SAMUEL BAA EJÔÉ DAVID 21 - Bible en langue BuluMfumbale zaé mimbu mila ( Nlb 35:31-34 ) 1 Melu me David, zaé é nga kui tañe mimbu mila fifiti; éyoñe te David a nga sili nkômbane Nti, nde a nga yalane nye na: Jame te da so amu metyi Saül a bôte bé be nga kuli, éyoñe Saül a nga wôé Begabaonite. 2 Ane njô bôt a nga loone Begabaonite a kobô be. Begabaonite be nji bo bôte ya Israél, be mbe mebukaʼa ya Beamorééñ. Ve bone bʼIsraél be nga bo élat a be a nkanane ngana, Saül a nga kômbô mane jiane be amu ajô Israél a Yuda. 3 Ane David a nga jô Begabaonite na: Jé me ne bo mia a me bulu nsem a jé nalé mia ye botane ayoñe bôte Nti? 4 Nde Begabaonite be nga yalane nye na: Bia be Saül a nda bôte jé bi nji bi ajô argent nge or a é nji bo ajô dangane na bi wôé môt Israél été. Nde njô bôt a nga jô na: Jam mia ye jô ma, ma ye bo mia de. 5 Be nga yalane njô bôte na: Amu môte ate a nga kômbô jiane bia a amu a nga bili ôsimesane ya bôé bia na bi jañ e si ya Israél été, 6 a ntoo ve na be kalane bia bôte zamgbwale ya bone bé, éyoñe te bia ye bôôé mimbime miap e mise me Nti e Gibéa Saül, nyô Nti a nga top. Njô bôte na: Ma ye kalane mia be. 7 Njô bôt a nga kamane Mefibôsét, e mona Yônatan ndaé Saül amu ngana David a Yônatan, e mona Saül, be nga kan e zañe jap asu Nti. 8 Ve njô bôt a nga nyoñe bone bebaé Rispa, ngone Aya, a nga biaé Saül, Armôni a Mefibôsét, a bone betan Mikal, ngone Saül, a nga biaé Adriél ya Mehôla, e mona Barsilayi. 9 Ndʼa nga kalane be e mo Begabaonite, be ve bôôé mimbime miap nkôle yôp asu Nti. Bese zamgbwa be nga kôane bidi éyoñe nkôane fôn wo taté. 10 Rispa, ngone Aya, a nga nyoñe nkuta a taa wô émiene si akoʼo yôp, ataté metataʼa me nkôane bidi a kui na mendime ya yôp me sôé me yôp; mendim mete me nga kaman anone ya yôbe na é bebe be yôp a amôs, a betite ya fé a alu. 11 Be nga kate David jame Rispa, ngone Aya, ébone Saül, a nga bo. 12 Eyoñe te David a nga ke nyoñe bivese bi Saül a bi bi Yônatan mone wé e be bôte ya Yabés e Galad be nga vaa bie Bét-San, vôme Befilisteñ be nga tyelé bie éyoñ be nga bôé Saül e Gilbôa. 13 Ane a nga vaa bivese bi Saül a bivese bi mone wé Yônatan; be nga nyoñe fe bivese ya bôte menyôle map me nga bôô nseñ. 14 Be nga jame bivese bi Saül a bi bi mone wé Yônatan e sii Bényamin, e Séla, e soñe Kis, ésaa Saül, be nga bo e jam ése Nti a nga bendé. Eyoñe mam mete me maneya, Zambe a nga suʼulane botane si. Israél a wosane Befilisteñ ( 1 Minkte 20:4-8 ; Sam 60:14 ; 144:9-11 ) 15 Ane Befilisteñ be nga beta wosane Israél. Nde David ba be bebo bisaé bé be nga ke a wosane Befilisteñ. David a mbe nteʼan. 16 Yisbi-Benôd, wua ya bone be Rafa, a nga bili akoñ é too adit besikel mintete mila, adite mvot; a nga bili fe mfefé nkpwaté mekôn ô fane nye kandé. A nga kobô na a zu baʼé wô David. 17 Abisayi mona Seruya a nga zu volô David, ndʼa nga bibi mone Filisteñ a wôé nye. Nde bôte be David be nga kane ngana a jô nye na: Bia be mia bia ye bo te beta kui a ke wosan a wo ye bo te dime lambe yʼIsraél. 18 Mam mete me maneya, mewosan a Befilisteñ me nga beta taté e Gôb. Ane Sibekayi, mone Ukatite a nga wôé Saf, wua ya bone be Rafa. 19 Bita a Befilisteñ bi nga beta taté e Gôb, ane Elhanañ, mona Yaaré-Oregim ya Bétléhém, a nga wôé Gôliat ya Gat a nga bili akoñ, ntyen yʼété ô mbe anen ane nkoʼo élé. 20 Bita bi nga beta boban e Gat. Beta ayabe môt a mbe été akule wo a akul abo ése é bili nye anyu asaman, ése anyu mewôm mebaé a anyiin, a mbe fe môte ya Rafa. 21 Ane a nga soñe Israél; Yônatan e mona Siméa, monyañe David, a nga wôé nye. 22 Bôte bete benyin be mbe bôte ya Rafa ya Gat. Be nga ku e mo me David a mo bebo bisaé bé. |
© LʼAlliance Biblique du Cameroun, 2009
Bible Society of Cameroon