SAMUEL BAA EJÔÉ DAVID 19 - Bible en langue Bulu

David a wôʼôlun

¹ Eyoñe te benyeñenyeñ be nga bi njô bôt. Ane a nga bet étune nda mfaʼa ya mbé yôp a yôn. A wuluʼu a jôʼô na: A mone wom Absalom! Mone wom, mone wom Absalom! Nge ma ki me nga wu e señe jôé! A Absalom mone wom, mone wom!

² Nde be nga kate Yôab na: Tame yen njô bôt a yôn a tabe meyep ajô Absalom.

³ Môs ôte, ndañan ô nga veñesan ôlun e be bôte bese, amu bôt be nga wôʼô njôane môs ôte na: Njô bôt a ne éyôé amu mone wé.

⁴ Môs ôte bôt be nga sôlan e tison avalʼane bôt ba wôʼô ôsone na ba te tup e nseñe bita.

⁵ Njô bôt a nga buti asu dé. A nga yône tyiñe yôp a jôʼô na: Mone wom Absalom! Absalom mone wom, mone wom!

⁶ Ane Yôab a nga kui be njô bôt e nda été a jô na: Wo jalé bebo bisaé bôé ôson asu e môse wu, mbe ba te nyii ényiñe jôé e môse wu, nalé fe ényiñe bobefame bôé a ji bobebinga bôé, ényiñe binga bôé a ji bibone biôé.

⁷ Wo nyeʼe ba ba siñe wo a wo vini ba ba nyeʼe wo amu ô litiya dene na toʼo bivet nge bebo bisaé be nji bo mfi be wo, a me yemeya dene na nge Absalom a too ye nyiñ a bia bese bi mane wu môse wu, wo te ye yene nalé mvoʼé .

⁸ Ajô te kôlôʼô si, ô kui atan a kobô nleme ya bebo bisaé bôé! Amu me jaʼa Nti na: Nge wo bo te kui atan, teke môt mia nye mia ye beta liʼi alu di, a nalé a ye bo wo bidim bia dañ a dañe bi bise bi kuiya be wo ataté éyoñ ô mbe mongô a kui éyoñe ji.

⁹ Ane Njô bôt a nga kôlô si a tabe si e mbé akak. Nde be nga kate bôte bese na: Njô bôt a too si e mbé akak. Nde bôte bese be nga zu tebe njô bôt ôsu. Ve jame da na Israél a nga tup môt ase e nda éndelé jé.

David a Bulan e Yérusalém

¹⁰ E meyoñ mese yʼIsraél, bôte bese be nga sañetan be jôʼô na: Njô bôt a nga kôté bia e mo besiñe bangan, nye a nga bo na bi fam e mo Befilisteñ; éyoñe ji a ntoo ntindan ya mate Absalom a ke si jé ôyap.

¹¹ Ve Absalom bi nga woʼo mbone njô bôt asu ya jôô bia a wuya bita; amu jé mia tabe bivô éyoñ éyoñe ya bo na njô bôt a bulan é kuiya?

¹² Njô bôte David émien a nga lôme Sadok a Abiatar betuni tyiñe na: Kobaʼan bemvendé ya Yuda na: Amu jé mia ye bo bôt ba suʼulane loone njô bôt e nda jé? Amu jam é nga jôban Israél ase été é nga kui melo me njô bôt e vôm a nga solô.

¹³ Mi ne bobejañ, mi ne bivese biam a minsône miam; amu jé mi ne viane tebe mvus mfaʼa ya bo na njô bôt a bulan?

¹⁴ Mia ye fe jô Amasa na: Ye ô nji bo jia ya bivese biam a wua ya minsône miam? Nti a boʼo ma jame di a beté fe jame dili nge wo ye bo te bo évete mewosan éjiane Yôab nnôm éto ôsu viam!

¹⁵ Nde David a nga dutu nleme bôte bese ya Yuda vʼane be mbe môte wua; be nga lôme njô bôte tyiñe na: Bulaʼan, womien a bebo bisaé bôé bese.

¹⁶ Ane njô bôt a nga bulan a kui Yôrdan; nde Yuda a nga ke e Gilgal a ke tôbane njô bôte a bo na a dañe Yordan.

¹⁷ Siméyi, e mona Géra, mone Bényaminite, a mbe môte ya Bahurim, a nga jiʼa ke tôbane njô bôte David ba be bôte ya Yuda.

¹⁸ Ba be bôte toyini ya Bényamin be mbe nsamba a Siba, mbo ésaé ya nda Saül ba be bobefame bé awôm a betan a bebo bisaé bé mewôm mebaé. Be nga yiane ke tôbane njô bôt e Yordan,

¹⁹ éyoñe bia ô nga beʼe nda bôte njô bôt wo dañ ôsôé, be nga yiane fe bo mebendé mese njô bôt a nga ve. Eyoñe njô bôt a dañeya ôsôé, Simeyi a nga ku si ôsu vié

²⁰ a jô nye na: E masa wom a boʼo te lañ ékobe jam. Te simesan e jame dina na mbo ésaé wôé a nga kop e môse njô bôt, e masa wom, a nga kôlô Yérusalém. Njô bôt a boʼo te baʼale jam te e nlem !

²¹ Amu mbo ésaé wôé a yeme jame te; me nga bo abé; ve yene na e môse wu, me ne e môt ôsu ya ndaa Yôsep ése a zu tôbane njô bôt e masa wom.

²² Eyoñe te Abisayi, e mona Séruya a nga fet a jô njô bôte na: Ye amu ate a yiane na be bo te wôé Simeyi nyô a nga yoʼé njô bôte Nti a nga top?

