôʼa bôte ya e nda bôt ésoo Saül bobenyañ a bemvôé bé, me boya mam mese na ô bo te ku e mo me David ve wo den wo komekane ma ajô ya minga nyô!

⁹ Ajô te Zambe a boʼo Abnér e jame di a beta fe beté dili nge bia David bi boo te bo avale Nti a nga kane David ngana,

¹⁰ a jôʼô na: Ma ye vaa éjôé e ndaa Saül a telé éto njôane David Israél a Yuda été, ataté Dañ a kui Birséba.

¹¹ Isbôsét a nji bo ayoʼo ya yalane Abnér vʼajô da, amu a nga ko nye woñ.

¹² Ane Abnér a nga lôme David minlôman be jô nye na: Si é ne nyô za? Be Jô fe nye na: Boʼok élate jôé a ma: wo wom ô ne a wo mfaʼa ya dutu Israél ase be wo.

¹³ David a nga yalane na: Mvoʼé! Ma ye bo élat a wo; Ve ma sili wo jôme jia na ô bo te yen asu dam veñgeveñge ve wo soo ma Mikal, ngone Saül, éyoñe wo zu be ma.

¹⁴ A David a nga lôm Isbôsét e mona Saül, minlôman be jô nye na: Keʼe ma minga wom Mikal, nyô bia nye bi nga tiñeti aluk nsuba ô too, bikôbe metyele Befilisteñ ntet.

¹⁵ Ane Isbôsét a nga ke nyoñe nye be nnôme wé Paltiél, e mona Layis;

¹⁶ Nnôme wé a nga zu a tôñe nye a yônôk a kui Bahurim. Eyoñe te a nga jô nye na: Kele wé a bulane mvus! Eyoñe te a nga bulan.

¹⁷ Ane Abnér ba be bemvendé yʼIsraél be nga laan a a nga jô be na: Mi juʼuya Kômbô bi David a bo njô bôte wônan;

¹⁸ Boʼone jame te éyoñe ji, amu Nti a jôya ajô dé na; nyiane ya ayoñe dam Israél e wo Befilisteñ, a wo besiñe bé bese wo ye so be David mbo ésaé wom.

¹⁹ Abnér a nga kobô fe Bebenyaminite, a nga ke kate mam mete mese melo me David Ebroñ, mam mese Israél a nga yene mvaé mise mé a mise me nda Bényamin ése.

²⁰ Abnér a nga kui be David Ebroñ ba be bôte mewôm mebaé, a David a nga bo Abnér beta dina a bôt ba be nye be nga so.

²¹ Abnér a nga jô David na: Me tame zu ke sulan Israél ase éjôé masa wom a ne njô bôte si; ba ye bo élat a wo, éyoñe te njôane wôé wo ye bo ngumba avale wo yene mvaé. Ane David a nga suu Abnér a ke, nde a nga ke mvoʼé .

²² Nde a zu bo na bebo bisaé be David be soʼo kpwatôla be bili abui akum, Abnér a nji fe beta bo be David Ebroñ, amu David a nga suu nye a ke, a a nga ke mvoʼé .

²³ Eyoñe Yôab a nkane bita ôse ba be wô be mbe be nga suan, be nga kate Yôab foé na: Abnér, e mona Ner, a too be njô bôt, ve njô bôt a suuya nye na a ke, a a keya mvoʼé .

²⁴ Nde Yôab a nga ke be njô bôt a jô na: Jé wo te bo? Ma wôʼô na Abnér a be be wo; amu jé wo te jôʼé nye na a ke teke bo nye jôm?

²⁵ Wo yeme Abnér, e mona Nér! A te zu na a wone wo, asu ya yem mefeʼe mewosan ô bili, a yem e mam mese wo bo.

²⁶ Eyoñe Yôab a kôlôya be David, a nga lôme minlôman be Abnér nde be nga bulane nye mvus a koé na a Kuiya ébé mendime ya Sira; David a nji yeme jame te.

²⁷ Eyoñe Abnér a nga bulan Ebroñ, Yôab a nga dutu nye fefe ézezañe mbé , ane môt a kômbô kobô nye ômômoʼo, a valé nye a nga bibi nye abum mbiban awu. Ajô te Abnér a nga wu amu metyi mʼAsaél, monyañe Yôab.

²⁸ Mvus éte nje David a nga nyoñe foé éte a jô na: Me ne mfuban e mise me Nti ajô metyi me Abnér, e mona Nér, avale te fe éjôé jam.

²⁹ Metyi mete me bebeʼe e nlô Yôab a nda bôte jé ése! Eyoñ ése, môte ya nda bôte Yôab a ye kone menyôlôk nge zam , nge nyô a wulu a ntum , nge wu a nkpwaté mekôn, nge tabe te jôme ya di!

³⁰ Avale di Yôab ba Abisayi monyañ be nga wôé Abnér, amu a nga wôé monyañe wop Asaél, e Gabaoñ, ézezañe mewosan.

³¹ Ane David a nga jô Yôab a bôte bese ba be nye be mbe na: Nyabane mengômesane menan, jaane minkuta a tabe meyeb été asu Abnér! Eyoñe te njô bôt a nga wulu ôlañ mvus.

³² Be nga jame Abnér Ebroñ. Njô bôt a nga yôn; a bôte bese fe be nga yôn.

³³ Ane njô bôt a nga yia jia ôlun asu Abnér a jô na: Ye Abnér a nga yiane wu ane môt a ne te fek?

³⁴ Mo môé me nji bo nkaʼan, nge mebo môé nkaʼan bengôkop! Avalʼane bôt ba ku ôsu, Ya! E bôt be ne ékotekot, Avale te ô kuya.

³⁵ Ane bôte bese be nga beta yôn Abnér. Ane bôte bese be nga zu be David na a di bidi éyoñe te môs ô ngenan; Ve David a nga kane ngana a jô na: Zambe a boʼo ma Jame dina a beté fe dili, nge ma ye tyeʼe adi nge jôm éfe ése te na jôp é dim!

³⁶ Ane bôte bese be nga yene jame te a kañese jam ése njô bôt a nga bo.

³⁷ Bôte bese a Israél be nga yeme môs ôte na Abnér e mona Ner a nji ke wôéban amu abendé njô bôt.

³⁸ Ane njô bôt a nga jô bebo bisaé bé na ye mi nji yeme na ntômba, mben yʼIsraél ô wuya den?

³⁹ Atek é ngenan me nyô, akôsa bo me ne ñwoʼone mbone ya bo njô bôt; a bôte bete, bone be Séruya, be ne njet a dañe ma. Nti Emien a bulaʼane môt ase a bo abé avalʼane mboon évô wé ô né.