SAMUEL BAA EJÔÉ DAVID 22 - Bible en langue Bulu

David a ve Zambe akéva

¹ Ane David a nga tote Nti mejô ya jia ji éyoñe Nti a maneya kôté nye e mo besiñe bé bese a mo me Saül.

² Nye na: Nti a ne akoʼo dam, ôleme viam Nkôté wom,

³ e Zambe a ne akôme dam, e vôm ma sobô, ébene jam a e ngule ja nyii ma, asoé dam é nʼôyabe yôp éyoñe ma tup. A e nyii wom! Wo nyii ma.

⁴ Ma yôtan a jô na: Nti a yian ékañaʼa! A me nyiibaneya be besiñe bam.

⁵ Amu mintyôa yʼawu mi nga bametane ma. Me nga ko atôñe mendim da tyame biôme woñ;

⁶ Mengataʼa yʼétabaʼa miñwuan me nga bômane ma, mevote yʼawu me mbe mʼôsu,

⁷ ôlune viam été, me nga yeʼelane Nti, ma yeʼelan e Zambe wom: a too ndaa njô bôte jé, a wôʼô tyiñe jam, a ñyône wom wo kui melo mé.

⁸ Si é nga tiʼitan a fôʼôsan, mimbôkaʼa ya yôp mi nga fôʼôban, mi nga tiʼitan, amu ayaa dé e nga yôñ.

⁹ Otita ô nga vam e mimbile mi môé mié, nduan ja diʼi é nga vam anyu dé: metyeʼe me nduan fe me nga kui été.

¹⁰ A nga vite yôp a sis Afibe nkut é too nye mebo si.

¹¹ A nga bete Kérubime yôp a a nga yele, a nga so mefap vʼévuñulu.

¹² Dibi é nga bômane nye ane nda éndelé, a nga sobô afibe nkutʼété, e minkut mi ne njalane mendim été.

¹³ Minkôkô ya nsoone wé mi nga futi nduan e daʼa.

¹⁴ Nti a nga bam ane zoʼoyañ a too yôp été nyô a nʼôyabe yôp a nga bo na tyiñe jé é wôʼé;

¹⁵ a nga wua mekoñe bilaé a mialane be, feleves jia é nga dañe be.

¹⁶ Mañ me nga kôt a mimbôkaʼa ya si nyô Mi nga kui asoé, amu ayaa Nti a amu mvebʼévuñulu ya mimbile mi môé.

¹⁷ A same wo wé a too yôp. A bi ma, a dutu ma e beta mendim été;

¹⁸ a kôté ma be nsiñe wom a ne ngu, be ba ba vini ma be too fe ngu a dañe ma.

¹⁹ Be nga basane ma e môse ya bidime biam, Ve me nga yeʼebe be Nti.

²⁰ A nga vaa ma a tooé ma ne nyema, a nga dutu ma amu a nga nyeʼe ma.

²¹ Nti a nga bo ma avalʼane zôsôô wom a né. A nga belane ma avale mfubane ya mo mam ô né;

²² Amu me nga baʼale mezene me Nti, a me nji ke Zambe wom ôyap a mboon abé .

²³ Mevinda mé mese me ne mʼôsu a me nji ke e fefele minjôane mié.

²⁴ Me nga yené te bijô e be Nye, a me nga tuʼa tabe ntyee ékobe jam été.

²⁵ Ajô te Nti a nga bulane ma ane zôsôô wom a né, ane me ne mfuban e mise mé.

²⁶ Wo liti nyeʼan be nyô a nyeʼe, ô ne zôsôô be môt a ne zôsôô .

²⁷ O ne mfuban be môt a ne mfuban , ve wo yené mfefek be môt a ne njoʼotan.

²⁸ Wo nyii bingôngole bi bôt, mfombane wôé wo sili bôt be ne mebune si.

²⁹ Ya! A Nti! Wo ô ne éfufube jam! Nti a faé dibi dam éfufup.

³⁰ Ma ke mbi e nsamba mewosan été amu wo, éyoñ me bili e Zambe wom me ne nguleya yôô mfine mekok .

³¹ Mezene me Zambe me ne teke ékop. Nkobô Nti ô ne bebela; a nʼében e be ba ba sobô be nye.

³² Amu za a ne Zambe ye sa Nti? a za a nʼakok ye sa e Zambe wongan?

³³ Zambe Nye a ne éwôlô ôleme jam, Nye fe a kôme ma zen ane da yian.

³⁴ A bo mebo mam me funane ma minkok, a bo na me tebe mevôm me nʼôyabe yôp.

³⁵ A yeʼele mekule me mo mam me yembane bita, a mo mam ma limiti élaé mvot.

³⁶ Wo ve ma ébene ya nyiane wôé, a évôvoé ja bo ma beta môt.

³⁷ Amu wo, ma dañe mate avô teke kolé ôbak.

³⁸ Ma tôñe besiñe bam a jiane be, me nji bulane mvus te na ajô ya zañe bia be be é mané.

³⁹ Ma tyiʼi be afus, ma mane be, ba ye bo te beta tebe tetele; be bôô tyia, a ma beté be abo nyô.

⁴⁰ Wo ve ma nguleya wosan, bôte ba té ma mejô, wo bo na me dañe be, mbe bana be ne e mebo mame si.

⁴¹ Wo bo na besiñe bam be tup ôsu viam, me ne nguleya bo besiñe bam zezé biôm.

⁴² Mfombane wop ô kusa liti na ba sili mvolan. Teke môt a zu volô be; ba kobô Nti, ve Nye teke yalane be.

⁴³ Ma nyose be, ma veñesane be mbuluk, ma tibi be a mebo ane mbotok ya minjoñ.

⁴⁴ Wo solé ma mfaʼa ya bôte bam ba yaa, wo baʼale ma na be bo nlô ya meyoñ , e bôt me nji yem ba ke éjôé jame si.

⁴⁵ Bikuu bia zu kobô ma a ékôkon ôyem, e mone jam ase ma jô be be ve wôʼô ma.

⁴⁶ Bone bikuu be teʼeya. Ba kui aleme dap be nyembaʼan.

⁴⁷ Nti a tabeʼe nnôm éto a akoʼo dam é boʼo ébotan! Zambe, akoʼo ya nyiane wom a yiane wum,

⁴⁸ Zambe a ve ma akunaʼa, Nyô a sili meyoñe si be ma,

⁴⁹ a vaa ma besiñe bam été! Wo bete ma besiñe bame yôp Wo kôté ma be môt a ne njet.

⁵⁰ Ajô te ma ye kañe wo e meyoñ me bôt été a Nti! Ve ma ye yia jôé dôé bia.

⁵¹ A ne nkum ya nyian asu njô bôte wé. A ne mvam e be môte wé a ne ñwoʼone mbon, e be David a mvoñ bôte jé akekui nnôm éto.