²³ Ve David a nga jô na: Za ajôô é ne mia été a bone be Séruya a amu jé mi litiya miabebiene den ane besiñe bam? Ye be ne nguleya wôé môt Israél den? Ye sa den nye ma te yeme na ma me ne njô bôte ya Israél?

²⁴ Eyoñe te njô bôt a nga jô Simeyi na: Woo ye ke wu! Ane njô bôt a nga kane nye de ngana.

David a beta bo Elat a Méfibôsét

²⁵ Mefibôsét, ndaé Saül fe a nga ke tôbane njô bôt. A nji ke tuʼu mebo mé, nge tyeñe zel, nge sôbe mengômesane mé ataté môse njô bôt a nga ke a kui môs a nga bulane mvoʼé .

²⁶ Eyoñ a nga kui njô bôt ôsu e Yérusalém, njô bôt a nga sili nye na: A Mefibôsét, amu jé ô nji zu nsamba wom?

²⁷ Mefibôsét a nga yalane nye na: A njô bôt e tate wom, mbo ésaé wom a nga duʼu ma, amu mbo ésaé wôé a nga jô na: Ma ye futi éto éjakase jame yôp, a dañ été, éyoñe te bia njô bôt bia ye ke, amu mbo ésaé wôé a ne ñyeyem.

²⁸ Ve a te laane tate wom, njô bôte minsos ajô mbo ésaé wôé. Ve tate wom, njô bôt, a ne avalʼane éngele Zambe. Boʼok e jam wo ye yene mvaé e mise môé.

²⁹ Amu bôte bese ya nda bôt ésaa wom ba zu zu ba bo foʼo ve bôt ba yian awu e mfaʼa tate wom njô bôt; ve womien ô nga tooé mbo ésaé wôé ba be bôt ba di e tawôlô wôé. Jé me nga bo é too zôsôô nje ma yiane yeʼelane je njô bôt?

³⁰ Ane njô bôt a nga jô nye na: Nkobô wôé ôse wo volô jé? Me nga jô na: Mia Siba mia ye kabane mesi.

³¹ Eyoñe te Mefibôsét a nga jô njô bôte na: Toʼo ba nyoñe jôm ése, mbôlô e tate wom njô bôt a bulane mvoʼé e nda jé.

³² Barsilayi, môte ya Galad, a nga so Rôgelim a dañe Yordan ba njô bôt, a bo nye na a kôlô Yordan.

³³ Barsilayi a mbe étua nnôm, mimbu mewôme muam. A nga ve njô bôt jôm ése nté njô bôt a nga too Mahanayim, amu a mbe beta nkukum.

³⁴ Ane njô bôt a nga jô Barsilayi na: Zaʼa bia wo bi ke, ma ye ve mam mese asu mbaʼalane wôé e nda jam Yérusalém.

³⁵ Ve Barsilayi a nga yalane njô bôte na: Ma ye beta nyiñe mimbu tañ aya ane bia njô bôt bi ne bete Yérusalém?

³⁶ Me ne den mimbu mewôme muam. Ye ma beta yem jôm é ne mvaé nge ji é ne abé ? Ye mbo ésaé wôé a ne beta wôʼô mvaé ya jôm a di nge nyu? Ye me ne beta wôʼô tyiñe beyia bia befam a binga? Amu jé mbo ésaé wôé a yiane beta bo mbeʼe tate wom njô bôt?

³⁷ Mbo ésaé wôé a ye ke ôbe ôyap e Yordan yat ba njô bôt. Amu jé ébien njô bôt a yiane ma ve maʼane mete?

³⁸ Kañeseʼe na mbo ésaé wôé a bulan, me jibi wu e tisone jam, bebé e soñ ésaa wom a nyia wom! Ve mbo ésaé wôé Kimham nyô, ba tate wom njô bôt ba ye ke; boʼo nye jam ése wo ye yene mvaé.

³⁹ Ane njô bôt a nga jô na: Kimham a zaʼa nsamba wom, a ma ye bo nye jam wo yene mvaé; Jam ése wo ye kômbô be ma, ma ye bo wo de.

⁴⁰ Eyoñe bôte bese be nga mane dañe yordan a njô bôte fe, njô bôt a nga wubane Barsilayi a botane nye. Eyoñe te Barsilayi a nga bulane jale dé.

⁴¹ Eyoñe te njô bôt a nga lôt mfaʼa ya Gilgal ba Kimham. Ane bôte bese ya Yuda a éfase bôte yʼIsraél be nga daa njô bôte Yordan.

⁴² Eyoñe te bôte bese yʼIsraél be nga zu be njô bôt a jô nye na: Amu jé bobejañ, bôte ya Yuda be nga nyoñe wo a daa wo Yordan mia nda bôte jôé a bôte be David bese?

⁴³ Ane bôte bese ya Yuda be nga yalane bôte yʼIsraél na: Amu na njô bôt a ne môte wongan; Jame ya wôʼô ôlun é ne vé valé? Ye njô bôt nye a zu a nyii bia? Ye a veya bia memvaka?

⁴⁴ Nde bôte yʼIsraél be nga yalane bôte ya Yuda na: Njô bôt a ne éñwongan tañe biyoñ awôm, toʼo David émien, a dañe mia. Amu jé mi nga biasé bia? Ye sa bia bi nga taté ve ôsimesane na njô bôte wongan a bulan? Ve Bôte ya Yuda be nga kobô ayok a dañe bôte ya Israél.